Vadodara News: કેમિકલ બનાવતી કંપનીમાં અચાનક આગ ફાટી નીકળી

સ્ક્રેપ બળીને ખાખ થઈ ગયો

પ્રાપ્ત વિગતો અનુસાર આગ કંપનીની પાછળના ભાગમાં આવેલી ખુલ્લી જગ્યામાં લાગી હતી. આ ખુલ્લા મેદાનમાં કંપનીનો પ્લાસ્ટિક અને અન્ય નકામો સ્ક્રેપ (ભંગાર) મોટી માત્રામાં સંગ્રહિત કરીને રાખવામાં આવ્યો હતો. કોઈ અજ્ઞાત કારણોસર આ સ્ક્રેપના જથ્થામાં અચાનક સ્પાક કે આગ લાગ્યા બાદ તે ઝડપથી પ્રસરી ગઈ હતી. જોતજોતામાં આગે વિકરાળ સ્વરૂપ ધારણ કરી લીધું હતું અને કંપનીનો લાખો રૂપિયાનો સ્ક્રેપ બળીને સંપૂર્ણપણે ખાખ થઈ ગયો હતો. સદનસીબે, આગ કેમિકલના મુખ્ય પ્રોસેસિંગ યુનિટ સુધી પહોંચે તે પહેલાં જ કંપનીના સતર્ક કર્મચારીઓએ ભારે જહેમત ઉઠાવી હતી. કર્મચારીઓએ તાત્કાલિક પાણીનો મારો ચલાવીને આગ પર કાબૂ મેળવી લીધો હતો, જેને કારણે એક બહુ મોટી જાનહાનિ અને વિસ્ફોટની દુર્ઘટના ટળી હતી.

કંપનીની બેદરકારી?

જો કે, આ ઘટનાએ કંપની વહીવટદારોની ગંભીર બેદરકારી ફરી એકવાર છતી કરી છે. સ્થાનિક સૂત્રોના જણાવ્યા અનુસાર, આ કંપનીમાં આગ લાગવાની આ કોઈ પ્રથમ ઘટના નથી, ભૂતકાળમાં પણ અનેકવાર અહીં નાની-મોટી આગ લાગવાના બનાવો બની ચૂક્યા છે. વારંવાર બનતી આવી ઘટનાઓ છતાં કંપની તંત્ર દ્વારા સુરક્ષાના નક્કર પગલાં કે ફાયર સેફ્ટીના નિયમોનું કડક પાલન કરવામાં આવતું ન હોવાનો આક્ષેપ થઈ રહ્યો છે.

 આ પણ વાંચોઃ Vadodara News: અપહરણ અને લૂંટના ભાગેડુ આરોપીનું મોત, જાણો એકાએક શું થયું?