Jetpur : 20 વર્ષ જૂના દબાણ પર પાલિકાનો પંજો : 30 ફૂટનો રસ્તો રોકનાર સ્વિમિંગ પૂલ-દીવાલો ફર્યું JCB

Jetpur : દાદાગીરીનો આવ્યો અંત

ચામુંડા નગરમાં સર્વે નંબર મુજબ 30 ફૂટનો રસ્તો મંજૂર થયેલો હોવા છતાં કેટલાક શખ્સોએ દાદાગીરી ચલાવીને પાકા બાંધકામો કરી દીધા હતા. આ દબાણને કારણે વિસ્તારના 3000થી વધુ લોકોની અવરજવર અટકી પડી હતી. ખાસ કરીને નજીકની શાળાએ જતા નાના બાળકોને સૌથી વધુ હાલાકી ભોગવવી પડતી હતી. જ્યાં સ્કૂલ માત્ર 500 મીટરના અંતરે હતી, ત્યાં પહોંચવા માટે બાળકોએ 5 કિલોમીટરનો લાંબો ચકરાવો લેવો પડતો હતો. ચોમાસા દરમિયાન આ વિસ્તારની સ્થિતિ અત્યંત દયનીય બની જતી હતી.

ચૂસ્ત પોલીસ બંદોબસ્ત વચ્ચે કડક કાર્યવાહી

પાલિકા સૂત્રોના જણાવ્યા અનુસાર, આ દબાણ હટાવવા માટે અગાઉ અનેકવાર નોટિસો આપવામાં આવી હતી અને સ્થાનિકો દ્વારા ઉચ્ચ સ્તરે રજૂઆતો પણ કરવામાં આવી હતી. રાજકીય વગ ધરાવતા લોકોના કારણે કાર્યવાહી અટવાયેલી હતી, પરંતુ આજે સવારથી ચુસ્ત પોલીસ બંદોબસ્ત વચ્ચે નગરપાલિકાની ટીમે જેસીબી અને કટર મશીનો સાથે કામગીરી હાથ ધરી. થોડો સમય રોકવાના પ્રયાસો થયા, પરંતુ અંતે કાયદાનું પાલન કરી તમામ ગેરકાયદેસર બાંધકામો તોડી પાડવામાં આવ્યા.

બાળકોને શાળામાં જવા માટે પડતી હતી મુશ્કેલી

પાલિકા સભ્ય ધર્મેન્દ્રસિંહ (ડી.ડી.) જાડેજાએ જણાવ્યું કે, “નાના બાળકોને સ્કૂલે જવામાં બહુ તકલીફ પડતી હતી. રાજકીય દબાણોને અવગણીને પણ આજે જે કામગીરી થઈ છે તેનાથી પ્રજાનો તંત્ર પર વિશ્વાસ વધ્યો છે.” સ્થાનિક રહીશ વિજયભાઈએ કહ્યું, “20 વર્ષથી અમે આ પીડા ભોગવતા હતા. અમારા જ વિસ્તારમાં જવા માટે અમારે ફરીને જવું પડતું હતું. આજે રસ્તો ખુલ્લો થતા અમે રાહતનો શ્વાસ લીધો છે.”

Jetpur :  કાયદેસરની કરવામાં આવી છે કાર્યવાહી

પાલિકા સભ્ય દિલીપ રાદડિયાએ જણાવ્યું કે, “આ રસ્તો 30 ફૂટનો કાયદેસરનો છે. સ્થાનિકોની વ્યાજબી માંગણીને ધ્યાને રાખી નગરપાલિકાએ ડિમોલિશન હાથ ધર્યું છે. હવે આ વિસ્તારના હજારો લોકોને સીધો ફાયદો થશે.” આ કાર્યવાહીથી જેતપુરના અન્ય વિસ્તારોમાં પણ ગેરકાયદેસર દબાણ કરી બેઠેલા તત્વોમાં ફફડાટ વ્યાપી ગયો છે. નગરપાલિકાના આ કડક વલણને લોકોમાં વ્યાપક આવકાર મળી રહ્યો છે અને તંત્ર પર વિશ્વાસ વધ્યો છે.

આ પણ વાંચો-‘નહીં સુધરો તો પરેડ કરાવીશ’: Rajkot SPની 950 ગુનેગારોને કડક ચેતવણી

અહેવાલ- હરેશ ભાલિયા, રાજકોટ