PM Modi Mann ki baat: પૂર અને વરસાદને કારણે ભારે નુકસાન, દરેક પીડિતનું દુઃખ આપણું દુઃખ

• આપદાના સમયે સેના પણ બચાવકાર્યમાં જોડાઈઃ PM મોદી
• પૂર અને તબાહી વચ્ચે જમ્મુ કાશ્મીરે ઉપલબ્ધિઓ મેળવી
• જમ્મુ કાશ્મીરના પુલવામામાં ડે-નાઈટ મેચ રમાઈ

PM Modi એ રવિવારે સવારે 11 વાગ્યે તેમના રેડિયો કાર્યક્રમ 'મન કી બાત'ના 125મા એપિસોડમાં રાષ્ટ્રને સંબોધન કર્યું છે. આ દરમિયાન પીએમ મોદીએ કહ્યું, "આ ચોમાસાની ઋતુમાં, કુદરતી આફતો દેશની કસોટી કરી રહી છે. છેલ્લા કેટલાક અઠવાડિયામાં, આપણે પૂર અને ભૂસ્ખલનને કારણે ભારે વિનાશ જોયો છે. ઘરો નાશ પામ્યા, ખેતરો ડૂબી ગયા. પાણીના સતત વધતા દબાણથી પુલ અને રસ્તાઓ વહી ગયા અને લોકોના જીવ જોખમમાં મુકાયા. આ ઘટનાઓએ દરેક ભારતીયને દુઃખ પહોંચાડ્યું છે. જે પરિવારોએ પોતાના પ્રિયજનો ગુમાવ્યા છે તેમની પીડા આપણા બધાની પીડા છે."

હેલિકોપ્ટર દ્વારા રાહત સામગ્રી પહોંચાડવામાં આવી હતી

વડાપ્રધાન મોદીએ આપત્તિ દરમિયાન રાહત અને બચાવ કામગીરીમાં રોકાયેલા સેના, SDRF અને NDRF સહિત તમામ બચાવ ટીમોની પ્રશંસા કરી. તેમણે કહ્યું કે જ્યાં પણ કટોકટી આવી, ત્યાં અમારા NDRF-SDRFના જવાનો અને અન્ય સુરક્ષા દળોએ ત્યાં લોકોને બચાવવા માટે દિવસ-રાત કામ કર્યું. સૈનિકોએ પણ ટેકનોલોજીનો સહારો લીધો છે. દેખરેખ માટે થર્મલ કેમેરા, લાઈવ ડિટેક્ટર અને સ્નિફર ડોગ્સ સાથે ડ્રોનનો ઉપયોગ કરવામાં આવ્યો હતો. આવા ઘણા આધુનિક સંસાધનોની મદદથી, રાહત કાર્યને ઝડપી બનાવવા માટે દરેક શક્ય પ્રયાસો કરવામાં આવ્યા હતા. હેલિકોપ્ટર દ્વારા રાહત સામગ્રી પહોંચાડવામાં આવી હતી, અને ઘાયલોને એરલિફ્ટ કરવામાં આવ્યા હતા.

"સેના મદદ માટે આગળ આવી"

કાર્યક્રમને સંબોધતા, પીએમ મોદીએ વધુમાં કહ્યું, "આપત્તિના સમયે સેના મદદ માટે આગળ આવી. સ્થાનિક લોકો, સામાજિક કાર્યકરો, ડોકટરો અને વહીવટીતંત્ર, દરેકે આ કટોકટીના સમયમાં શક્ય તેટલા બધા પ્રયાસો કર્યા." આ દરમિયાન, પ્રધાનમંત્રીએ દરેક નાગરિકનો હૃદયથી આભાર માન્યો, જેમણે આપત્તિના સમયે માનવતાને દરેક વસ્તુથી ઉપર રાખી. પ્રધાનમંત્રી મોદીએ કહ્યું, "પૂર અને વરસાદથી થયેલા આ વિનાશ વચ્ચે, જમ્મુ અને કાશ્મીરે પણ બે ખૂબ જ ખાસ સિદ્ધિઓ હાંસલ કરી છે. ઘણા લોકોએ આની નોંધ લીધી નથી. પરંતુ તમને આ સિદ્ધિઓ વિશે જાણીને આનંદ થશે. પુલવામાના એક સ્ટેડિયમમાં રેકોર્ડ સંખ્યામાં લોકો એકઠા થયા હતા. પુલવામાની પહેલી ડે-નાઈટ ક્રિકેટ મેચ અહીં રમાઈ હતી. પહેલા આ અશક્ય હતું, પરંતુ હવે મારો દેશ બદલાઈ રહ્યો છે. આ મેચ 'રોયલ પ્રીમિયર લીગ'નો ભાગ છે, જેમાં જમ્મુ અને કાશ્મીરની વિવિધ ટીમો ભાગ લઈ રહી છે."

"જળ રમતોને વધુ લોકપ્રિય બનાવવી"

"ધ્યાન ખેંચનારી બીજી ઘટના દેશનો પ્રથમ 'ખેલો ઇન્ડિયા વોટર સ્પોર્ટ્સ ફેસ્ટિવલ' હતો અને તે પણ શ્રીનગરના દાલ તળાવ ખાતે યોજાઈ હતી. ખરેખર, આવા ઉત્સવનું આયોજન કરવા માટે તે એક ખાસ સ્થળ છે. તેનો ઉદ્દેશ્ય જમ્મુ અને કાશ્મીરમાં જળ રમતોને વધુ લોકપ્રિય બનાવવાનો છે. સમગ્ર ભારતમાંથી 800 થી વધુ ખેલાડીઓએ તેમાં ભાગ લીધો હતો. મહિલા ખેલાડીઓ પણ પાછળ ન હતા, તેમની ભાગીદારી લગભગ પુરુષો જેટલી જ હતી. હું બધા સહભાગીઓને અભિનંદન આપવા માંગુ છું. મધ્યપ્રદેશને ખાસ અભિનંદન, જેણે સૌથી વધુ મેડલ જીત્યા, ત્યારબાદ હરિયાણા અને ઓડિશાનો ક્રમ આવે છે."

આ પણ વાંચો: PM Modi SCO Summit China: ભારત અને ચીન વચ્ચેના સહયોગથી 2.8 અબજ લોકોને ફાયદો થશે