VADODARA : હજારો કિમીની બાઇક યાત્રા થકી મહિલાએ બહાદુરીનો ઇતિહાસ લખ્યો

VADODARA : "ભારત મહિલાઓ માટે સુરક્ષિત છે" એ સંદેશ સાથે વડોદરાની 40 વર્ષીય સોલો રાઈડર ભૂમિકા દિલીપભાઈ પુરાણીએ વડોદરાથી બદ્રીનાથ અને કેદારનાથ સુધી 3,780 કિમીની બુલેટ યાત્રા પૂર્ણ કરી એક અનોખું સાહસિક અધ્યાય રચ્યું છે. આ યાત્રા માત્ર રોડ ટ્રિપ નહીં રહી, પણ આત્મશોધન અને અડગ સંકલ્પની સાકારમૂર્તિ બની. ભૂમિકા પુરાણીનું મકસદ સ્પષ્ટ હતું – સમાજમાં મહિલાઓ માટે સલામતી અને સશક્તિકરણ અંગે જાગૃતિ ફેલાવવી. "હું રૂઢિચુસ્ત પરિવારમાંથી આવું છું. સમાજ જે કામ માટે છોકરીઓને અયોગ્ય માનતો હતો, હું તે બધું સાબિત કરવા ઉતરી હતી," તેઓ કહે છે. (FEMALE WROTE HISTORY OF PRIDE BY COMPLETING LONG BIKE RIDE - VADODARA)

મહાસફરનો પ્રારંભ

16 મેની સવાર, ભૂમિકાબેને તેમની "ત્રિશુલા" પર સવાર થઈ વડોદરાથી ઈન્દોર તરફ સફર શરૂ કરી. ઈન્દોરમાં મોટો ફિએસ્ટા ઇવેન્ટમાં રોકાયા પછી તેમણે ઋષિકેશ તરફ કૂચ કરી, જ્યાં ગંગા એસોસિએશન દ્વારા શત્રુઘ્ન ઘાટ પર આરતીમાં શામેલ થવાનો સૌભાગ્ય મળ્યું. મહંત મનોજ દ્વિવેદી દ્વારા તેમને સન્માનિત પણ કરવામાં આવ્યા.

આધ્યાત્મિક ઊંડાણ અને હિમાલયનો કોલ

પ્રયાગરાજમાં પવિત્ર સંગમમાં ડૂબકી અને વારાણસીમાં પાંચ દિવસની રૂહાની હાજરી પછી, યાત્રાનો અગત્યનો તબક્કો હતો – કેદારનાથ. આખા પ્રવાસ દરમિયાન તેમણે કોઈ અનિચ્છનીય ઘટનાનો અનુભવ ન કર્યો. તેઓ જણાવે છે કે, "આ યાત્રા ખરાબ રસ્તાઓ કરતા પણ વધુ મારી આંતરિક સફર હતી."

અવિસ્મરણીય સિદ્ધિઓ અને રાઈડિંગનો રેકોર્ડ

ભૂમિકાબેનને 16 વર્ષથી વધુનો રાઈડિંગ અનુભવ છે. તેઓ સ્થાનિક મોટરસાયકલ ક્લબના સભ્ય રહી ચુક્યા છે અને અનેક રાષ્ટ્રીય-આંતરરાષ્ટ્રીય ઇવેન્ટ્સમાં ભાગ લીધો છે.

મુખ્ય સિદ્ધિઓ:

- 3.5 લાખ કિમીથી વધુનું રાઈડિંગ (16 વર્ષમાં )
- રાઈડર મેનિયા (2017, 2022, 2023)માં ઉપસ્થિતિ
- G2G સિલ્વાસા (2019)માં એકમાત્ર મહિલા “ડર્ટ રેસ” વિજેતા
- WCRM મહારાષ્ટ્ર અને BOBMC નેપાળમાં સૌથી લાંબી સવારી કરનાર મહિલા બાઈકર
- 150થી વધુ રાઇડર્સ સાથે સિટી રાઈડ લીડ કરી

"મહિલા હોય તો પણ વાહન ચલાવતી વખતે તેનો પાયો સમજવો એ ખૂબ જરૂરી છે," એવું ભુમિકાબેનનું મંતવ્ય છે. તેઓ માતા-પિતાને સલાહ આપે છે કે દીકરીઓને સ્કૂટી કે કાર ચલાવતાં શીખાવ્યા પછી તેનું બેઝિક રીપેરિંગ પણ શીખવવું જોઈએ.

ભૂમિકાબેન હવે ભારતના પશ્ચિમથી પૂર્વ સુધીની – કોટેશ્વરથી કાહો (અરુણાચલ પ્રદેશ) સુધીની રાઈડિંગ યોજનામાં છે. વધુમાં જણાવ્યું કે, મહાકુંભ 2025 હંમેશા મારા મગજમાં હતો, પરંતુ મેં ક્યારેય અપેક્ષા નહોતી રાખી કે હું ત્યાં પહોંચવા માટે મારા હિમાલયન 450, ત્રિશુલા પર સવારી કરીશ. છતાં, ભાગ્ય અને મારા બાબાની ઇચ્છા મુજબ, મેં સમગ્ર ભારતમાં અવિસ્મરણીય સવારીઓ પૂર્ણ કરી છે.

આ પણ વાંચો --- Rashifal 17 April 2025 : આજે ગજકેસરી યોગથી આ રાશિને ઘણો ફાયદો થશે, જાણો તમારું ભવિષ્ય