Valsad: મુખ્યમંત્રી ભૂપેન્દ્રભાઈ પટેલ ક્રિકેટ મેચ રમ્યા, બેટિંગ, બોલિંગમાં હાથ અજમાવ્યો

• Valsad માં 12મી ચિંતન શિબિર
• મુખ્યમંત્રી ભૂપેન્દ્રભાઈ પટેલ ક્રિકેટ મેચ રમ્યા
• બેટિંગ અને બોલિંગ બંનેમાં પોતાનો હાથ અજમાવ્યો
• વરિષ્ઠ સનદી અધિકારીઓએ પણ ઉત્સાહભેર ભાગ લીધો

Valsad 12th Chintan Shibir:ગુજરાત સરકારની 12મી ચિંતન શિબિર વલસાડ જિલ્લાના ધરમપુર સ્થિત શ્રીમદ રાજચંદ્ર આશ્રમ ખાતે ચાલી રહી છે, ત્યારે શિબિરના ગહન વિચાર-વિમર્શ વચ્ચે એક અનોખો અને ઉત્સાહભર્યો માહોલ જોવા મળ્યો હતો. શિબિરના પ્રથમ દિવસની સાંજે તણાવમુક્ત વાતાવરણ ઊભું કરવાના હેતુથી આશ્રમના સુંદર પેવેલિયનમાં એક મૈત્રીપૂર્ણ ક્રિકેટ મેચનું આયોજન કરવામાં આવ્યું હતું, જેમાં મુખ્યમંત્રી ભૂપેન્દ્રભાઈ પટેલ સહિત રાજ્યના મંત્રીઓ અને વરિષ્ઠ સનદી અધિકારીઓએ ઉત્સાહભેર ભાગ લીધો હતો.

CMએ ક્રિકેટ મેચનો આનંદ માણ્યો

વહીવટી તંત્રના ગંભીર માહોલથી દૂર, આ મેચમાં અધિકારીઓ અને મંત્રીઓએ તેમની રમતગમતની ભાવના દર્શાવી હતી. જોકે, આ મેચનું મુખ્ય આકર્ષણ મુખ્યમંત્રી ભૂપેન્દ્રભાઈ પટેલ રહ્યા હતા, જેમણે બેટિંગ અને બોલિંગ બંનેમાં પોતાનો હાથ અજમાવ્યો હતો.

મુખ્યમંત્રીની બેટિંગ જોઈને હાજર રહેલા સૌ કોઈ આશ્ચર્યચકિત થયા હતા. તેમણે એક યુવા અને અનુભવી ક્રિકેટરની માફક ઉત્સાહભેર બેટિંગ કરી હતી, અને કેટલાક આકર્ષક શોટ્સ પણ ફટકાર્યા હતા. વહીવટી તંત્રના વડાને મેદાન પર આટલા ઉત્સાહ સાથે રમતા જોઈને મંત્રીઓ અને અધિકારીઓમાં પણ નવો જોશ જોવા મળ્યો હતો.

વિવિધ માઈન્ડ ગેમ્સનું પણ આયોજન

આ ક્રિકેટ મેચનો મુખ્ય ઉદ્દેશ્ય ચિંતન શિબિરમાં દિવસભર ચાલેલા સઘન મંથન પછી મંત્રીઓ અને અધિકારીઓને તણાવમુક્ત મનોરંજન પૂરું પાડવાનો અને પરસ્પર તંદુરસ્ત સંવાદ સ્થાપિત કરવાનો હતો. ક્રિકેટ ઉપરાંત, આશ્રમ પરિસરમાં અધિકારીઓ અને મંત્રીઓના માનસિક સ્ફૂર્તિ માટે વિવિધ માઈન્ડ ગેમ્સનું પણ આયોજન કરવામાં આવ્યું હતું. આ પ્રકારની પ્રવૃત્તિઓથી વહીવટી વડાઓ વચ્ચેનો સંબંધ વધુ ગાઢ બને છે અને કાર્યક્ષેત્રમાં પણ ટીમ ભાવના મજબૂત થાય છે. ધરમપુરની આ 12મી ચિંતન શિબિરમાં નીતિઓ અને પ્રોજેક્ટ્સની ગહન ચર્ચા સાથે-સાથે આ પ્રકારની સહ-અભ્યાસિક પ્રવૃત્તિઓ દ્વારા એક સકારાત્મક અને ઉર્જાથી ભરપૂર વાતાવરણ ઊભું કરવામાં આવ્યું છે.

આ પણ વાંચોઃ Valsad: 12મી ‘ચિંતન શિબિર’નો બીજો દિવસ, કેબિનેટ સચિવ ટી. વી. સોમનાથનું વિશેષ સત્ર યોજાશે