રાષ્ટ્રપતિ પુતિનની મુલાકાત વચ્ચે US એ National Security Strategy જાહેર કરી, ભારતને વૈશ્વિક ભાગીદાર તરીકે વિશેષ મહત્ત્વ!

• રશિયાના રાષ્ટ્રપતિ પુતિનના ભારત પ્રવાસથી અમેરિકામાં ખળભળાટ (US National Security Strategy )
• અમેરિકાએ નવી સુરક્ષા વ્યૂહરચના જાહેર કરી
• આ વ્યૂહરચનામાં ભારત પર વિશેષ ભાર મૂકવામાં આવ્યો છે

US National Security Strategy India: રશિયાના રાષ્ટ્રપતિ વ્લાદિમીર પુતિનની ભારત મુલાકાત અને દ્વિપક્ષીય સહયોગના ઐતિહાસિક કરારો વચ્ચે, યુનાઇટેડ સ્ટેટ્સમાં ટ્રમ્પ વહીવટીતંત્ર દ્વારા તેની 33 પાનાની નવી રાષ્ટ્રીય સુરક્ષા વ્યૂહરચના (National Security Strategy - NSS) જાહેર કરવામાં આવી છે. આ વ્યૂહરચનામાં ભારતને વૈશ્વિક ભાગીદાર તરીકે મહત્ત્વ આપવા પર વિશેષ ભાર મૂકવામાં આવ્યો છે, જ્યારે યુરોપિયન સહયોગીઓ પ્રત્યે કઠોર વલણ અપનાવાયું છે.

US National Security Strategy: અમેરિકાએ નવી રાષ્ટ્રીય સુરક્ષા વ્યૂહરચના જાહેર કરી

નોંધનીય છે કે આ વ્યૂહરચના હેઠળ, યુએસની નીતિ ઈન્ડો-પેસિફિક ક્ષેત્રમાં શક્તિશાળી બનતા ચીનનો સામનો કરવા માટે એકલા હાથે લડવાને બદલે ભારત અને જાપાન જેવા મુખ્ય લોકશાહી દેશો સાથે ગાઢ સહયોગ કરવા પર કેન્દ્રિત છે. NSS સ્પષ્ટ કરે છે કે દક્ષિણ ચીન સમુદ્રમાં ચીનના વધતા પ્રભાવને સંતુલિત કરવા માટે ભારતનું વ્યૂહાત્મક મહત્ત્વ સર્વોચ્ચ છે. આનાથી સ્પષ્ટ થાય છે કે યુએસ ભારતને માત્ર આર્થિક જ નહીં, પરંતુ સુરક્ષા અને પ્રાદેશિક સ્થિરતાના સંદર્ભમાં પણ નિર્ણાયક ભાગીદાર તરીકે જુએ છે.

US National Security Strategy : આ નવી સુરક્ષા નીતિમાં ભારત પર વિશેષ ભાર

પુતિનની દિલ્હી મુલાકાત સાથે આ યુએસ વ્યૂહરચનાની જાહેરાત ભારતની વિદેશ નીતિના વ્યૂહાત્મક સંતુલનને રેખાંકિત કરે છે. ભારત એક તરફ રશિયા સાથે ઊર્જા, સંરક્ષણ અને વેપાર સંબંધો મજબૂત કરી રહ્યું છે, તો બીજી તરફ યુએસની વ્યૂહાત્મક ભાગીદારીને પણ મહત્ત્વ આપી રહ્યું છે. આ સમગ્ર ઘટનાક્રમ સૂચવે છે કે ભારત વૈશ્વિક દળોના દબાણ વચ્ચે પણ તેની સ્વતંત્ર અને સાર્વભૌમ વિદેશ નીતિ જાળવી રાખવા માટે કટિબદ્ધ છે.

બીજી તરફ આ દસ્તાવેજમાં યુક્રેન સંઘર્ષને લઈને યુરોપિયન દેશો પર તીવ્ર નિશાન સાધવામાં આવ્યું છે. વ્યૂહરચનામાં ગંભીર આક્ષેપો કરવામાં આવ્યા છે કે "યુરોપિયન દેશો લોકશાહીનો નાશ કરી રહ્યા છે અને યુક્રેનમાં શાંતિ અવરોધી રહ્યા છે." તેમાં વધુમાં જણાવાયું છે કે, યુક્રેનિયન અધિકારીઓ યુક્રેનમાં યુદ્ધ સમાપ્ત કરવાના યુએસના પ્રયાસોને નિષ્ફળ બનાવી રહ્યા છે. યુએસનું આ કડક નિવેદન યુરોપિયન સહયોગીઓ માટે મોટો સંદેશ છે, જે સૂચવે છે કે યુએસ હવે વૈશ્વિક સુરક્ષા મુદ્દાઓમાં વધુ જવાબદારી લેવા માટે દબાણ કરી રહ્યું છે.

આ પણ વાંચો:  રશિયન રાષ્ટ્રપતિએ મહાત્મા ગાંધીને આપી શ્રદ્ધાંજલિ વિઝિટર બુકમાં લખ્યો સંદેશ