Pune Nasarpur Case : મહારાષ્ટ્રના પુણેથી એક મોટા સમાચાર આવ્યા છે. ત્રણ વર્ષની માસૂમ બાળકી પર બળાત્કાર આચરી નિર્મમ હત્યા કરનારા 65 વર્ષીય નરાધમ વૃદ્ધને સ્પેશિયલ કોર્ટે ફાંસીની સજા ફટકારી છે. પુણે જિલ્લાના નસરાપુર ગામમાં આ ગોઝારી ઘટના બની હતી. કોર્ટે આરોપીના દુષ્ટ ઇરાદાને ધ્યાનમાં લેતા આ ગુનાને ખૂબ જ ગંભીર ગણાવ્યો હતો અને મૃત્યુદંડની સજા ફટકારી છે.
નાસ્તો આપવાના બહાને બાળકીને લઈ જઈ દુષ્કર્મ આચરી હત્યા કરી
માહિતી અનુસાર, ગત 1 મે, 2026 ના રોજ આ ઘટના બની હતી. આરોપી ભીમરાવ કાંબલે ત્રણ વર્ષની બાળકીને નાસ્તો આપવા બહાને ફોસલાવીને પોતાની સાથે ઢોરના વાડા પાસેના શેડમાં લઈ ગયો હતો, જ્યાં તેણે માસૂમ પર બળાત્કાર ગુજાર્યો હતો અને ત્યારબાદ તેણીની હત્યા કરી હતી. આ ઘટનાથી સમગ્ર મહારાષ્ટ્રમાં ભારે આક્રોશ ફેલાયો હતો. વિરોધમાં લોકો રસ્તા પર ઉતરી આવ્યા હતા. કેસની ગંભીરતાને ધ્યાનમાં રાખીને, તેનો કેસ ફાસ્ટ-ટ્રેક કોર્ટમાં ચલાવવામાં આવ્યો હતો. નોંધનીય છે કે, ઘટનાના માત્ર 8 દિવસમાં જ કોર્ટે આરોપીને અપહરણ, બળાત્કાર અને હત્યા સહિતના તમામ આરોપો અને પોક્સો એક્ટની વિવિધ કલમો હેઠળ દોષિત ઠેરવ્યો હતો. જ્યારે, આજે, 29 જૂનના રોજ આરોપીને ફાંસીની સજા ફટકારવામાં આવી છે.
છોકરીનાં શરીર પર 18 ઈજાના નિશાન, 82 સાક્ષીઓએ જુબાની આપી!
સરકારી વકીલે જણાવ્યું હતું કે, પોસ્ટમોર્ટમ રિપોર્ટમાં છોકરીના શરીર પર 18 ઈજાના નિશાન જોવા મળ્યા હતા. આરોપીનો ડીએનએ પણ છોકરીના શરીર પર મળી આવ્યો હતો. કોર્ટનો ચુકાદો સીસીટીવી ફૂટેજ, ડીએનએ વિશ્લેષણ અને તબીબી પુરાવા પર આધારિત હતો. કેસમાં કુલ 82 સાક્ષીઓએ જુબાની આપી હતી.
આ પણ વાંચો - Noida Fire News : નોઈડામાં એકવાર ફરી AC માં થયો ભયંકર બ્લાસ્ટ! બહુમાળી ઇમારતમાં ભીષણ આગ
આ પણ વાંચો -Assam Arunachal Pradesh Flood : પૂર્વોત્તરમાં કુદરતનો પ્રકોપ! પૂરમાં વહી ગયો 300 મીટર લાંબો લોખંડનો પુલ, જૂઓ વીડિયો
