એશિયન ગેમ્સ 2026 માં ભારતીય ક્રિકેટ ટીમે હરીફ પાકિસ્તાન સામે ફરી એકવાર પોતાનો દમ બતાવ્યો છે. રોમાંચક મેચમાં ભારતે પાકિસ્તાનને 19 રને મ્હાત આપી ગોલ્ડ મેડલ પોતાના નામે કર્યો છે. આ સાથે ભારતીય ટીમે બેક ટુ બેક બીજો ગોલ્ડ મેડલ હાંસલ કર્યો છે. આ મેચ શનિવારે એટલે કે આજે નિશિનના કોરોગી સ્પોર્ટ્સ પાર્કમાં રમાઈ હતી.
Asian Games 2026 INDvsPAK : પાકિસ્તાનની નિરાશાજનક બેટિંગ
પાકિસ્તાનની ઇંનિગની શરૂઆત નબળી રહી હતી. રન ચેઝમાં, પાકિસ્તાનને વોશિંગ્ટન સુંદરે પહેલો ફટકો આપ્યો હતો. સુંદરે કેપ્ટન સાહિબઝાદા ફરહાન (10 રન) ને આઉટ કર્યો હતો. તે સમયે પાકિસ્તાનનો સ્કોર 33/1 હતો. ત્યારબાદ અક્ષર પટેલે વિકેટકીપર-બેટ્સમેન ઉસ્માન ખાનને આઉટ કર્યો, જે ફક્ત 3 રન બનાવી શક્યો હતો. ત્યારબાદ અક્ષરે શાનદાર બોલિંગ કરતા માઝ સદકત (23 રન) ને પોતાની સ્પિનમાં ફસાવી દીધો હતો. જ્યારે માઝ આઉટ થયો, ત્યારે પાકિસ્તાનનો સ્કોર 39/3 થઈ ગયો હતો.
પાકિસ્તાન માટે એક માત્ર હસન નવાઝે અંત સુધી કર્યો સંઘર્ષ
ત્યારબાદ શિવમ દુબેએ પહેલા જ બોલ પર સેમ અયુબ (29 રન) ને આઉટ કરીને ભારતને ચોથી સફળતા અપાવી હતી. ત્યારબાદ પાકિસ્તાનનો સ્કોર 126/4 થયો હતો. વોશિંગ્ટન સુંદરે તેનો કેચ પકડ્યો હતો. ત્યારબાદ વોશિંગ્ટન સુંદરે અબ્દુલ સમદને આઉટ કર્યો, જે ભારતનો પાંચમો બ્રેકથ્રુ હતો. પાકિસ્તાન તરફથી એક માત્ર હસન નવાઝે (96) સારી બેટિંગ કરી હતી, તે આઉટ થનાર છેલ્લો બેટ્સમેન હતો, જેને અંતિમ ઓવરમાં શિવમ દુબેએ કેચ આપ્યો. ભારત તરફથી અક્ષર પટેલ, શિવમ દુબે અને વોશિંગ્ટન સુંદરે 2-1 વિકેટ લીધી.
'એગ્રેસીવ' અભિષેકની તોફાની બેટિંગ
પ્રથમ બેટિંગ કરી ભારતીય ટીમે પાકિસ્તાનને 211/6 નો ટાર્ગેટ આપ્યો હતો. અભિષેક શર્મા અને તિલક વર્મા અને શિવમ દુબેએ શાનદાર બેટિંગ કરી હતી. સ્ટાર ખેલાડી વૈભવ સૂર્યવંશી આજની મેચમાં કોઈ ખાસ કમાલ કરી નહોતી. તેઓ 9 બોલમાં 15 રન બનાવી આઉટ થયો હતો. જ્યારે 'એગ્રેસીવ' બેટ્સમેન અભિષેક શર્માએ તોફાની ઇનિંગ રમી હતી. તેણે માત્ર 28 બોલમાં 3 ચોગ્ગા અને 7 સિક્સર ફટકારીને 217.86 ના સ્ટ્રાઈક રેટ સાથે ધમાકેદાર 61 રન બનાવ્યા હતા. અભિષેકને અરાફત મિન્હાસે આઉટ કર્યો હતો, તેને ઉસ્માન ખાન દ્વારા સ્ટમ્પ આઉટ કરવામાં આવ્યો. સંજૂ સૈમસને આ મેચમાં પણ નિરાશ કર્યા અને માત્ર 2 રન બનાવીને પેવેલિયન ભેગો થયો હતો.
ભારતને ચોથો ફટકો ઇશાન કિશનના રૂપમાં લાગ્યો હતો, જેને અરાફત મિન્હાસે બોલ્ડ કર્યો હતો. ઇશાન 18 બોલમાં 20 રન બનાવ્યા હતા, જેમાં તેણે 3 ચોગ્ગા સામેલ છે. ત્યારબાદ અબરાર અહેમદે શ્રેયસ ઐયરને કેચ આઉટ કર્યો હતો. શ્રેયસ 24 બોલમાં 21 રન બનાવીને પેવેલિયન ફર્યો હતો, જેમાં તેણે 2 ચોગ્ગા ફટકાર્યા હતા. શ્રેયસ આઉટ થનાર પાંચમો ખેલાડી હતો.
શિવમ દુબે અને તિલક વર્માએ અંતિમ ઓવરમાં કમાન સંભાળી
દરમિયાન, ભારતીય ટીમ તરફથી શિવમ દુબે અને તિલક વર્માએ અંતિમ ઓવરોમાં ઝડપી અને શાનદાર ઇનિંગ્સ રમી હતી. અહેમદ દાનિયાલે શિવમ દુબેનો કેચ આઉટ કરાવ્યો હતો. દુબેએ 15 બોલમાં 27 રન બનાવ્યા હતા, જેમાં 2 ચોગ્ગા અને 2 છગ્ગા સામેલ છે. માજ સદાકતે તેનો કેચ પકડ્યો હતો. તિલક વર્માએ 22 બોલમાં 51 રનની શાનદાર અને આક્રામક ઇનિંગ્સ રમી હતી.
પાકિસ્તાનની બોલિંગની વાત કરીએ તો સૈમ અયુબ અને અબરાર અહેમદે 1-1 વિકેટ ઝડપી હતી, જ્યારે અહેમદ દાનિયાલ અને અરાફત મિન્હાસે 2-2 વિકેટ લીધી હતી. જ્યારે સાદ મસૂદ અને સુફયાન મોકીમ વિકેટ લેવામાં નિષ્ફળ રહ્યા હતા.
