Cricket News : ચેમ્પિયન્સ ટ્રોફીમાં પાકિસ્તાન ટીમ બધા પર પડશે ભારે... ભારતીય દિગ્ગજ રવિ શાસ્ત્રીની આગાહી

• પાકિસ્તાન ICC ચેમ્પિયન્સ ટ્રોફી ક્રિકેટ ટુર્નામેન્ટમાં મજબૂત પ્રદર્શન કરી શકે છે
• અયુબ ઈજાને કારણે આ ટુર્નામેન્ટમાં રમી શકશે નહીં
• છેલ્લા 6 થી 8 મહિનામાં મર્યાદિત ઓવરના ક્રિકેટમાં શાનદાર પ્રદર્શન કર્યું : રવિ શાસ્ત્રી

Cricket News :  ખતરનાક ફાસ્ટ બોલિંગ અને ઘરઆંગણે રમાતી ક્રિકેટ સાથે, યજમાન પાકિસ્તાન ICC ચેમ્પિયન્સ ટ્રોફી ક્રિકેટ ટુર્નામેન્ટમાં મજબૂત પ્રદર્શન કરી શકે છે, ભલે તેમને ઓપનર સેમ અયુબની ખોટ સાલશે. ભારતના ભૂતપૂર્વ કોચ રવિ શાસ્ત્રી પણ એવું જ માને છે. ડિફેન્ડિંગ ચેમ્પિયન પાકિસ્તાને તાજેતરમાં દક્ષિણ આફ્રિકા, ઝિમ્બાબ્વે અને ઓસ્ટ્રેલિયા સામે સતત ત્રણ ODI શ્રેણી જીતી છે અને તે આત્મવિશ્વાસથી ભરપૂર ચેમ્પિયન્સ ટ્રોફીમાં એન્ટ્રી કરશે. શાસ્ત્રીએ ICC સમીક્ષામાં કહ્યું, 'મારું માનવું છે કે પાકિસ્તાન એક એવી ટીમ છે જેણે છેલ્લા 6 થી 8 મહિનામાં મર્યાદિત ઓવરના ક્રિકેટમાં શાનદાર પ્રદર્શન કર્યું છે, ખાસ કરીને દક્ષિણ આફ્રિકામાં તેનું પ્રદર્શન શાનદાર રહ્યું.'

અયુબ ઈજાને કારણે આ ટુર્નામેન્ટમાં રમી શકશે નહીં

પાકિસ્તાન ટીમનો મહત્વપૂર્ણ ખેલાડી અયુબ ઈજાને કારણે આ ટુર્નામેન્ટમાં રમી શકશે નહીં, પરંતુ શાસ્ત્રી માને છે કે તેમ છતાં તેમની ટીમમાં ઘણા સારા ખેલાડીઓ છે. તેમણે કહ્યું, 'તેઓ ટોપ ઓર્ડરમાં અયુબની ખોટ સાલશે કારણ કે તે એક મહત્વપૂર્ણ ખેલાડી છે, પરંતુ પાકિસ્તાન ટીમ ઘરઆંગણે એક ખતરનાક ટીમ છે.' મારું માનવું છે કે તેણે સેમિફાઇનલ માટે ક્વોલિફાય થવું જોઈએ. આ પછી કોઈપણ ટીમ જીતી શકે છે. ભૂતપૂર્વ ઓસ્ટ્રેલિયન કેપ્ટન રિકી પોન્ટિંગ શાસ્ત્રી સાથે સંમત થયા અને પાકિસ્તાનની ફાસ્ટ બોલિંગનો ઉલ્લેખ કર્યો, જેમાં શાહીન આફ્રિદી, નસીમ શાહ, હરિસ રૌફ, મોહમ્મદ હસનૈનનો સમાવેશ થાય છે.

23 ફેબ્રુઆરીએ દુબઈમાં ભારતનો સામનો કરશે

રિકી પોન્ટિંગે કહ્યું, 'હું રવિ સાથે સંપૂર્ણપણે સંમત છું.' અયુબ એક શાનદાર ખેલાડી છે અને તેની ખાલી જગ્યા ભરવી મુશ્કેલ હશે, પરંતુ પાકિસ્તાનની ફાસ્ટ બોલિંગ ખૂબ જ સારી છે. શાહીન આફ્રિદી અને નસીમ શાહની આગેવાની હેઠળના તેના ઝડપી બોલરોએ તાજેતરના સમયમાં સારું પ્રદર્શન કર્યું છે. તેની પાસે એવી ગતિ અને કૌશલ્ય છે કે તે કોઈપણ બેટિંગ લાઇનઅપને મુશ્કેલીમાં મૂકી શકે છે.'' પાકિસ્તાન ચેમ્પિયન્સ ટ્રોફીમાં પોતાની પહેલી મેચ 19 ફેબ્રુઆરીએ કરાચીમાં ન્યુઝીલેન્ડ સામે રમશે. આ પછી, તે 23 ફેબ્રુઆરીએ દુબઈમાં ભારતનો સામનો કરશે.

આ પણ વાંચો: INDvsENG Playing 11: ભારત સામે નાગપુર ODI માટે ઇંગ્લેન્ડની પ્લેઇંગ 11 ટીમની જાહેરાત