Ajwa Fun World Joyride Case: વડોદરામાં એક રાઈડે બદલી નાખ્યું જીવન, 12 વર્ષ બાદ વિદ્યાર્થિનીને મળશે વળતર

બ્રેક ડાન્સ રાઈડમાં સેફ્ટી લોક તૂટી ગયો

સપ્ટેમ્બર 2014માં જહાન્વી પરીખ કોલેજના મિત્રો સાથે આજવા ફન વર્લ્ડ ગઈ હતી. આ દરમિયાન તેણે બ્રેક ડાન્સ રાઈડમાં બેસ્યા બાદ સેફ્ટી લોક તૂટી ગયું હતું, અને તે રાઈડમાંથી નીચે પટકાઈ હતી. અકસ્માતમાં જહાન્વીને કરોડરજ્જૂ, માથા અને પગના ભાગમાં ગંભીર ઈજાઓ પહોંચી હતી. બંને હાથમાં પણ ફ્રેક્ચર થયું હતું.

એક મહિનાથી વધુ સમય હોસ્પિટલમાં સારવાર

અકસ્માત બાદ જહાન્વીને લાંબા સમય સુધી હોસ્પિટલમાં સારવાર લેવી પડી હતી. તે એક મહિનાથી વધુ સમય સુધી હોસ્પિટલમાં દાખલ રહી હતી. સારવાર પાછળ અંદાજે ₹12 લાખનો ખર્ચ થયો હતો. જોકે, વીમા કંપની તરફથી માત્ર ₹2 લાખની રકમ ચૂકવવામાં આવી હતી. અકસ્માતની અસરને કારણે જહાન્વીના અભ્યાસ અને પરીક્ષા પર પણ ગંભીર અસર પડી હતી.

અકસ્માત બાદ અભ્યાસમાં પણ મુશ્કેલી

જહાન્વી અકસ્માતને કારણે પરીક્ષા આપી શકી નહોતી. તેના શરીરમાં કાયમી શારીરિક ખામી રહી ગઈ હોવાની માહિતી પણ ફરિયાદમાં રજૂ કરવામાં આવી હતી. ઘટનાના લાંબા સમય બાદ પણ ઈજાની અસર જીવન પર રહી હતી. આ પરિસ્થિતિને ધ્યાનમાં રાખીને જહાન્વીએ વળતરની માંગ કરી હતી.

જૂન 2015માં ગ્રાહક આયોગમાં ફરિયાદ

જહાન્વી પરીખે જૂન 2015માં વડોદરા ગ્રાહક આયોગમાં ફન વર્લ્ડ મેનેજમેન્ટ અને ઓરિએન્ટલ ઇન્શ્યોરન્સ સામે ફરિયાદ કરી હતી. ફરિયાદમાં ₹20 લાખના વળતરની માંગ કરવામાં આવી હતી. લાંબી કાનૂની પ્રક્રિયા બાદ હવે ગ્રાહક કમિશને જહાન્વીની તરફેણમાં ચુકાદો આપ્યો છે.

ફન વર્લ્ડ અને વીમા કંપનીએ સંયુક્ત રીતે ચૂકવવા પડશે

ગ્રાહક કમિશને તબીબી ખર્ચ સહિતની પરિસ્થિતિને ધ્યાનમાં રાખીને કુલ ₹20 લાખનું વળતર ચૂકવવાનો આદેશ કર્યો છે. આ રકમ ફન વર્લ્ડ મેનેજમેન્ટ અને ઓરિએન્ટલ ઇન્શ્યોરન્સ કંપનીએ સંયુક્ત રીતે ચૂકવવાની રહેશે. 12 વર્ષ જૂના આ કેસના ચુકાદાથી જહાન્વી પરીખને લાંબી કાનૂની લડત બાદ રાહત મળી છે.

આ પણ વાંચો---- Ahmedabad Vadodara Expressway Accident: અમદાવાદ-વડોદરા એક્સપ્રેસ હાઈવે પર મોતનો તાંડવ, મોડી રાત્રે અકસ્માતમાં 7 લોકોના મૃત્યું