Vadodara: એક્સપ્રેસ વે કે ડેથ વે? કરજણ પાસે ભયાનક અકસ્માતમાં કારનો કચ્ચરઘાણ, 3 લોકોના જીવ ગયા

સેલવાસથી ખાટુ શ્યામ જતો હતો પરિવાર

મળતી પ્રાથમિક માહિતી મુજબ આ અકસ્માતનો ભોગ બનેલો પરિવાર સેલવાસનો રહેવાસી હતો. આખો પરિવાર કાર લઈને રાજસ્થાન સ્થિત પ્રસિદ્ધ ધાર્મિક સ્થળ ખાટુ શ્યામના દર્શન કરવા માટે નીકળ્યો હતો. ભક્તિભાવ સાથે પવિત્ર યાત્રાએ નીકળેલા આ પરિવારની ખુશીઓ પળભરમાં શોકમાં ફેરવાઈ ગઈ હતી. વડોદરાના કરજણ પાસેથી પસાર થતી વખતે કોઈ કારણોસર એક્સપ્રેસ વે પર કાર સાઈડમાં ઉભી રાખવામાં આવી હતી. આ દરમિયાન પાછળથી આવી રહેલા આઈસર ટેમ્પોના ચાલકે ગફલતભરી રીતે વાહન હંકારીને કારને પાછળથી ધડાકાભેર ટક્કર મારી દીધી હતી.

એક્સપ્રેસ વે પર સતત બીજા દિવસે અકસ્માતથી તંત્ર સામે સવાલો

આ કરુણ અકસ્માતમાં પરિવારના ત્રણ સભ્યોએ પોતાના જીવ ગુમાવ્યા છે, જ્યારે ઈજાગ્રસ્ત થયેલી એક વ્યક્તિને તાત્કાલિક સારવાર અર્થે નજીકની હોસ્પિટલમાં ખસેડવામાં આવી છે, જ્યાં તેની સ્થિતિ નાજુક હોવાનું જાણવા મળ્યું છે. ઉલ્લેખનીય છે કે દિલ્હી-મુંબઈ એક્સપ્રેસ વે પર સતત બીજા દિવસે અકસ્માતની આ બીજી મોટી ઘટના છે, જેને પગલે વાહનચાલકોની સુરક્ષા અને સ્પીડ લિમિટના નિયમોને લઈને ફરી એકવાર મોટા સવાલો ઉભા થયા છે.

આ પણ વાંચોઃ Delhi Mumbai Expressway Accident : વડોદરાના પાદરા પાસે ભયાનક ત્રિપલ અકસ્માત, ઇકો કારના કુચ્ચેકુચ્ચા ઉડ્યા, 4 ના મોત

આ પણ વાંચોઃ Hit and Run in Vadodara: ગદા સર્કલ પાસે GSRTC બસે શ્રમજીવીને કચડ્યો, ચાલક બસ મૂકી ફરાર