Eid ul-Adha 2025 : આજે દેશભરમાં બકરી ઈદની ઉજવણી, જાણો કુર્બાનીનું મહત્વ
- આજે દેશભરમાં રંગેચંગે બકરી ઇદની ઉજવણી કરાશે
- બકરી ઇદ પર સૌથી મહત્વપૂર્ણ વિધિ 'કુર્બાન' છે
- દર વર્ષે ઈદની તારીખ ચંદ્રની સ્થિતિ પર આધારિત હોય છે
Eid ul-Adha 2025 : આજે દેશભરમાં બકરી ઇદ (BAKRA EID - 2025) નો તહેવાર ખૂબ જ ધામધૂમથી ઉજવવામાં આવી રહ્યો છે. બકરીદને ઈદ-ઉલ-અઝહા, ઈદ ઉલ ઝુહા અથવા ઈદ ઉલ બકરા તરીકે પણ ઓળખવામાં આવે છે. આ તહેવારને બલિદાન અને માનવતાનું પ્રતીક માનવામાં આવે છે. ઇસ્લામમાં તેને 'કુર્બાનનો તહેવાર' પણ કહેવામાં આવે છે. ઇસ્લામિક કેલેન્ડર મુજબ, દર વર્ષે ઈદની તારીખ ચંદ્રની સ્થિતિ પર આધારિત હોય છે. ઈદ-ઉલ-અઝહા ઝુલ હિજ્જાની 10મી તારીખે ઉજવવામાં આવે છે, જે રમઝાનના 70 દિવસ બાદ આવે છે.
કુરબાની દ્વારા સંદેશ આપવામાં આવે છે
ઈદ-ઉલ-અઝહાની વાર્તા હઝરત ઈબ્રાહિમ સાથે સંબંધિત છે, જેમાં તેઓ અલ્લાહના આદેશ પર પોતાના પુત્ર હઝરત ઈસ્માઈલનું બલિદાન આપવા તૈયાર થયા હતા. પણ ઇશ્વરે તેમને એક પ્રાણી આપ્યું હતું. તેથી આ દિવસે બકરી, ઘેટાં અથવા અન્ય પ્રાણીનું બલિદાન આપવામાં આવે છે. બકરી ઇદ પર સૌથી મહત્વપૂર્ણ વિધિ 'કુર્બાન' છે. આ કુરબાની દ્વારા સંદેશ આપવામાં આવે છે કે, અલ્લાહના નામે કંઈપણ કુરબાન કરવાની હિંમત રાખવી જોઈએ.
બલિદાન શા માટે આપવામાં આવે છે?
ઈદ-ઉલ-અઝહા હઝરત ઈબ્રાહિમના બલિદાનની યાદમાં ઉજવવામાં આવે છે. આ દિવસે, ઇસ્લામ ધર્મનું પાલન કરતા લોકો પ્રાણીનું બલિદાન આપે છે. ઇસ્લામમાં, હલાલ માધ્યમથી કમાયેલા પૈસાથી જ કુરબાની માન્ય માનવામાં આવે છે. કોઈ વ્યક્તિ ફક્ત પોતાના પરિવાર માટે બલિદાનનું માંસ રાખી શકે નહીં. તે ત્રણ ભાગમાં વહેંચાયેલું છે. પહેલો ભાગ ગરીબો માટે, બીજો ભાગ મિત્રો અને સંબંધીઓ માટે, અને ત્રીજો ભાગ પોતાના ઘર માટે રાખવામાં આવે છે.
કયા પ્રાણીનું બલિદાન આપવું જોઇએ?
ઇસ્લામમાં, ફક્ત તે જ પ્રાણીઓની કુરબાની કાયદેસર માનવામાં આવે છે જે સ્વસ્થ હોય. જો પ્રાણીને કોઈ પણ પ્રકારનો રોગ કે દુખાવો હોય તો અલ્લાહ આવા પ્રાણીની કુરબાનીથી ખુશ થતા નથી તેવું માનવામાં આવે છે.
ઈદ અલ-અધાની પરંપરાઓ
ઈદ-ઉલ-અઝહા એટલે કે બકરી ઈદ માત્ર એક ધાર્મિક તહેવાર નથી પણ ખુશી અને સંવાદિતાનું પ્રતીક પણ છે. ભારત સહિત ઘણા દેશોમાં બકરી ઇદનો દિવસ ઇદની નમાઝથી શરૂ થાય છે. આ દિવસે મુસ્લિમ લોકો નવા કપડાં પહેરે છે, એકબીજાને 'ઈદ મુબારક'ની શુભેચ્છા પાઠવે છે, અને ભેટો અને મીઠાઈઓ વહેંચે છે. ઉપરાંત, ઈદના અવસર પર ગરીબોને દાન આપવામાં આવે છે. સાઉદી અરબના લોકો બકરી ઇદ એક દિવસ વહેલા ઉજવે છે, જ્યારે ભારત, પાકિસ્તાન, બાંગ્લાદેશ અને મલેશિયામાં આ તહેવાર બીજા દિવસે ઉજવવામાં આવે છે.
આ પણ વાંચો --- G7 શિખર સંમેલનમાં સામેલ થશે PM MODI, કેનેડાના પ્રધાનમંત્રી કાર્નીએ આપ્યું આમંત્રણ