Surendranagar જિલ્લાના તમામ તાલુકાઓમાં જમીન દફતર કચેરીઓ કાર્યરત કરાઈ

મામલતદાર કચેરી ખાતે જ આ કચેરીઓ કાર્યરત કરવામાં આવી છે

આ નવી વ્યવસ્થા અંતર્ગત સુરેન્દ્રનગર જિલ્લાના તમામ અરજદારો અને ખેડૂતોની સુવિધા માટે વિવિધ તાલુકાઓમાં નવી કચેરીઓ કાર્યરત કરવામાં આવી છે. જે અંતર્ગત વઢવાણ તાલુકા અને સુરેન્દ્રનગર શહેર વિસ્તારના નાગરિકો માટે સુરેન્દ્રનગરમાં ટીવી રિલે કેન્દ્ર સામે આવેલ 'સરવે ભવન' ખાતે નવી ઓફિસ કાર્યરત કરવામાં આવી છે.

આ ઉપરાંત, લખતર, સાયલા, ચુડા અને મૂળી તાલુકાના પ્રજાજનો માટે સંબંધિત મામલતદાર કચેરી ખાતે જ આ કચેરીઓ કાર્યરત કરવામાં આવી છે.

રાજ્ય સરકારના પારદર્શક અને ઝડપી વહીવટના અભિગમને સાર્થક કરે છે

જ્યારે લીંબડી અને પાટડી-દસાડા તાલુકા માટે જે-તે તાલુકા સેવા સદન ખાતે બીજા માળે જમીન દફતર નિરીક્ષકની કચેરીઓ ઉપલબ્ધ કરાવવામાં આવી છે. આ જ રીતે, ચોટીલા અને થાનગઢ તાલુકાના નાગરિકો માટે તાલુકા સેવા સદનના પ્રથમ માળે તેમજ ધ્રાંગધ્રા તાલુકામાં તાલુકા સેવા સદન ગ્રાઉન્ડ ફ્લોર ખાતે આ કચેરીઓ કાર્યરત કરવામાં આવી છે.

સરકારના મહેસૂલ વિભાગના આ નિર્ણયથી સામાન્ય જનતાને ખૂબ મોટી રાહત મળશે. અગાઉ લોકોને જમીન દફતરને લગતા કામકાજ માટે છેક જિલ્લા કક્ષાની કચેરીએ ધક્કા ખાવા પડતા હતા. પરંતુ હવે આ કામગીરીનું વિકેન્દ્રીકરણ થવાથી નાગરિકોને તેમના રહેઠાણથી નજીક, પોતાના જ તાલુકામાં આ સેવાઓ સત્વરે મળી રહેશે. જેનાથી લોકોના સમય અને નાણાંની બચત થશે.

તદુપરાંત, સ્થાનિક કક્ષાએ ઉદ્ભવતા જમીન દફતરના પ્રશ્નોનું હવે તાલુકા કક્ષાએ જ આયોજનબદ્ધ અને ખૂબ જ ઝડપથી નિરાકરણ લાવી શકાશે, જે રાજ્ય સરકારના પારદર્શક અને ઝડપી વહીવટના અભિગમને સાર્થક કરે છે.

આ પણ વાંચો : Headline 03 PM : વાંચો બપોરના 12 થી બપોરના 3 વાગ્યા સુધીના મહત્વના સમાચાર એક કિલક પર