Patan: રાધનપુરમાં નશાના કાળા કારોબારનો પર્દાફાશ, 4.84 લાખના ગાંજા સાથે બે શખ્સો ઝડપાયા

કેવી રીતે પકડાયા આરોપી?

પોલીસ સૂત્રો દ્વારા મળતી માહિતી મુજબ, આ નશાનો કાળો કારોબાર બનાસકાંઠાના દાંતા વિસ્તારથી રાધનપુર સુધી ફેલાયેલો હતો. આરોપીઓ દાંતાથી ગાંજાનો જથ્થો મંગાવીને રાધનપુરના વિસ્તારોમાં તેનું છૂટક વેચાણ કરવાના ઈરાદામાં હતા. જોકે, પાટણ પોલીસની બાજ નજરથી તેઓ બચી શક્યા નહીં. પોલીસે તપાસ કરતા આનંદ ઠાકોર અને કોદરવી લાધાભાઇ નામના બે ઈસમો પાસેથી 9.690 કિલોગ્રામ સૂકો ગાંજો કબજે કર્યો છે. આ જપ્ત કરાયેલા ગાંજાની બજાર કિંમત અંદાજે 4,84,500 રૂપિયા આંકવામાં આવી છે.

Patan: આરોપીઓ 5 દિવસના રિમાન્ડ પર

પકડાયેલા બંને આરોપીઓને પોલીસે તાત્કાલિક અસરથી કાયદાકીય કસ્ટડીમાં લઈને કોર્ટમાં રજૂ કર્યા હતા. કોર્ટે બંને આરોપીઓને 5 દિવસના પોલીસ રિમાન્ડ પર મોકલી આપ્યા છે. હવે પોલીસ આ રિમાન્ડ દરમિયાન એ જાણવાનો પ્રયત્ન કરશે કે આ ગાંજો તેઓ કોની પાસેથી લાવ્યા હતા અને તેમની પાછળ અન્ય કયા મોટા માથાઓનો હાથ છે. રાધનપુર પોલીસ આ સમગ્ર નેટવર્કને તોડવા માટે વધુ તપાસ કરી રહી છે. આ ઓપરેશન પાટણ પોલીસની સતર્કતા અને નશામુક્ત ગુજરાતના સંકલ્પને મજબૂત બનાવે છે.

આ પણ વાંચો: Bengaluru: અદાણી ગ્રુપની પહેલથી યુવા વૈજ્ઞાનિકોને નવી ઉડાન, 32 વિદ્યાર્થીઓને અદ્યતન સંશોધનની મળી તક