VADODARA : ગુજસીટોકનો આરોપી રિમાન્ડ પર, નાણાંનું રાજસ્થાન કનેક્શન ખુલ્યું

અલ્પુ સિધીં અને ડાવર ત્યાં ગયા હોવાની પોલીસને આશંકા

વડોદરા પોલીસે કુખ્યાત અલ્પુ સિંધી, જુબેર મેમણ, કમલેશ ડાવર સહિત 8 સામે ગુજસીટોક હેઠળ ગુનો નોંધ્યો છે. જે બાદ કમલેશ ડાવરની ધરપકડ કરવામાં આવી છે. પોલીસે આરોપીને કોર્ટમાં રજુ કરીને તેના 7 દિવસના રિમાન્ડ મેળવ્યા છે. ગેંગ દ્વારા ગુના આચરીને એકત્ર કરવામાં આવેલા નાણાં શામળાજીથી આગળ રાજસ્થાનની હદમાં આવતા ખેરવાડા ગામના ઠાકુર સિંગ પાસે રાખવામાં આવતા હોવાનું જાણવા મળ્યું છે. અલ્પુ સિધીં અને ડાવર ત્યાં ગયા હોવાની પોલીસને આશંકા છે. જેથી આ માહિતી વેરીફાય કરવા, દારૂની હેરાફેરી અંગેના સ્થળની તપાસ કરવા સહિતના મુદ્દાઓ પોલીસે કોર્ટ સમક્ષ મુક્યા હતા.

પોલીસ તંત્રએ કમર કસી

આ સાથે જ ડેડિયાપાડાની એક ધાર્મિક સંસ્થા સાથે સંકળાયેલા ઇસમ પણ તેમની મદદ કરતો હોવાનું ખુલતા તે દિશામાં પોલીસ તપાસ કરશે. રિમાન્ડ હેઠળ આરોપી પાસેથી વધુમાં વધુ વિગતો મેળવવા તેમજ અન્ય આરોપીઓને દબોચવા અથવા ટ્રાન્સફર વોરંટથી મેળવવા માટે પોલીસ તંત્રએ કમર કસી હોવાનું જાણવા મળી રહ્યું છે.

આ પણ વાંચો --- VADODARA : પાલિકાના લાંચિયા એન્જિનિયરના ઘરના બાથરૂમમાંથી મોટી રોકડ મળી આવી