No Fuel For Old Vehicles: 1 જુલાઈથી આ વાહનોને પેટ્રોલ-ડીઝલ નહીં મળે, નો-ફ્યુઅલ નીતિ લાગુ થાય તે પહેલા હોબાળો

એસોસિએશનની માંગ શું છે?

દિલ્હી પેટ્રોલ ડીલર્સ એસોસિએશન (DPDA) એ સરકારને વિનંતી કરી કે જો તેઓ 'નો ફ્યુઅલ ફોર ઓલ્ડ વ્હીકલ' નીતિ લાગુ કરવામાં નિષ્ફળ જાય તો ફ્યુઅલ પંપ ડીલરો પર લાદવામાં આવેલી દંડાત્મક જોગવાઈઓ પાછી ખેંચી લેવામાં આવે. દિલ્હીના પરિવહન મંત્રી પંકજ સિંહ અને ટ્રાન્સપોર્ટ કમિશનરને લખેલા પત્રમાં, DPDA એ જણાવ્યું હતું કે નિયમમાં કહેવામાં આવ્યું છે કે "આવા અંતિમ જીવન (EOL) વાહનોના સંદર્ભમાં તાત્કાલિક કાનૂની કાર્યવાહી કરવી જોઈએ, જેમાં તેમને જપ્ત કરવા અને નિકાલ કરવાનો સમાવેશ થાય છે." તે જ સમયે, આ પત્રમાં એવું પણ કહેવામાં આવ્યું છે કે, "આવશ્યક ચીજવસ્તુ કાયદા હેઠળ, પેટ્રોલ પંપ ડીલરોને કોઈપણ ગ્રાહકને ઇંધણ આપવાનો ઇનકાર કરવાની મનાઈ છે. આ સ્થિતિમાં, જૂના વાહનોને પેટ્રોલ-ડીઝલ ન આપવા અને કાયદાના નિયમોનું પાલન કરવાના આદેશ પર સંઘર્ષની પરિસ્થિતિ ઊભી થાય છે."

પેટ્રોલ પંપ પર પૂરતા પ્રમાણમાં પોલીસ દળ તૈનાત કરવાની માંગ

DPDA એ એમ પણ કહ્યું હતું કે પેટ્રોલ પંપ એટેન્ડન્ટ અમલીકરણ અધિકારી તરીકે કાર્ય કરી શકતો નથી અને સરકારને આમ કરવામાં ઊભી થતી સમસ્યાઓ વિશે પણ માહિતગાર કર્યા હતા. તાજેતરની ઘટનાઓનો ઉલ્લેખ કરતા, પત્રમાં કહેવામાં આવ્યું છે કે, "તાજેતરમાં, ગાઝિયાબાદમાં 'નો હેલ્મેટ, નો ફ્યુઅલ' નીતિ લાગુ કરવા બદલ એક પંપ એટેન્ડન્ટને ગોળી મારી દેવામાં આવી હતી." હવે, સરકારની નવી નીતિ 'જૂના વાહનો માટે ઇંધણ નહીં' લાગુ કરતા પહેલા, એસોસિએશને પેટ્રોલ પંપ પર પૂરતા પ્રમાણમાં પોલીસ દળ તૈનાત કરવાની માંગ કરી છે. જેથી ભવિષ્યમાં આ નવી નીતિ લાગુ કરતી વખતે કોઈપણ પ્રકારની કટોકટી ટાળી શકાય.

કોઈ દંડાત્મક કાર્યવાહી નહીં:

DPDA એ તેના પત્રમાં જણાવ્યું હતું કે, "સરકારના નવા આદેશ મુજબ, નીતિનું પાલન ન કરવા બદલ ડીલરો અથવા પંપ એટેન્ડન્ટ્સની ધરપકડ સહિત દંડાત્મક કાર્યવાહીની જોગવાઈ વ્યવહારુ કે સ્વીકાર્ય નથી. આવા પગલાં માત્ર આવશ્યક સેવાઓને વિક્ષેપિત કરશે નહીં, પરંતુ આ યોજના પણ નિષ્ફળ જશે." DPDA એ વિભાગને પેટ્રોલ પંપ ડીલરો પર લાદવામાં આવેલી દંડાત્મક જોગવાઈઓ પર પુનર્વિચાર કરવા અને રદ કરવાની માંગ કરી છે. આ ઉપરાંત, એસોસિએશને એમ પણ કહ્યું છે કે કમિશન ફોર એર ક્વોલિટી મેનેજમેન્ટ (CAQM) દ્વારા આ બાબતે કોઈ SOP શેર કરવામાં આવ્યો નથી, તેથી નવી નીતિને યોગ્ય રીતે લાગુ કરવા માટે SOP પણ શેર કરવી જોઈએ.

આ પણ વાંચો: Rain in Surat: સુરતમાં ભારે વરસાદને કારણે જનજીવન પ્રભાવિત, ફાયર દ્વારા રેસ્ક્યુ હાથ ધરાયુ