સાબરકાંઠામાં હરણાવ જળાશયમાંથી પાણી છોડાયું: ભારે વરસાદ બાદ 17 ગામોને એલર્ટ

ઉત્તર ગુજરાત અને રાજસ્થાનના ઉપરવાસમાં ભારે વરસાદને કારણે હરણાવ, કોસામ્બી અને ભીમાક્ષી નદીઓમાં પાણીનો પ્રવાહ વધ્યો છે, જેના લીધે હરણાવ જળાશયમાં પાણીની આવક સતત વધી રહી છે. હવામાન વિભાગે આગામી 24 કલાકમાં સાબરકાંઠા સહિત 17 જિલ્લાઓમાં ભારે વરસાદની આગાહી કરી છે, જેના કારણે જળાશયની સ્થિતિ નાજુક બની શકે છે. જળાશયની જળસપાટી હજુ પણ એલર્ટ લેવલે હોવાથી ગમે ત્યારે વધુ પાણી છોડવાની શક્યતા ઉભી થઈ શકે છે.

Advertisement

આ પણ વાંચો- અખિલ ભારતીય અધ્યક્ષ સંમેલનનો HM Shri Amit Shah ના હસ્તે પ્રારંભ!

17 ગામોને એલર્ટ આપવામાં આવ્યું

હરણાવ નદી કાંઠાના 17 ગામો જેમાં ખેડબ્રહ્મા, વડાલી અને ઈડર તાલુકાના ગામોનો સમાવેશ થાય છે, તેમને સાવચેતીના ભાગરૂપે એલર્ટ જાહેર કરવામાં આવ્યું છે. વહીવટી તંત્રે નીચાણવાળા વિસ્તારોમાં રહેતા લોકોને સલામત સ્થળે ખસેડવાની સૂચના આપી છે. ખેડબ્રહ્મા નજીક હરણાવ, કોસામ્બી અને ભીમાક્ષી નદીઓના સંગમસ્થળે પાણીનો પ્રવાહ ઝડપી બન્યો હોવાથી આ વિસ્તારોમાં ખાસ ચેતવણી જાહેર કરાઈ છે.

હરણાવ જળાશયમાંથી પાણી છોડવાની પ્રક્રિયા નિયંત્રિત રીતે ચાલી રહી છે. રવિવારે સવારે એક દરવાજો ખોલીને 215 ક્યુસેક પાણી છોડવામાં આવ્યું, જ્યારે ગત રાત્રે 1060 ક્યુસેક પાણી નદીમાં છોડાયું હતું. આ ઉપરાંત, ધરોઈ જળાશયમાં પણ 926 ક્યુસેક પાણીની આવક નોંધાઈ હોવાનું જાણવા મળ્યું છે, જે સાબરમતી નદીમાં વધુ પાણીનો પ્રવાહ વધારી શકે છે.

ખતરાને જોતા NDRF અને SDRFની ટીમો તૈનાત

વહીવટી તંત્રે પૂરની સંભાવનાને ધ્યાનમાં રાખીને NDRF અને SDRFની ટીમોને તૈનાત કરી છે. નદી કાંઠે રહેતા લોકોને નજીકના સલામત સ્થળોએ જવા અપીલ કરવામાં આવી છે. ખેડબ્રહ્મા અને વડાલીના નીચાણવાળા વિસ્તારોમાં પાણી ભરાવાની શક્યતાને ધ્યાનમાં રાખીને નિતાર વ્યવસ્થાને સુધારવાના પ્રયાસો ચાલી રહ્યા છે. હવામાન વિભાગે આગામી દિવસોમાં વધુ વરસાદની આગાહી કરી હોવાથી તંત્રે ગામલોકોને સાવચેત રહેવા અને નદી કાંઠેથી દૂર રહેવા સૂચના આપી છે.

ભારે વરસાદ અને જળાશયમાંથી પાણી છોડવાને કારણે ખેડબ્રહ્મા, વડાલી અને ઈડરમાં ખેતીવાડીને નુકસાન થવાની શક્યતા છે. વડાલીમાં 7.56 ઈંચ અને ઈડરમાં 2.76 ઈંચ વરસાદ નોંધાયો હોવાના અહેવાલો છે, જેના લીધે ખેતરોમાં પાણી ભરાયું છે. ખેડબ્રહ્માના નીચાણવાળા વિસ્તારોમાં પાણી ભરાવાની સમસ્યા વધી શકે છે, જેના કારણે સ્થાનિક લોકોમાં ચિંતા વ્યાપી છે.

આ પણ વાંચો- વડોદરાના પાદરામાં ભાજપ-કોંગ્રેસનો રાજકીય સંઘર્ષ : ધારાસભ્ય ચૈતન્યસિંહ ઝાલાના વિવાદિત નિવેદન સામે જશપાલસિંહ પઢિયારનો વળતો પ્રહાર