Navasari : નેવીમાં નોકરી અપાવવાના નામે 40 લાખની છેતરપિંડી : 21 યુવાનો બન્યા ભોગ

Navasari : કેવી રીતે થઈ છેતરપિંડી?

ફરિયાદી તરંગ ટંડેલ, જે કાંઠા વિસ્તારના રહેવાસી છે, તેમણે જણાવ્યું કે વિનોદભાઈ પટેલ નામના વ્યક્તિએ તેમને નેવીમાં નોકરી મળવાની ખાતરી આપી હતી. આરોપીએ પ્રથમ 2 લાખ રૂપિયા એડવાન્સ ફી તરીકે માંગ્યા હતા, જે તરંગે ચૂકવ્યા હતા. ત્યારબાદ મુંબઈમાં મેડિકલ તપાસ અને ઇન્ટરવ્યૂ કરાવવાના નામે વધુ 50 હજાર રૂપિયા પડાવવાનો આક્ષેપ છે. આ પ્રક્રિયા ઘણા મહિનાઓ સુધી ચાલી પરંતુ કોઈ નોકરી મળી જ નહીં.

 ઘણા સમય પછી તરંગે પોતાના રૂપિયા પરત માંગ્યા પરંતુ આરોપીએ આનાકાની કરી અને વિવિધ બહાના બતાવ્યા હતા. આખરે કંટાળીને તરંગે જલાલપોર પોલીસ મથકમાં ફરિયાદ નોંધાવી જેમાં વિનોદભાઈ પટેલ સામે છેતરપિંડીના આરોપ લગાવાયા છે. પોલીસ તપાસ દરમિયાન આ ઘટનાનો વધુ વિસ્તાર સામે આવ્યો જેમાં કાંઠા વિસ્તારના અન્ય 20 યુવાનો પણ આ જ ગેંગના ભોગ બન્યા હોવાનું જાણવા મળ્યું. આ રીતે કુલ 21 યુવાનો પાસેથી 40 લાખ રૂપિયાની ઠગાઈ કરવામાં આવી હોવાનો ખુલાસો થયો છે.

પોલીસની કાર્યવાહી : આરોપીની ધરપકડ અને વધુ તપાસ

જલાલપોર પોલીસે તરંગની ફરિયાદ પર તુરંત કાર્યવાહી શરૂ કરી અને તપાસમાં આરોપી વિનોદભાઈ પટેલને ધરપકડ કરી લીધી હોવાની માહિતી સામે આવી રહી છે. પોલીસ અધિકારીઓના જણાવ્યા પ્રમાણે, આરોપી નોકરીના વચન આપીને યુવાનોને ફસાવતો હતો અને વિવિધ ફીઓના નામે પૈસા વસૂલતો હતો. તપાસમાં અન્ય પીડિતોના નિવેદનો રેકોર્ડ થયા છે, જેમાં મુંબઈમાં યોજાયેલા કથિત ઇન્ટરવ્યૂ અને મેડિકલ તપાસની વિગતો પણ સામે આવી છે.

પોલીસ હાલ આરોપીની પૂછપરછ કરી રહી છે અને અન્ય સંભવિત આરોપીઓની તલાશી લઈ રહી છે. આ મામલામાં ભારતીય દંડ સંહિતાની કલમ 420 (છેતરપિંડી) હેઠળ ગુનો નોંધાયો છે. ઉલ્લેખનિય છે કે, ગુજરાતમાં સરકારી કે અર્ધ-સરકારી નોકરીઓના નામે છેતરપિંડીના કિસ્સાઓ વારંવાર સામે આવે છે. તાજેતરમાં જૂનાગઢમાં વન વિભાગમાં આરએફઓ નોકરીના નામે 25 લાખની ઠગાઈનો પર્દાફાશ થયો હતો. જ્યાં ત્રણ આરોપીઓ ઝડપાયા હતા.

તેવી જ રીતે અમદાવાદ સાયબર ક્રાઈમ વિભાગે સરકારી નોકરીના નામે આંતરરાજ્ય રેકેટના મુખ્ય આરોપીને ઝારખંડથી પકડ્યો હતો. આવા કિસ્સાઓમાં યુવાનોને નકલી ઓફર લેટર્સ અને ઇન્ટરવ્યૂની લાલચ આપીને પૈસા વસૂલવામાં આવે છે. નવસારીના આ કિસ્સામાં પણ આ જ પેટર્ન જોવા મળે છે, જ્યાં નેવી જેવી પ્રતિષ્ઠિત સંસ્થાના નામે યુવાનોને ફસાવવામાં આવ્યા હતા. નિષ્ણાતોના મતે, નોકરીવાંછુકોને એડવાન્સ ફી કે પ્રોસેસિંગ ચાર્જની માંગણીથી તરત સાવધાન થવું જોઈએ, કારણ કે વિશ્વસનીય સંસ્થાઓ ક્યારેય આવી ફી માંગતી નથી.

આ પણ વાંચો- Women Empowerment :  મહિલા સશક્તીકરણની નવી પહેલ: ‘મંગલમ કેન્ટીન’