Uttarkashi Tunnel : 12 મીટરનું અંતર છતાં મંઝિલ દૂર, સુરંગમાં ફસાયેલા 41 કામદારો આજે જોઈ શકશે નવી સવાર ?

ઉત્તરાખંડના ઉત્તરકાશીમાં સિલ્ક્યારા ટનલમાં ફસાયેલા 41 મજૂરોને બચાવવાના પ્રયાસો ચાલુ છે. જોકે, બચાવના 12 દિવસ બાદ પણ એજન્સીઓના હાથ ખાલી છે. અમેરિકન ઓગર મશીને અત્યાર સુધીમાં લગભગ 48 મીટર ડ્રિલ કર્યું છે અને 800 મીમી વ્યાસની પાઈપો નાંખી છે. જ્યારે કામદારો 60 મીટર દૂર ફસાયા છે. મતલબ કે કામદારોને બચાવવા માટે હજુ 12 મીટર ખોદકામ કરવાની જરૂર છે.

ઓગર મશીન ત્રણ વખત ખરાબ થયું

બચાવ એજન્સીઓનું માનવું હતું કે ગુરુવારે બચાવ કામગીરી પૂર્ણ થઈ જશે. પરંતુ ગુરુવારે ઓગર મશીનમાં ત્રણ વખત ખામી સર્જાઈ હતી.ઓગર મશીન દ્વારા ટનલના કાટમાળમાં ડ્રિલિંગ કરીને 800 એમએમ વ્યાસની પાઈપ નાખવામાં આવી રહી છે. આ પાઈપો દ્વારા કામદારોને બહાર કાઢવાની યોજના છે. જોકે, મશીનમાં વારંવાર ખામી સર્જાતા હજુ સુધી કામદારોને બહાર કાઢી શકાયા નથી. જો કે રેસ્ક્યુ ઓપરેશન અંતિમ તબક્કામાં છે.

અત્યારે શું સ્થિતિ છે?

કહેવામાં આવી રહ્યું છે કે પ્લેટફોર્મ પર પડેલી તિરાડોને રિપેર કરવામાં આવી છે. હવે પાઇપ બેન્ડ કાપવાનું કામ ચાલી રહ્યું છે. આ પછી ઓગર મશીન ફરીથી ચાલુ કરવામાં આવશે. હજુ 10-12 મીટર ડ્રિલિંગ અને પાઇપ નાખવાના બાકી છે.

લોખંડનો સળિયો સામે આવ્યા બાદ પણ ડ્રિલિંગ અટકાવવી પડી હતી

અગાઉ બુધવારે મોડી રાત્રે ખોદકામ દરમિયાન મશીનની સામે લોખંડનો સળિયો આવી ગયો હતો. આ પછી તેને કાપવા માટે ગેસ કટરનો ઉપયોગ કરવામાં આવ્યો હતો. 6 કલાકની મહેનત બાદ બચાવ ટુકડીઓને સફળતા મળી હતી. આ પછી, ખોદકામ શરૂ થતાં જ ઓગર મશીનમાં ખામી સર્જાઈ હતી. આ પછી દિલ્હીથી હેલિકોપ્ટર દ્વારા નિષ્ણાતોને બોલાવવામાં આવ્યા હતા. ઘણા કલાકોની મહેનત બાદ ઓગર મશીન કામ કરવા લાગ્યું. જો કે, 1.8 મીટર ખોદકામ કર્યા પછી મશીન ફરીથી બંધ થઈ ગયું. કહેવામાં આવી રહ્યું છે કે પ્લેટફોર્મ પર તિરાડો દેખાતાં ડ્રિલિંગ અટકાવવી પડી હતી.

કામદારોની હાલત એકદમ સારી છે

સારી વાત એ છે કે 12 દિવસ પછી પણ કામદારોની તબિયત બિલકુલ ઠીક છે. ટનલમાં 6 એમએમ પાઈપો દ્વારા બંને સમયે તેમને ખોરાક પૂરો પાડવામાં આવે છે. આ ઉપરાંત કામદારોને જરૂરી વસ્તુઓ અને દવાઓ પણ મોકલવામાં આવી રહી છે. ઉત્તરાખંડના સીએમ પુષ્કર સિંહ ધામી સતત બચાવ કાર્ય પર નજર રાખી રહ્યા છે. તેમણે ગુરુવારે સિલ્ક્યારા ટનલની મુલાકાત લીધી હતી. આ દરમિયાન તેમણે કાર્યકરો સાથે વાત પણ કરી હતી.

આ પણ વાંચો : Ponzi Scam : દક્ષિણ ભારતીય અભિનેતા પ્રકાશ રાજને પૂછપરછ માટે ED નું સમન્સ