કેવી રીતે સર્જાયો આ ગંભીર અકસ્માત?

મળતી માહિતી મુજબ, ફેઝ-3 પોલીસ સ્ટેશન વિસ્તાર હેઠળ આવતા મમૂરા ગામની આ ઘટના છે. પોલીસ તપાસમાં બહાર આવ્યું છે કે, આ G-4 (ગ્રાઉન્ડ પ્લસ 4 માળ) ઇમારતના ગ્રાઉન્ડ ફ્લોર પર આવેલા પાર્કિંગ એરિયા (Parking Area) માં એક ઇલેક્ટ્રિક બાઇક (Electric Bike) ની બેટરી ચાર્જિંગમાં મૂકવામાં આવી હતી. આ ચાર્જિંગ દરમિયાન અચાનક જ બેટરીમાં શોર્ટ સર્કિટ થતાં તણખા (Sparking) ઝર્યા હતા. આ તણખાના કારણે નજીકમાં જ પાર્ક કરેલા અન્ય પેટ્રોલ વાહનોએ પણ ઝડપથી આગ પકડી લીધી હતી. જોતજોતામાં આ આગ આખી ઇમારતમાં ફેલાઈ ગઈ અને ભારે ધુમાડો ઉઠ્યો હતો.

પાર્કિંગમાં લાગેલી આ આગને કારણે સીડીઓ અને લોબીના ભાગમાં કાળો ધુમાડો ભરાઈ ગયો હતો, જેના લીધે ઉપરના માળે રહેતા પરિવારો બહાર નીકળી શક્યા નહીં અને અંદર જ કેદ થઈ ગયા હતા. ઇમારતમાં અચાનક જ અફરાતફરી અને ચીસાચીસ મચી ગઈ હતી. સોશિયલ મીડિયા પર સામે આવેલા વીડિયોમાં પણ ઇમારતમાંથી નીકળતી આગની ઊંચી લપેટો સ્પષ્ટ જોઈ શકાય છે.

ફાયર બ્રિગેડની કામગીરી અને મકાન માલિકની ધરપકડ

ઘટનાની જાણ થતાં જ ફાયર સર્વિસ યુનિટની 7 ફાયર ટેન્ડર (Fire Tenders), હાઇડ્રોલિક પ્લેટફોર્મ (Hydraulic Platform), મુખ્ય અગ્નિશામક અધિકારી (Chief Fire Officer) અને સ્થાનિક પોલીસ કાફલો તાત્કાલિક ઘટનાસ્થળે પહોંચી ગયો હતો. દમકલે સીડીઓનો ઉપયોગ કરીને ઇમારતમાં ફસાયેલા તમામ પરિવારોને બહાર કાઢવાનું શરૂ કર્યું હતું.

પોલીસે જણાવ્યું કે ધુમાડાના કારણે 2 વ્યક્તિઓની તબિયત ગંભીર રીતે લથડી ગઈ હતી, જેમને તાત્કાલિક જિલ્લા હોસ્પિટલ (District Hospital) ખસેડવામાં આવ્યા હતા. ત્યાં ફરજ પરના તબીબોએ 1 મહિલા અને 1 પુરુષને મૃત જાહેર કર્યા હતા. હાલમાં દમકલ કર્મચારીઓએ આગ પર સંપૂર્ણ કાબૂ મેળવી લીધો છે. આ સાથે જ આ મામલામાં મોટી કાર્યવાહી કરીને મકાન માલિક/લીઝ ધારકની ધરપકડ (Arrest) કરવામાં આવી છે.

મુખ્યમંત્રી યોગી આદિત્યનાથે લીધી કડક નોંધ

ઉત્તર પ્રદેશના મુખ્યમંત્રી (Chief Minister) યોગી આદિત્યનાથે આ કમનસીબ અકસ્માતની ગંભીર નોંધ લીધી છે. તેમણે ઉચ્ચ અધિકારીઓને તાત્કાલિક ઘટનાસ્થળે પહોંચવા અને પરિસ્થિતિનો તાગ મેળવવા આદેશ આપ્યા હતા. CM યોગીએ રાહત અને બચાવ કાર્ય (Relief and Rescue Work) માં ઝડપ લાવવા તેમજ ઘાયલ થયેલા લોકોને સમયસર યોગ્ય તબીબી સારવાર પૂરી પાડવાની સૂચના આપી છે. મુખ્યમંત્રીએ સ્થાનિક વહીવટીતંત્રને દરેક સ્તરે સતર્કતા રાખવા અને બચાવ કામગીરીનું સતત મોનિટરિંગ (Monitoring) કરવા પણ જણાવ્યું છે.

આ પણ વાંચો : Mumbai Fire : અંધેરીના SRA બિલ્ડિંગમાં ભીષણ આગ, ધુમાડાથી ગૂંગળાયેલા લોકોએ જીવ બચાવવા લગાવી છલાંગ!