ICC World Cup 2023 : ટીમ ઇન્ડિયાએ સાવધ રહેવું પડશે ઓસ્ટ્રેલિયાના આ ઘાતક ખેલાડીઓથી..!

પેટ કમિન્સની કપ્તાનીવાળી ઓસ્ટ્રેલિયન ટીમ વર્લ્ડ કપ 2023ની ફાઈનલ મેચ માટે સંપૂર્ણ રીતે તૈયાર છે. ઓસ્ટ્રેલિયાએ સેમિફાઇનલમાં દક્ષિણ આફ્રિકાને હરાવ્યું હતું. હવે તેનો મુકાબલો ભારત સાથે થશે. 19 નવેમ્બરે અમદાવાદમાં ભારત અને ઓસ્ટ્રેલિયા વચ્ચે ફાઇનલ રમાશે. ટીમ ઈન્ડિયાએ આ મેચમાં ત્રણ ખેલાડીઓથી સાવધાન રહેવું પડશે. ગ્લેન મેક્સવેલ, ડેવિડ વોર્નર અને એડમ ઝમ્પા મિચેલ સ્ટાર્ક ભારત માટે મુશ્કેલી બની શકે છે.

ગ્લેન મેક્સવેલ તબાહી મચાવી શકે છે

આ વર્લ્ડ કપમાં સૌથી વધુ રન બનાવવાના મામલે મેક્સવેલ હાલમાં 12મા સ્થાને છે. તેણે 8 મેચમાં 398 રન બનાવ્યા છે. ભલે મેક્સવેલ સૌથી વધુ રન બનાવનાર ટોપ 5 ખેલાડીઓની યાદીમાં સામેલ નથી. પરંતુ તેની પાસે એક ક્ષણમાં મેચને બદલી નાખવાની ક્ષમતા છે. તેણે અફઘાનિસ્તાન સામે અણનમ બેવડી સદી ફટકારી હતી. મેક્સવેલે 201 રન બનાવ્યા હતા. આ પહેલા તેણે નેધરલેન્ડ સામે સદી ફટકારી હતી. તે ભારત સામે પણ સારું પ્રદર્શન કરી શકે છે.

ડેવિડ વોર્નરને રોકવો જરૂરી બનશે 

વોર્નરે અત્યાર સુધી 10 મેચમાં 528 રન બનાવ્યા છે. તેણે બાંગ્લાદેશ સામે અડધી સદી ફટકારી હતી. આ પહેલા ન્યુઝીલેન્ડ સામે 81 રન બનાવ્યા હતા. વોર્નરે પાકિસ્તાન અને નેધરલેન્ડ સામે સદી ફટકારી હતી. તેણે પાકિસ્તાન સામે 163 રનની ઇનિંગ રમી હતી. ભારત સામેની પ્રથમ મેચમાં વોર્નર કંઈ ખાસ કરી શક્યો નહોતો. જોકે, તે ફાઇનલમાં અલગ અંદાજમાં જોવા મળી શકે છે. ભારતીય બોલરોએ તેને જલ્દી આઉટ કરવો પડશે.

એડમ ઝમ્પા અને મિચેલ સ્ટાર્ક પણ ઘાતક

આ વર્લ્ડ કપમાં ઝમ્પા સૌથી વધુ વિકેટ લેવાના મામલે બીજા સ્થાને છે. તેણે 10 મેચમાં 22 વિકેટ લીધી છે. કોહલી અને રોહિત શર્મા જેવા ભારતીય ખેલાડીઓ સ્પિન રમવામાં નિષ્ણાત છે. જો કે, તેઓએ હજી પણ સાવચેત રહેવાની જરૂર પડશે. જોશ હેઝલવુડ અને મિચેલ સ્ટાર્ક પણ ટીમ ઈન્ડિયા માટે ઘાતક સાબિત થઈ શકે છે.

ઓડીઆઈ ફોર્મેટના આંકડામાં ઓસ્ટ્રેલિયા ભારત કરતા ચડિયાતું

ભારત અને ઓસ્ટ્રેલિયા વચ્ચે અત્યાર સુધીમાં 150 ODI મેચ રમાઈ છે. આ દરમિયાન ભારતે 57 મેચ જીતી છે. જ્યારે ઓસ્ટ્રેલિયાએ 83 મેચમાં સફળતા હાંસલ કરી છે. પરંતુ ટીમ ઈન્ડિયા આ વખતે અલગ મૂડમાં છે. તેણે આ વર્લ્ડ કપમાં 10 મેચ રમી છે અને તે તમામ જીતી છે. સેમીફાઈનલમાં ભારતે ન્યુઝીલેન્ડને 70 રને હરાવ્યું હતું. હવે ફાઈનલમાં ઓસ્ટ્રેલિયાનો વારો છે. ભારતે ઓસ્ટ્રેલિયા સાથે 20 વર્ષ જૂના સ્કોરને પણ સેટલ કરવો પડશે. ઓસ્ટ્રેલિયાએ 2003ની ફાઇનલમાં ભારતને હરાવ્યું હતું.

ટીમ ઈન્ડિયાએ પોતાની પ્રથમ મેચમાં ઓસ્ટ્રેલિયાને હરાવ્યું હતું

આ વર્લ્ડ કપમાં ભારતની પ્રથમ મેચ ઓસ્ટ્રેલિયા સામે હતી. ચેન્નાઈમાં પ્રથમ બેટિંગ કરતા ઓસ્ટ્રેલિયાએ માત્ર 199 રન બનાવ્યા હતા. આ દરમિયાન ડેવિડ વોર્નરે 41 રન અને સ્ટીવ સ્મિથે 46 રન બનાવ્યા હતા. લાબુશેન 27 રન બનાવીને આઉટ થયો હતો. ભારત તરફથી બોલિંગ કરતા રવિન્દ્ર જાડેજાએ 3 વિકેટ ઝડપી હતી. જસપ્રીત બુમરાહ અને કુલદીપ યાદવે બે-બે વિકેટ લીધી હતી. ઓસ્ટ્રેલિયાએ આપેલા ટાર્ગેટનો પીછો કરવા ઉતરેલી ભારતીય ટીમે 41.2 ઓવરમાં ટાર્ગેટ હાંસલ કરી લીધો હતો. તેના માટે વિરાટ કોહલીએ 85 રન બનાવ્યા હતા. કેએલ રાહુલે 97 રનની ઇનિંગ રમી હતી.

મેક્સવેલ ફાઈનલમાં ભારત માટે ખતરનાક સાબિત થઈ શકે છે.

ગ્લેન મેક્સવેલે આ વર્લ્ડ કપમાં અફઘાનિસ્તાન સામે અણનમ બેવડી સદી ફટકારી હતી. તેણે નેધરલેન્ડ સામે પણ સદી ફટકારી હતી. મેક્સવેલ એવો ખેલાડી છે જેના બેટને શાંત પાડવું સરળ નથી. જો તે વહેલો આઉટ થઈ જાય તો ભારત માટે સારું રહેશે અને જો તે બચી જશે તો તે ખતરાની ઘંટડી સમાન છે.

આ પણ વાંચો----WORLD CUP 2023 : PCB ના અધ્યક્ષ ઝકા અશરફ અમદાવાદ પહોંચ્યા, વર્લ્ડ કપની ફાઈનલ મેચ જોશે