એક જ દિવસમાં સ્થળ તપાસ બતાવીને બીયું પરમિશન અપાઈ!
ધારાસભ્યએ આક્ષેપ કર્યો છે કે, જે ચીફ ઓફિસર પોતે સ્થળ નિરીક્ષણના લેટર પર સહી કરે છે, એ જ ચીફ ઓફિસર વિવાદ થતાં આર્કિટેક્ટ પર દોષનો ટોપલો ઢોળી રહ્યા છે. ધારાસભ્ય કિરીટ પટેલે ચીફ ઓફિસરની સરખામણી કાચંડા સાથે કરીને પાટણના રાજકારણમાં ગરમાવો લાવી દીધો છે.
એક તરફ ચીફ ઓફિસર પોતે સ્થળ તપાસની સ્પષ્ટતા વાળા લેટર પર સહી કરે છે, અને વિવાદ થતાં જ કાચંડાની જેમ રંગ બદલીને આર્કિટેક્ટનું લાયસન્સ રદ કરી દે છે. આ BU પરમિશન આપવા પાછળ ગાંધીનગરમાં ધારાસભ્યનો આક્ષેપ મુદ્દે પૂછવામાં આવ્યું કે, બસ સ્ટેશનમાં નિયમોનું ઉલ્લંઘન કરીને, માત્ર એક જ દિવસમાં સ્થળ તપાસ બતાવીને BU પરમિશન આપી દેવાઈ.
પણ ખોટા આક્ષેપો સહન નહીં કરું : ધારાસભ્ય કિરીટ પટેલ
ત્યારે તેમને કહ્યું કે કલેક્ટરે જ્યારે આ મુદ્દે પોલીસ અને તંત્ર પાસે જવાબ માંગ્યો, ત્યારે ચીફ ઓફિસરના પગ નીચે રેલો આવ્યો છે. જો કે, આ ગંભીર આક્ષેપો સામે ચીફ ઓફિસર હિરલ ઠાકરે પણ મીડિયા સમક્ષ આવીને ધારાસભ્યના આક્ષેપોને સદંતર નકારી કાઢ્યા છે અને તેને માત્ર 'વાણી વિલાસ' ગણાવ્યો છે.
ધારાસભ્ય બિલકુલ જુઠાણા ભર્યા આક્ષેપ લગાવે છે. જેને કમળો હોય એને પીળું જ દેખાય! ગાંધીનગર મારું ઘર છે, એટલે તેઓ આવા બદનક્ષીકારક આક્ષેપો ન કરી શકે. જો તેઓ આ પ્રકારનો વાણી વિલાસ ચાલુ રાખશે, તો હું સો ટકા એમની સામે બદનક્ષીનો દાવો કરીશ. ધારાસભ્ય પુરાવા રજૂ કરે, નહીં તો કોર્ટ માં એવો દાખલો બેસાડીશ કે યાદ રાખશે. મને પૈસાની પડી નથી, પણ ખોટા આક્ષેપો સહન નહીં કરું.
ધારાસભ્ય અને ચીફ ઓફિસર આમને-સામને
ચીફ ઓફિસર હિરલ ઠાકરના જણાવ્યા અનુસાર, ડેપો મેનેજરની રજૂઆતને પગલે માત્ર બસ સ્ટેશન વહેલું ચાલુ થાય એવા 'ગુડ ફેથ' એટલે કે શુદ્ધ આશયથી આ પરમિશન અપાઈ હતી. પરંતુ આ પ્રક્રિયામાં ઓનલાઈન સિસ્ટમમાં આર્કિટેક્ટે ગેરરીતિ આચરી હોવાનું સામે આવતા તેનું લાયસન્સ રદ કરાયું છે.
ચોંકાવનારી વાત એ છે કે, આ કેસમાં પાલિકાના નિવૃત્ત સર્વેયરનો દીકરો જ આર્કિટેક્ટ હતો, એટલે કે અહીં 'ઘરના ભુવા અને ઘરના ડાકલા' જેવો ઘાટ સર્જાયો હતો. પાલિકાના જે કર્મચારી સર્વેયર છે, જે હવે રિટાયર્ડ થઈ ગયા, એનો જ દીકરો આર્કિટેક્ટ હતો. આ તો ઘરના ભુવા ને ઘરના ડાકલા જેવો ઘાટ હતો. અમારી પાસે આટલા કામો વચ્ચે અમે ગુડ ફેથમાં નિર્ણય લીધો હતો. પણ જ્યારે ખબર પડી કે ચાર માળનું ખોટું બીયુ માંગ્યું છે, ત્યારે મેં તાત્કાલિક એજન્સીની પરમિશન રદ કરી કાયદેસરની કાર્યવાહી કરી છે.
કલેકટર ભરશે પગલા !
તો પાટણના નવા બસ પોર્ટની BU પરમિશનનો મામલો હવે માત્ર વહીવટી વિવાદ નથી રહ્યો, પરંતુ હાઈપ્રોફાઈલ કાનૂની અને રાજકીય જંગ તરફ આગળ વધી રહ્યો છે. એક તરફ ધારાસભ્ય ભ્રષ્ટાચાર અને કરોડોના હવાલાના આક્ષેપ સાથે ચીફ ઓફિસરને મુખ્ય આરોપી ગણાવી રહ્યા છે, તો બીજી તરફ મહિલા ચીફ ઓફિસરે ધારાસભ્યને પુરાવા આપવા અથવા બદનક્ષીના દાવા માટે કોર્ટના પગથિયાં ચડવા ખુલ્લો પડકાર ફેંક્યો છે. હવે જોવાનું એ રહેશે કે કલેક્ટર આ મામલે કેવા પગલાં ભરે છે અને આ લડાઈ કયું નવું વળાંક લે છે.
આ પણ વાંચો : World Yoga Day 2026 Jamnagar : શિક્ષણ મંત્રી રિવાબા જાડેજાએ પોલીસ હેડક્વાર્ટર ખાતે નાગરિકો સાથે કર્યો યોગાભ્યાસ
