Sanatan Culture Insult Row: સંસદમાં સનાતન સંસ્કૃતિના અપમાન સામે સંતો લાલઘૂમ, અમદાવાદમાં ઉગ્ર વિરોધ

વિપક્ષના સાંસદો પર ધાર્મિક લાગણી દુભાવવાનો ગંભીર આક્ષેપ

આ પત્રકાર પરિષદમાં સંત સમાજના આગેવાનો દ્વારા પપ્પુ યાદવ, મલ્લિકાર્જુન ખડગે, રાહુલ ગાંધી અને સાંસદ અવધેશ પ્રસાદ પર દેશની કરોડો જનતાની ધાર્મિક લાગણી દુભાવવાનો ગંભીર આક્ષેપ કરવામાં આવ્યો હતો. સંતોએ માંગ કરી હતી કે આ તમામ જવાબદાર નેતાઓ સામે વહેલી તકે એફઆઈઆર (FIR) નોંધવામાં આવે અને તેમનું સંસદ સભ્યપદ પણ રદ કરવામાં આવે.

Sanatan Culture Insult Row: ચૈતન્ય શંભુ મહારાજે આકરા પ્રહારો કર્યા

વિશેષરૂપે ચૈતન્ય શંભુ મહારાજે આકરા પ્રહારો કરતા ચેતવણી આપી હતી કે, "આજે દેશભરના સાધુ-સંતો એકાકાર થઈને મેદાનમાં આવ્યા છે અને રાજ્યના તમામ જિલ્લાઓમાં કલેક્ટરોને આવેદનપત્ર પાઠવવામાં આવી રહ્યા છે." તેમણે પપ્પુ યાદવ પર નિશાન સાધતા ઉમેર્યું કે સંસદમાં બનાવટી સંત વેશ ધારણ કરીને સંત સમાજની પરંપરાને લજવવાનું શરમજનક કૃત્ય કરવામાં આવ્યું છે. સાથે જ અયોધ્યા મુદ્દે વાત કરતા તેમણે રાહુલ ગાંધી પર પ્રહાર કર્યા હતા કે તેઓ ક્યારેય અયોધ્યા ગયા નથી અને માત્ર રાજકીય રોટલા શેકવાનું કામ થઈ રહ્યું છે.

દિલીપદાસજી મહારાજે પણ આક્રોશ વ્યક્ત કર્યો

જગતમંદિરના દિલીપદાસજી મહારાજે પણ આક્રોશ વ્યક્ત કરતા માંગ કરી હતી કે સનાતન સંસ્કૃતિનું અપમાન કરનારાઓ સામે કાયદાનો સકંજો કસાય અને તેમનું સાંસદ પદ તુરંત રદ કરવામાં આવે. આ અંગે રાજ્યના રાજ્યપાલને પણ આવેદનપત્ર આપીને રજૂઆત કરવામાં આવશે તેમ તેમણે જણાવ્યું હતું. મોહનદાસજી મહારાજે કડક શબ્દોમાં ચેતવણી આપતા કહ્યું કે પપ્પુ યાદવ અને અન્ય સંસદો આ પ્રકારના અનિચ્છનીય કૃત્યો કરીને વિનાશના માર્ગે આગળ વધી રહ્યા છે.

એક અઠવાડિયા સુધી વિવિધ જિલ્લાઓમાં વિરોધ કાર્યક્રમો યોજાશે

સંત સમાજના આંદોલનની આગામી રણનીતિ જાહેર કરતા સંતોએ જણાવ્યું હતું કે આગામી એક અઠવાડિયા સુધી વિવિધ જિલ્લાઓમાં વિરોધ કાર્યક્રમો યોજાશે અને સોમવારે ગાંધીનગર ખાતે વિશાળ સંખ્યામાં સાધુ-સંતો એકઠા થઈને ઉગ્ર આંદોલનની સત્તાવાર જાહેરાત કરશે. સંતોના આ આક્રમક વલણને કારણે આગામી દિવસોમાં રાજકીય અને સામાજિક મોરચે મોટો ગરમાવો જોવા મળી શકે છે.

આ પણ વાંચો: સ્ટેચ્યુ ઓફ યુનિટી પર નવું નજરાણું: નર્મદા નદીમાં લોન્ચ થયું 600 ની ક્ષમતાનું ક્રૂઝ!