Vadodara Independence Day : વડોદરા ખાતે 80મા સ્વાતંત્ર્ય પર્વની રાજ્યકક્ષાની ભવ્ય ઉજવણીના અવસરે નાયબ મુખ્યમંત્રી હર્ષભાઈ સંઘવીએ પોતાના ઉત્સાહવર્ધક ઉદ્બોધનમાં વડોદરાના નવજુવાનોના દેશભક્તિના અંદાજની પ્રશંસા કરી હતી અને ગુજરાતના ખૂણે ખૂણે દેશભક્તિની ગુંજ પહોંચી હોવાનું જણાવ્યું હતું. તેમણે સૌ નાગરિકોને આઝાદીના મહાપર્વની હાર્દિક શુભકામનાઓ પાઠવતા ભારત દેશને સૌથી અનોખો ગણાવ્યો હતો.
સરદાર પટેલના ઐતિહાસિક યોગદાન અને વડોદરાના ગાયકવાડી શાસનનું સ્મરણ
આઝાદીના 100 વર્ષ પૂર્ણ થવામાં હવે માત્ર 20 વર્ષ બાકી છે ત્યારે યુવાનોને પ્રેરણા આપતા હર્ષભાઈ સંઘવીએ જણાવ્યું હતું કે, યુવાનો ગૂગલમાં સર્ચ કરીને જોઈ શકે છે કે ઇટલીના 9 પ્રાંતોને એકઠા કરતા 23 વર્ષ લાગ્યા હતા અને જર્મનીના 40 પ્રાંતોને સાથે લાવતા 9 વર્ષ લાગ્યા હતા, પરંતુ લોહપુરુષ સરદાર વલ્લભભાઈ પટેલે માત્ર 18 મહિનાના ટૂંકા સમયગાળામાં 562 દેશી રજવાડાઓને એકત્રિત કરીને અખંડ ભારતના નિર્માણનો ઇતિહાસ રચ્યો હતો. આ સાથે તેમણે વડોદરાના ગાયકવાડી શાસનના ઇતિહાસને પણ યાદ કર્યો હતો.
પાણી, વીજળી અને વિકાસની વાત
રાજ્યમાં થયેલા વિકાસની ચર્ચા કરતા તેમણે કહ્યું હતું કે, દાયકાઓ પહેલા ગુજરાતમાં પાણી માટે ભારે વલખા મારવા પડતા હતા, પરંતુ વડાપ્રધાન નરેન્દ્ર મોદીના દીર્ઘદ્રષ્ટિપૂર્ણ વિઝને પાણીની આ ગંભીર સમસ્યાને સદંતર ભૂતકાળ બનાવી દીધી છે અને આજે રાજ્યના દરેક ગામડાં સુધી વીજળી અને શુદ્ધ પાણી પહોંચી ચૂક્યા છે. ખેડૂત આજરોજ સ્માર્ટફોન વાપરીને પોતાના આંગળીના ટેરવે દુનિયાભરની તમામ માહિતી મેળવી રહ્યો છે. વડોદરાના વિકાસ માટે પૂર નિવારણ બાબતે વાત કરતા તેમણે જણાવ્યું કે વિશ્વામિત્રી નદી અને સૂર્યા નદી પર 13 ચેકડેમ બનાવવામાં આવ્યા છે. આ ઉપરાંત વડોદરા જિલ્લાના આદિવાસી વિદ્યાર્થીઓ માટે નવા 3 છાત્રાલયોનું નિર્માણ કરવામાં આવશે, જેમાં ડભોઈ ખાતે 160 વિદ્યાર્થીઓની ક્ષમતાવાળા કુમાર અને કન્યા છાત્રાલય બનાવવામાં આવશે.
સ્વચ્છતા, વ્યસનમુક્તિ અને ડ્રગ્સ માફિયાઓ સામે લાલ આંખ
નાગરિકોને આહ્વાન કરતા નાયબ મુખ્યમંત્રીએ જણાવ્યું હતું કે, આપણે સૌ એક ગુજરાતી અને ભારતીય તરીકે દેશની પ્રગતિમાં સહયોગી બનીએ. જો આપણે આપણા વિસ્તારના સ્વચ્છતા કર્મચારીઓની મદદ ન કરી શકીએ તો આપણી ડિગ્રીઓ કોઈ કામની નથી. આપણે સૌએ મળીને રોડ-રસ્તાઓ સાફ રાખવા જોઈએ અને ગુજરાતને દેશનું સૌથી સ્વચ્છ રાજ્ય બનાવવું જોઈએ. તેમણે કાર્યક્રમમાં ઉપસ્થિત સૌને કોઈપણ પ્રકારના વ્યસનમાં નહીં ફસાવવાની શપથ લેવડાવી હતી. જો મિત્રો કે કોઈ પરિચિત વ્યક્તિ ડ્રગ્સની લપેટમાં આવી ગયા હોય તો તેમને બહાર લાવવા માટે સૌથી પહેલા તેમના પરિવારને જાણ કરવી અને જો તે ના સુધરે તો તુરંત પોલીસને જાણ કરવા અનુરોધ કર્યો હતો.
નાયબ મુખ્યમંત્રીની ચેતવણી
તેમણે સ્પષ્ટ શબ્દોમાં ચેતવણી આપતા કહ્યું હતું કે ગુજરાત આ દેશમાં સૌથી વધુ ડ્રગ્સ પકડનાર અગ્રેસર રાજ્ય બનશે. 1600 કિલોમીટરની વિશાળ દરિયાઈ સીમા મારફતે પાકિસ્તાનથી ડ્રગ્સ ઘુસાડવાની કોઈ કોશિશ કરશે તો ગુજરાત પોલીસ તેનો સામનો કરવા માટે સંપૂર્ણપણે સજ્જ છે. છેલ્લા 5 વર્ષમાં ભારત દેશમાં ડ્રગ્સ ઘુસાડતા પાકિસ્તાનીઓ અને આજુબાજુના દેશોના 75 જેટલા તત્વોને જેલના સળિયા પાછળ ધકેલી દેવામાં આવ્યા છે અને તેમને આજદિન સુધી જામીન મળ્યા નથી તેમજ ભવિષ્યમાં પણ ક્યારેય જામીન મળવા નહીં દઈએ.
હર્ષભાઈ સંઘવીની અપીલ
સોશિયલ મીડિયાના માધ્યમથી સામાજિક દૂષણો સામે લડી રહેલા યુવા સાથીઓનો આભાર માનીને તેમણે અભિનંદન પાઠવ્યા હતા અને સૌને સામાજિક સમરસતા જાળવીને એકબીજાને માન આપવા અપીલ કરી હતી.
આ પણ વાંચો: Independence Day: Vadodara માં સ્વાતંત્ર્ય પર્વની ઉજવણી, હર્ષભાઈ સંઘવીએ કર્યું ધ્વજારોહણ
