રાજકોટના કાલાવડ રોડ પર એકલા રહેતા અને જેના પુત્ર દુબઈમાં નોકરી કરે છે તેવા કુસુમબેન પ્રદીપભાઈ ટાંકે 2024 માં ફેસબુક પર વજન ઘટાડવાની એક જાહેરાત જોઈ હતી. તેમાં આપેલી લિંક ઓપન કરીને ફોર્મ ભર્યા બાદ તેમને 'ડો. અમન મિશ્રા' તરીકે ઓળખ આપનાર વ્યક્તિનો ફોન આવ્યો હતો
ઓનલાઈન શોપિંગ કે દવા મંગાવતી વખતે રહેજો એલર્ટ
દવાના માત્ર 4000 રૂપિયા નક્કી થયા હતા પરંતુ આ શરૂઆત હતી, ત્યારબાદ ગઠિયાઓએ દવા અસરો ન દેખાવાના બહાને હેવી ડોઝના નામે અને નકલી બિલ મોકલીને ખંડણી જેવું વાતાવરણ સર્જ્યું હતું.
આ કેસમાં હદ તો ત્યારે થઈ જ્યારે એક શખ્સે પોતાની ઓળખ રિઝર્વ બેંક ઓફ ઇન્ડિયા (RBI) ના અધિકારી 'હર્ષવર્ધન' તરીકે આપીને વૃદ્ધાને કાનૂની કાર્યવાહીનો ડ્રાય આપીને બ્લેકમેલ કરવાનું શરૂ કર્યું હતું. ડરના મારે વૃદ્ધાએ જુદા જુદા ખાતામાં લાખો રૂપિયા ટ્રાન્સફર કરી દીધા હતા.
62 વર્ષના વૃદ્ધા સાથે લાખો રૂપિયાની છેતરપિંડી
પોલીસે તપાસ કરતા ખુલ્યું કે આરબીઆઈ અધિકારી તરીકે ઓળખ આપનાર શખ્સનું સાચું નામ મહમદ અલતમ્સ અલી છે, જે દિલ્હીનો રહેવાસી છે. પોલીસે તેને ઝડપી પાડીને તેના બેંક ખાતાઓમાંથી 26 લાખ રૂપિયા ફ્રીઝ કરી રિકવર કર્યા છે. રાજકોટ ડીસીપી ક્રાઇમ જગદીશ બાંગરવાએ જણાવ્યું હતું કે, આરોપી અન્ય લોકો પાસેથી દવાઓ ખરીદીને ઓનલાઈન પ્લેટફોર્મ પર ખોટી જાહેરાતો થકી આ રેકેટ ચલાવતો હતો.
પોલીસ હાલ આરોપીના રિમાન્ડ મેળવીને આ નેટવર્કમાં સામેલ અન્ય સાગરિતો અને અન્ય કેટલા લોકો સાથે આ પ્રકારે છેતરપિંડી થઈ છે તે દિશામાં સઘન તપાસ ચલાવી રહી છે. આ ઘટનાએ ઓનલાઈન ટ્રાન્ઝેક્શન અને સોશિયલ મીડિયાના ઉપયોગ સામે મોટી ચેતવણી આપી છે.
આ પણ વાંચો : Gujarat Police માં DGP કમેન્ડેશન ડિસ્ક વધારીને 148 કરાઈ, હવે તમામ યુનિટ્સની કામગીરીનું થશે સન્માન
