Surat : વરાછામાં ગર્ભ પરીક્ષણનો ગોરખધંધો : ડોક્ટર સહિત ત્રણ આરોપી ઝડપાયા, એક યુવતી વોન્ટેડ

આરોગ્ય વિભાગને મળેલી બાતમીના આધારે વરાછા વિસ્તારમાં આવેલી શિવાય હોસ્પિટલ પર નજર રાખવામાં આવી હતી. હોસ્પિટલમાં ગર્ભવતી મહિલાઓને ગેરકાયદે સેક્સ ડિટર્મિનેશન ટેસ્ટ કરવામાં આવતા હોવાની શંકા હતી. આજે રેડ દરમિયાન આરોગ્ય વિભાગની ટીમે હોસ્પિટલની તપાસ કરી, જ્યાંથી અનરજિસ્ટર્ડ અલ્ટ્રાસાઉન્ડ મશીન અને અન્ય સામગ્રી મળી આવી હતી. આ કાર્યવાહીમાં વરાછા પોલીસ સ્ટેશનની ટીમ પણ સામેલ હતી.

આરોગ્ય વિભાગે તુરંત વરાછા પોલીસ સ્ટેશન ખાતે ફરિયાદ નોંધાવી છે, જેના પર પોલીસે ગુનો નોંધી તપાસ શરૂ કરી હતી. તપાસ દરમિયાન ત્રણ આરોપીઓને ધરપકડ કરવામાં આવી તેમાં મુખ્ય આરોપી તરીકે એક ડોક્ટર, ફાર્માસિસ્ટ અને અન્ય સહયોગીનો સમાવેશ થાય છે. આ ત્રણેયને પોલીસ કસ્ટડીમાં લેવામાં આવ્યા છે અને વધુ તપાસ ચાલી રહી છે. એક યુવતી આરોપીને ફરાર હોવાનું જાહેર કરી વોન્ટેડ નોટિસ જારી કરવામાં આવી છે, તેને પકડી પાડવા માટે ચક્રો ગતિમાન કર્યા છે.

આ ઘટના સુરત જેવા મહાનગરમાં આરોગ્ય ક્ષેત્રે ચાલતા અનૈતિક કારોબારો પર પ્રકાશ પાડે છે. આરોગ્ય વિભાગના અધિકારીએ જણાવ્યું, "આવા ગેરકાયદે કારોબારો ભ્રૂણ હત્યાને વધારે છે અને સમાજના મૂળભૂત મૂલ્યોને ઠેસ પહોંચાડે છે. અમે આવી કાર્યવાહીને વધુ કડક બનાવીશું." પોલીસ અધિકારીઓ અનુસાર, આરોપીઓ પાસેથી મળેલા પુરાવા દર્શાવે છે કે આ કારોબાર છેલ્લા કેટલાક મહિનાથી ચાલતો હતો, જેમાં અનેક મહિલાઓ સામેલ હોવાની શંકા છે.

આ પણ વાંચો-Gujarat Farmers Relief Package : મુખ્યમંત્રી ભૂપેન્દ્રભાઇ પટેલે બોલાવી અગત્યની બેઠક