olpad : કુડસદમાં પ્રદૂષણ સામે ગ્રામજનોનો હલ્લાબોલ: GPCBની નિષ્ક્રિયતાથી કંટાળી ગટર લાઈન જ કરી નાંખી બ્લોક

• olpad  : પીપોદરા-કન્યાસીનું કેમિકલયુક્ત પાણી ઘોડા ખાડીમાં છોડાતા રોષ : GPCB સામે રોષ
• રણછોડજી મંદિરની હનુમાનજીની મૂર્તિ કાળી પડી: કુડસદમાં પ્રદૂષણ વિરુદ્ધ ગ્રામજનોએ ગટર લાઈનમાં GSB પૂરી દીધું
• કેન્સર જેવા રોગો વધતા કુડસદમાં બળવો : GPCBની બેદરકારીથી કંટાળી ગ્રામજનોએ ગટર બ્લોક કરી
• ઝેરની ખાડી બની ઘોડા ખાડી: કુડસદ ગામજનોએ GIDC પ્રદૂષણ વિરુદ્ધ ગટર લાઈન બંધ કરી દીધી

olpadમાં GPCB સામે રોષ  : સુરત જિલ્લાના ઓલપાડ તાલુકાના કુડસદ ગામમાં ઔદ્યોગિક પ્રદૂષણ સામે ગ્રામજનોની ધીરજ આખરે તૂટી ગઈ છે. પીપોદરા અને કન્યાસી GIDCમાંથી બેફામ રીતે છોડાતા કેમિકલયુક્ત ઝેરી પાણીએ ગામમાંથી પસાર થતી ઘોડા ખાડીને “ઝેરની ખાડી”માં ફેરવી દીધી છે. વારંવારની રજૂઆતો છતાં ગુજરાત પ્રદૂષણ નિયંત્રણ બોર્ડ (GPCB) દ્વારા કોઈ નક્કર કાર્યવાહી ન થતા રોષે ભરાયેલા ગ્રામજનોએ આખરે કાયદો હાથમાં લઈ મુખ્ય ગટર લાઈનમાં GSB (માટી-પથ્થર) પૂરીને તેને સંપૂર્ણ બ્લોક કરી દીધી છે.

 ચોરીછૂપીથી કેમિકલયુક્ત પાણી છોડાતું

ગ્રામજનોના આક્ષેપ મુજબ, અંડરગ્રાઉન્ડ ગટર લાઈન મારફતે ચોરીછૂપીથી ખાડીમાં કેમિકલયુક્ત પાણી છોડવામાં આવતું હતું. GPCBના અધિકારીઓ સ્થળ પર આવીને માત્ર સેમ્પલ લઈ જતા હતા, પરંતુ કોઈ શિક્ષાત્મક કાર્યવાહી કરી નહોતી. આના પરિણામે ગામના લોકોમાં આક્રોશ વધ્યો અને તેઓએ મોટી સંખ્યામાં એકઠા થઈને ગટર લાઈન બંધ કરી દીધી. આ કાર્યવાહીથી ઉદ્યોગોનું પાણી બંધ થઈ જવાની સ્થિતિ સર્જાઈ છે.

ગામમાં વધી રહી છે ભયંકર બિમારીઓ

પ્રદૂષણની ગંભીરતા એટલી વધી ગઈ છે કે ગામના પ્રસિદ્ધ રણછોડજી મંદિરમાં આવેલી હનુમાનજીની મૂર્તિ પણ હવામાં રહેલા કેમિકલને કારણે કાળી પડી ગઈ છે. ઝેરી પાણી અને દૂષિત હવાને કારણે ગ્રામજનોને શ્વાસ લેવામાં તકલીફ પડી રહી છે અને ગામમાં કેન્સર જેવા જીવલેણ રોગોનું પ્રમાણ ચિંતાજનક રીતે વધ્યું છે. ગ્રામજનોએ ચીમકી ઉચ્ચારી છે કે જો હવે તંત્ર દ્વારા કાયમી ઉકેલ નહીં લાવવામાં આવે અને પ્રદૂષણ ફેલાવતા એકમો સામે કડક કાર્યવાહી નહીં થાય તો આગામી સમયમાં ઉગ્ર આંદોલન કરવામાં આવશે.

GPCB ની કામગીરીથી લોકોમાં નારાજગી

આ ઘટના સુરત જિલ્લાના ઔદ્યોગિક વિસ્તારોમાં પ્રદૂષણ અને તંત્રની નિષ્ક્રિયતાના મુદ્દાને ફરી ઉજાગર કરે છે. ગ્રામજનોની આ કાર્યવાહી દર્શાવે છે કે જ્યારે તંત્ર નિષ્ક્રિય રહે છે ત્યારે લોકોને જાતે જ મોરચો માંડવો પડે છે. હવે જોવાનું રહ્યું કે GPCB અને સ્થાનિક વહીવટ આ મુદ્દે તાત્કાલિક કાર્યવાહી કરે છે કે ગ્રામજનોનો આંદોલન વધુ તીવ્ર બને છે.

આ પણ વાંચો-Rajkot :  એકતરફા પ્રેમમાં પાગલ યુવકે કર્યું યુવતીની માતા-ભાઈનું અપહરણ

અહેવાલ- ઉદય જાદવ, સુરત