અયોધ્યા રામ મંદિરમાં દાનપાત્રની રકમમાં ગેરરીતિનો મામલો સામે આવતા ખળભળાટ મચી ગયો છે. યુપી સરકારે આ ગંભીર કૌભાંડની તપાસ માટે SIT ની રચના કરી છે. એક આરોપીની ધરપકડ બાદ તેના ઘરેથી છાણમાં છુપાયેલી 10 લાખની રોકડ મળી આવી છે. દાન ગણતરીની સમગ્ર પ્રક્રિયા તપાસ હેઠળ છે, જેના પગલે હવે અનેક કર્મચારીઓની મુશ્કેલી વધી શકે છે.
Ram Mandir Donation Scam: રામ મંદિરમાં ભક્તો દ્વારા ચઢાવવામાં આવેલા ચઢાવાની ઉચાપતની તપાસ તેજ બની છે. સ્પેશિયલ ઓપરેશન ગ્રુપ (SOG) એ એકની અટકાયત કરી છે અને તેની પૂછપરછ શરૂ કરી છે. તપાસ એજન્સીઓ CCTV ફૂટેજ, જપ્ત કરાયેલી રોકડ રકમ અને ટેકનિકલ પુરાવાઓના આધારે આ મામલાની સત્યતા ઉજાગર કરવાનો પ્રયાસ કરી રહી છે. રુદૌલીના મીનાપુર ફગૌલી ગામનો રહેવાસી લવ કુશ મિશ્ર (Lav Kush Mishra) હાલમાં તપાસ એજન્સીઓની કસ્ટડીમાં છે. આ મામલાની ચોંકાવનારી વિગત એ છે કે, આરોપીના ઘરેથી 10 લાખ રૂપિયાની રોકડ રકમ મળી આવી છે, જે તેણે છાણના ઢગલામાં છુપાવીને રાખી હતી. આટલી મોટી રકમ છાણમાંથી મળી આવતા તંત્ર પણ સ્તબ્ધ છે.
SIT નું ગઠન અને તપાસની પ્રક્રિયા
શ્રી રામ જન્મભૂમિ તીર્થ ક્ષેત્ર ટ્રસ્ટ (Shri Ram Janmabhoomi Teerth Kshetra Trust) ની વિનંતીને ધ્યાનમાં રાખીને ઉત્તર પ્રદેશ શાસન દ્વારા એક વિશેષ તપાસ ટીમ (Special Investigation Team - SIT) ની રચના કરવામાં આવી છે. લખનૌના કમિશનર વિજય વિશ્વાસ પંત (Vijay Vishwas Pant) ની અધ્યક્ષતામાં બનેલી આ ટીમમાં આઈપીએસ કિરણ એસ. (IPS Kiran S) અને વિશેષ સચિવ (નાણાં) નીલ રતન (Neel Ratan) સામેલ છે. SIT ને ૧૫ દિવસમાં અંતિમ રિપોર્ટ સોંપવાનો આદેશ આપવામાં આવ્યો છે.
મંદિર પરિસરના CCTV ની તપાસ
તપાસ એજન્સીઓ હાલ મંદિર પરિસરના સીસીટીવી ફૂટેજ (CCTV Footage) અને દાન ગણતરી સાથે જોડાયેલા કર્મચારીઓના રેકોર્ડ્સને ઝીણવટભરી રીતે તપાસી રહી છે. અધિકારીઓનું માનવું છે કે આ કોઈ એક વ્યક્તિનું કામ નથી, પરંતુ આખી પ્રક્રિયામાં ગેરરીતિ થઈ હોવાની શક્યતા છે. દરમિયાન, મંદિર નિર્માણ સમિતિના અધ્યક્ષ નૃપેન્દ્ર મિશ્રા (Nripendra Mishra) એ પણ અયોધ્યા પહોંચીને સ્થિતિનો તાગ મેળવ્યો છે, જોકે તેમણે નિર્માણકાર્ય પર જ ધ્યાન કેન્દ્રિત કર્યું છે અને વિવાદ અંગે ટિપ્પણી કરવાનું ટાળ્યું છે. મંત્રી સૂર્ય પ્રતાપ શાહી (Surya Pratap Shahi) એ ખાતરી આપી છે કે ભક્તોની આસ્થા સાથે કોઈ રમત રમવા દેવામાં આવશે નહીં.
આ પણ વાંચો: Ram Mandir Donation: રામ મંદિર દાન ચોરી મામલે ટ્રસ્ટ એલર્ટ, CM યોગી પાસે SIT તપાસની માંગ
