તપાસમાં સામે આવ્યું છે કે, જયેશ રબારી અને તેના સાગરીતો લાંબા સમયથી વિસ્તારમાં પોતાની સમાંતર સત્તા ચલાવતા હતા. આ ગેંગ પર પિસ્તોલ બતાવીને લોકો પાસેથી ત્રણ કરોડ રૂપિયા પડાવવા અને પીડિતોના પાસપોર્ટ ઝૂંટવી લેવા જેવા ગંભીર આક્ષેપો છે.
ગુજસીટોક હેઠળ કાર્યવાહી
વ્યાજખોરીના માયાજાળમાં ફસાવીને સામાન્ય લોકોને માનસિક અને શારીરિક રીતે ટોર્ચર કરવામાં આ ગેંગ માહિર હોવાનું પ્રાથમિક તપાસમાં બહાર આવ્યું છે. પોલીસે આ કેસમાં ગેંગના મુખ્ય સૂત્રધાર જયેશ રબારી અને તેના નજીકના સાગરીત દેવા રબારીને નિશાન બનાવ્યા છે. હાલમાં જ કડી પોલીસે ગેંગના સાગરીત દેવા રબારીની ધરપકડ કરવામાં સફળતા મેળવી છે.
ધરપકડ બાદ તેને કોર્ટમાં રજૂ કરીને રિમાન્ડ મેળવવામાં આવ્યા છે, જેથી આ ગેંગના અન્ય કાળા કામો અને છુપાયેલા ગુનાઓનો પર્દાફાશ થઈ શકે. પોલીસ દ્વારા ગેંગના નેટવર્કને તોડી પાડવા માટે હવે સઘન પૂછપરછ શરૂ કરવામાં આવી છે.
કડીના આતંક મચાવનારાઓ પર પોલીસનો સકંજો
આ કાર્યવાહી કડીના શાંતિપ્રિય નાગરિકો માટે એક મોટી રાહત સમાન છે. ભૂતકાળમાં આ ગેંગના ત્રાસથી અનેક લોકો ડરના માર્યા પોલીસ ફરિયાદ કરવાનું પણ ટાળતા હતા, પરંતુ હવે ‘ગુજસીટોક’ હેઠળ ગુનો દાખલ થતા પીડિતોને ન્યાય મળવાની આશા બંધાઈ છે. પોલીસ તંત્રનું સ્પષ્ટ માનવું છે કે, આવી ગેંગોને કાયદાનું જડબેસલાક પાલન કરાવીને કડકમાં કડક સજા અપાવવી જરૂરી છે જેથી સમાજમાં ડરનો માહોલ દૂર થાય.
પોલીસે વધુમાં જણાવ્યું છે કે, આ ગેંગ સાથે સંકળાયેલા અન્ય સભ્યોને પણ આગામી સમયમાં શોધી કાઢવામાં આવશે. કડી વિસ્તારમાં કાયદો અને વ્યવસ્થા જાળવવા માટે પોલીસ હવે વધુ સતર્ક બની છે. જે કોઈ પણ વ્યક્તિ આ પ્રકારની ગુનાહિત પ્રવૃત્તિમાં સામેલ હશે, તેને કાયદાના દાયરામાં લાવીને છોડવામાં આવશે નહીં.
આ પણ વાંચો : Ahmedabad : SG હાઈવે પર અક્સ્માત રોકવા વધુ એક મહત્વનો નિર્ણય, વૈષ્ણોદેવી સર્કલથી ગાંધીનગર ચ-0 વચ્ચે ભારે વાહનો માટે પ્રતિબંધ
