ગુજરાત હાઇકોર્ટે રાહુલ ગાંધીની અરજી ફગાવી

ગુજરાત હાઈકોર્ટે( Gujarat High Court) માનહાનિના કેસમાં રાહુલ ગાંધી (Rahul Gandhi)ની સજાને સ્થગિત કરવાની માંગ કરતી રિવ્યુ પિટિશનને ફગાવી દીધી છે. કોર્ટે રાહુલની સજા પર સ્ટે આપવાનો ઈન્કાર કરી દીધો છે. રાહુલ ગાંધીની અરજી ફગાવી દેતા ગુજરાત હાઈકોર્ટે કહ્યું કે તેમની સામે પહેલાથી જ 10 ફોજદારી કેસ છે. આ સજાથી તેમની સાથે કોઈ અન્યાય થઈ રહ્યો નથી. હવે રાહુલ ગાંધી સામે સુપ્રીમ કોર્ટમાં જવાનો વિકલ્પ બચ્યો છે.

જજે રાહુલ ગાંધીની અરજી પર સુનાવણી કરતા કહ્યું કે રાહુલ વિરુદ્ધ ઓછામાં ઓછા 10 ફોજદારી કેસ પેન્ડિંગ છે. હાલના કેસ બાદ પણ તેમની સામે કેટલાક વધુ કેસ નોંધાયા છે. આવો જ એક કેસ વીર સાવરકરના પૌત્રે નોંધાવ્યો છે. કોઈપણ સંજોગોમાં દોષિત ઠેરવીને અન્યાય કરવામાં આવશે નહીં. કોર્ટના અગાઉના આદેશમાં દખલ કરવાની કોઈ જરૂર નથી, તેથી આ અરજી ફગાવી દેવામાં આવે છે.

નોંધનીય છે કે આ કેસમાં રાહુલ ગાંધીને જામીન મળી ગયા છે. ત્યારબાદ તેમણે 3 એપ્રિલે સુરત સેશન્સ કોર્ટમાં તેમની સજાના આદેશને પડકાર્યો હતો. તેમણે તેમની સજા પર રોક લગાવવા માટે અરજી પણ કરી હતી. રાહુલ ગાંધીને જામીન આપવામાં આવ્યા હતા, પરંતુ 20 એપ્રિલે તેમની સજા પર રોક લગાવવાની અરજી ફગાવી દેવામાં આવી હતી. ઉલ્લેખનીય છે કે, 2019ની લોકસભા ચૂંટણી દરમિયાન રાહુલ ગાંધીએ પ્રચાર દરમિયાન તેમના ભાષણમાં કથિત રીતે કહ્યું હતું કે, ‘મોદી જ બધા ચોરોની અટક કેમ છે?’  જેને લઈને ભાજપના નેતા પૂર્ણેશ મોદીએ સુરત કોર્ટમાં તેમની સામે માનહાનિનો કેસ કર્યો હતો. 23 માર્ચે સુરતના ચીફ જ્યુડિશિયલ મેજિસ્ટ્રેટ એચએચ વર્માએ રાહુલ ગાંધીને ફોજદારી માનહાનિના કેસમાં દોષિત ઠેરવ્યા હતા અને તેમને 2 વર્ષની જેલની સજા ફટકારી હતી.