ગુજરાતમાં રેડ એલર્ટ વચ્ચે મેઘરાજાની ધાકડ એન્ટ્રી: 2 કલાકમાં 5 ઈંચ આભ ફાટ્યું!

નર્મદા જિલ્લામાં આભ ફાટ્યું: સાગબારા અને ગરૂડેશ્વરમાં 5-5 ઈંચ

વરસાદના આંકડા પર નજર કરીએ તો નર્મદા (Narmada) જિલ્લામાં મેઘરાજાએ ભારે તાંડવ મચાવ્યું છે. સવારે 6:00 થી 8:00 વાગ્યા સુધીના માત્ર 2 કલાકના સમયગાળામાં જ સાગબારા (Sagbara) અને ગરૂડેશ્વર (Garudeshwar) તાલુકામાં 5-5 ઈંચ આકાશી પાણી ઝીંકાયું હતું. આ ભારે વરસાદના કારણે નીચાણવાળા વિસ્તારોમાં પાણી ભરાઈ ગયા છે અને સ્થાનિક નદી-નાળાઓ બે કાંઠે વહેવા લાગ્યા છે.

નાંદોદ અને તિલકવાડામાં મૂસળધાર વરસાદ

નર્મદા જિલ્લાના અન્ય વિસ્તારોમાં પણ મેઘરાજાની ભારે ધડબડાટી જોવા મળી છે. નાંદોદ (Nandod) તાલુકામાં આ જ 2 કલાક દરમિયાન 4 ઈંચ જેટલો ભારે વરસાદ નોંધાયો છે, જ્યારે તિલકવાડામાં (Tilakwada) સાડા 3 ઈંચ વરસાદ વરસ્યો છે. સતત વરસી રહેલા વરસાદને કારણે જનજીવન પર વ્યાપક અસર જોવા મળી રહી છે.

મધ્ય ગુજરાતના બાલાસિનોર, આણંદ અને વડોદરામાં પણ મેઘમહેર

દક્ષિણ ગુજરાત ઉપરાંત મધ્ય ગુજરાતના જિલ્લાઓમાં પણ સવારથી જ વાતાવરણમાં પલટો આવ્યો છે. મહિસાગર જિલ્લાના બાલાસિનોરમાં (Balasinor) 3 ઈંચ વરસાદ નોંધાયો છે. આ ઉપરાંત આણંદ (Anand) અને વડોદરા (Vadodara) શહેરમાં પણ 2-2 ઈંચ વરસાદ ખાબક્યો છે. નસવાડી (Naswadi) તાલુકામાં 2 ઈંચ તથા બોરસદમાં (Borsad) પોણા 2 ઈંચ વરસાદ નોંધાતા રસ્તાઓ પર પાણી ફરી વળ્યા હતા.

સવારે 2 કલાકમાં રાજ્યના 82 તાલુકાઓમાં વરસાદ

રાજ્યમાં સવારે 6:00 થી 8:00 વાગ્યા સુધીના માત્ર 2 કલાકના સમયગાળામાં જ કુલ 82 તાલુકાઓમાં મેઘમહેર નોંધાઈ છે. હવામાન વિભાગના જણાવ્યા અનુસાર, આગામી સમયમાં પણ રાજ્યના કેટલાક ભાગોમાં ભારેથી અતિભારે વરસાદની શક્યતા સેવાઈ રહી છે, જેને પગલે તંત્ર દ્વારા સાવચેતીના પગલાં લેવામાં આવ્યા છે.

આ પણ વાંચો: સાવધાન! ગુજરાત માટે આગામી 48 કલાક અત્યંત ભયાનક, 15 થી 20 ઇંચ વરસાદની ભયાનક આગાહી