Hamas Rejects Trump Plan : અમેરિકી રાષ્ટ્રપતિ ડોનાલ્ડ ટ્રમ્પ અને ઇઝરાયેલના વડા પ્રધાન બેન્જામિન નેતન્યાહૂએ તાજેતરમાં ગાઝામાં શાંતિ સ્થાપના અને યુદ્ધવિરામની શરતો પર સૈદ્ધાંતિક સહમતિ વ્યક્ત કરી છે. રાષ્ટ્રપતિ ટ્રમ્પે રજૂ કરેલા 20-સૂત્રીય શાંતિ પ્રસ્તાવ પર ઇઝરાયેલે સંમતિ આપી દીધી છે, પરંતુ આતંકવાદી સંગઠન હમાસ તરફથી હજી સુધી કોઈ અંતિમ પ્રતિસાદ આવ્યો નથી. હમાસને જવાબ આપવા માટે 72 કલાકનો સમય આપવામાં આવ્યો છે.
આ દરમિયાન, પેલેસ્ટિનિયન સૂત્રોએ માહિતી આપી છે કે હમાસે ટ્રમ્પના પ્લાનની બે મુખ્ય શરતો પર વાંધો ઉઠાવ્યો છે અને તેમાં સુધારો કરવાની માગ કરી છે.
![Gaza Ceasefire Conditions]()
Gaza Ceasefire Conditions
હમાસની 'નિઃશસ્ત્રીકરણ' અને 'નિકાલ' પર મોટી અસહમતિ
AFPના અહેવાલ મુજબ, હમાસના અધિકારીઓ ટ્રમ્પની ગાઝા શાંતિ યોજનામાં નિઃશસ્ત્રીકરણ (Disarmament) અને લડવૈયાઓના ગાઝામાંથી નિકાલ (Expulsion) સંબંધિત જોગવાઈઓમાં ફેરફાર ઇચ્છે છે. આ માહિતી સમૂહના નેતૃત્વ સાથે નજીકથી જોડાયેલા એક પેલેસ્ટિનિયન સૂત્રએ આપી છે. સૂત્રના જણાવ્યા અનુસાર, હમાસના વાટાઘાટકારોએ મંગળવારે દોહામાં તુર્કી, ઇજિપ્ત અને કતારના અધિકારીઓ સાથે ચર્ચા કરી હતી, જેમાં ટ્રમ્પની આ બે શરતો પ્રત્યે અસહમતિ વ્યક્ત કરવામાં આવી હતી.
આ મુદ્દાઓ પર સુધારો થવો જોઈએ (Hamas Rejects Trump Plan)
હમાસના નેતાઓ માંગ કરી રહ્યા છે કે તેમના સંગઠનના નિઃશસ્ત્રીકરણ અને લડવૈયાઓને ગાઝામાંથી બહાર કાઢવા જેવા મુદ્દાઓ પર સુધારો થવો જોઈએ. આ ઉપરાંત, હમાસ ગાઝા પટ્ટીમાંથી ઇઝરાયેલની સંપૂર્ણ વાપસી માટે આંતરરાષ્ટ્રીય ગેરંટી પણ ઇચ્છે છે. તેઓ એ પણ ખાતરી ઇચ્છે છે કે ભવિષ્યમાં ગાઝાની અંદર કે બહાર તેમના લોકો પર હુમલો કરવામાં નહીં આવે.
![Israel Hamas Conflict Update]()
Israel Hamas Conflict Update
હમાસમાં બે અલગ-અલગ મંતવ્યો (Hamas Rejects Trump Plan)
આ વાતચીતથી પરિચિત અન્ય એક સૂત્રએ AFPને જણાવ્યું કે ટ્રમ્પના શાંતિ પ્લાનને લઈને પેલેસ્ટિનિયન જૂથમાં મતભેદો પ્રવર્તી રહ્યા છે.
હમાસની અંદર બે પ્રકારના વિચારો ચાલી રહ્યા છે:
- પ્રથમ જૂથ ટ્રમ્પના શાંતિ પ્લાનને બિનશરતી સમર્થન આપવા માટે તૈયાર છે, કારણ કે તેઓ માને છે કે આના દ્વારા યુદ્ધવિરામની ગેરંટી મળી શકે છે.
- બીજા જૂથને નિઃશસ્ત્રીકરણ અને ગાઝા છોડવાની શરત સામે સખત વાંધો છે. સૂત્રે જણાવ્યું કે, "તેઓ નિઃશસ્ત્રીકરણ અને કોઈપણ પેલેસ્ટિનિયન નાગરિકને ગાઝામાંથી બહાર કાઢવાનો વિરોધ કરી રહ્યા છે."
જોકે હમાસ પાસે ટ્રમ્પના 20-સૂત્રીય પ્લાન પર જવાબ આપવા માટે હવે ઓછો સમય બાકી છે, સૂત્રએ ઉમેર્યું કે જૂથને અંતિમ જવાબ આપવામાં હજી બે કે ત્રણ દિવસ વધુ લાગી શકે છે.
હમાસના નેતાઓ અન્ય પ્રાદેશિક અને આરબ ભાગીદારોના સંપર્કમાં પણ છે. નોંધનીય છે કે ગયા મહિને દોહામાં યુદ્ધવિરામની ચર્ચા દરમિયાન ઇઝરાયેલે હુમલો કર્યો હતો, જેમાં છ લોકો માર્યા ગયા હતા.
આ પણ વાંચો : 'આસિમ મુનીર સેલ્સમેન જેવા લાગે છે', ટ્રમ્પ સામે પાકિસ્તાની સેના પ્રમુખની હરકતોથી પાકિસ્તાની સાંસદો ગુસ્સે થયા
