દારૂની ખાલી બોટલ આપો અને ₹100 લો! Congress Leader ને જાહેરાત કરવી પડી ભારે!
- દારૂની ખાલી બોટલને લઈ જાહેરાત કરનાર Congress Leader સામે ગુનો નોંધાયો
- સોશિયલ મીડિયામાં પોસ્ટ કરી પોલીસને ખુલ્લો પડકાર ફેંક્યો હોવાનો આક્ષેપ
- ગોરવા પોલીસ સ્ટેશનમાં કોંગ્રેસના આગેવાન સ્વેજલ વ્યાસ સામે ફરિયાદ દાખલ
- દારૂની ખાલી બોટલ લઈ ₹100 આપવાની કરી જાહેરાત
- જાહેર શાંતિ ભંગ થાય તેવી પોસ્ટ કર્યાનો આરોપ લગાવ્યો
- સોશિયલ મીડિયામાં વાયરલ પોસ્ટ મામલે પોલીસે કાર્યવાહી હાથ ધરી
Congress Leader Swejal Vyas: સોશિયલ મીડિયા પ્લેટફોર્મ પર દારૂની ખાલી બોટલોને લઈને એક અનોખી અને વિવાદાસ્પદ જાહેરાત કરનાર કોંગ્રેસના સ્થાનિક નેતા મુશ્કેલીમાં મુકાયા છે. સોશિયલ મીડિયામાં વાયરલ થયેલી એક પોસ્ટના મામલે પોલીસે કાયદેસરની કાર્યવાહી હાથ ધરીને કોંગ્રેસના આગેવાન સ્વેજલ વ્યાસ (Swejal Vyas) સામે ગુનો નોંધી વધુ તપાસ શરૂ કરી છે.
શું હતો સમગ્ર વિવાદ?
મળતી માહિતી મુજબ, કોંગ્રેસના આગેવાન સ્વેજલ વ્યાસ (Swejal Vyas) દ્વારા સોશિયલ મીડિયામાં એક પોસ્ટ શેર કરવામાં આવી હતી. આ પોસ્ટમાં તેમણે એવી જાહેરાત કરી હતી કે દારૂની ખાલી બોટલ લાવી આપનાર વ્યક્તિને ₹100 આપવામાં આવશે. ગુજરાતમાં સત્તાવાર રીતે દારૂબંધી અમલમાં હોવા છતાં, આ પ્રકારે દારૂની ખાલી બોટલો એકત્રિત કરવાની જાહેરાત વાયરલ થતાં જ સ્થાનિક રાજકારણ અને પોલીસ તંત્રમાં ભારે ચર્ચા જાગી હતી.
પોલીસને ખુલ્લો પડકાર અને ગુનો દાખલ
આ પોસ્ટ વાયરલ થયા બાદ પોલીસ એક્શન મોડમાં આવી હતી. સ્વેજલ વ્યાસ સામે આક્ષેપ કરવામાં આવ્યો છે કે તેમણે આ પોસ્ટના માધ્યમથી પોલીસ પ્રશાસનને ખુલ્લો પડકાર ફેંક્યો છે. આ ઉપરાંત, આ પ્રકારની પોસ્ટથી સમાજમાં નકારાત્મક સંદેશ જાય છે અને જાહેર શાંતિનો ભંગ થઈ શકે છે, તેવો આરોપ પણ તેમના પર લગાવવામાં આવ્યો છે.
આ સમગ્ર સોશિયલ મીડિયા પોસ્ટ મામલે વડોદરાના ગોરવા પોલીસ સ્ટેશન (Gorwa Police Station) માં કોંગ્રેસી નેતા સામે વિધિવત રીતે ફરિયાદ દાખલ કરવામાં આવી છે. પોલીસે જાહેર શાંતિ ભંગ થાય તેવી પોસ્ટ કરવાના ગુના હેઠળ કાયદેસરની કાર્યવાહી શરૂ કરી છે અને આગળની તપાસ હાથ ધરી છે. આ ઘટના હાલ વડોદરા અને આસપાસના વિસ્તારોમાં ભારે ચર્ચાનો વિષય બની છે.
આ પણ વાંચો: Alcohol Bottles : શું તમે જાણો છો? દારૂ કાચની બોટલમાં જ કેમ મળે છે!