Vadodara DCP Deputy Mayor Controversy : ગણેશ વિસર્જન દરમિયાન વડોદરાના નવલખી કૃત્રિમ તળાવ ખાતે પદાધિકારીઓની ગાડીઓને રોકવાના મુદ્દે વિવાદ સર્જાયો હતો. આ સમગ્ર ઘટનાનો વીડિયો સોશિયલ મીડિયા પર વાયરલ થયા બાદ મામલો ચર્ચામાં આવ્યો છે. વાયરલ વીડિયોમાં ડેપ્યુટી મેયર આદિત્ય પટેલ અને DCP મંજીતા વણજારા વચ્ચે બોલાચાલી થતી જોવા મળે છે.
પદાધિકારીઓની ગાડીઓને કૃત્રિમ તળાવ સુધી જવા ન દેવાતા વિવાદ
મળતી માહિતી મુજબ, ગણેશ વિસર્જન માટે નવલખી કૃત્રિમ તળાવ ખાતે વ્યવસ્થા કરવામાં આવી હતી. આ દરમિયાન કોર્પોરેશનના પદાધિકારીઓની ગાડીઓને કૃત્રિમ તળાવ સુધી જવા દેવામાં આવી ન હતી. પોલીસ દ્વારા વાહનો રોકવામાં આવતા સમગ્ર મામલો ઉગ્ર બન્યો હતો. ડેપ્યુટી મેયર આદિત્ય પટેલના જણાવ્યા મુજબ, સ્ટેન્ડિંગ કમિટીના ચેરમેન વર્ષાબેન વ્યાસની ગાડીને પોલીસ જવાનોએ રોકી હતી. જેના કારણે ચેરમેનને ગાડીમાંથી ઉતરીને ચાલતા આવવું પડ્યું હતું. ત્યારબાદ ચેરમેન અને DCP વચ્ચે બોલાચાલી થઈ હતી.
‘મામલો થાળે પાડતો હતો ત્યારે DCP બોલ્યા’
ડેપ્યુટી મેયર આદિત્ય પટેલે જણાવ્યું કે તેઓ મામલો થાળે પાડવાનો પ્રયાસ કરી રહ્યા હતા ત્યારે DCP તરફથી કેટલીક ટિપ્પણી કરવામાં આવી હતી. તેમના કહેવા પ્રમાણે, ટ્રાફિક અને કામના ભારણને કારણે કદાચ અધિકારી તરફથી આવું બોલાયું હોય અને આ વાતને બહુ ગંભીરતાથી લેવાની જરૂર નથી.
‘બેક પેઇન હોવા છતાં ચાલતા જવું પડ્યું’
બીજી તરફ, સ્ટેન્ડિંગ કમિટીના ચેરમેન વર્ષાબેન વ્યાસે સમગ્ર ઘટનાને લઈને પોતાની વાત રજૂ કરી છે. તેમણે જણાવ્યું કે તેમની ગાડીને કૃત્રિમ તળાવ સુધી જવા દેવામાં આવી નહોતી અને બેક પેઇન હોવા છતાં તેમને ચાલીને જવું પડ્યું હતું. વર્ષાબેન વ્યાસના જણાવ્યા મુજબ, તેમણે આ અંગે DCPને વાત કરી હતી. ત્યારે DCPએ તેમને કથિત રીતે કહ્યું હતું કે, ‘પગ દુખતા હોય તો ઘરે રહેવું જોઈએ.’ આ નિવેદન બાદ સમગ્ર મામલો વધુ ચર્ચામાં આવ્યો છે.
DCPએ પણ પદાધિકારીઓ સામે ઉઠાવ્યા સવાલો
વાયરલ વીડિયોમાં DCP મંજીતા વણજારા તરફથી પણ પદાધિકારીઓની હાજરી અને સમગ્ર મામલાને લઈને સવાલો ઉઠાવવામાં આવ્યા હોવાનું સામે આવ્યું છે. વીડિયોમાં DCP દ્વારા ‘પ્રજા સામે રાઈનો પર્વત કેમ કરો છો?’તેવી ટિપ્પણી કરવામાં આવી હોવાનું જણાવવામાં આવી રહ્યું છે.
ગણેશ વિસર્જનની વ્યવસ્થાને લઈને થયો વિવાદ
સમગ્ર મામલો ગણેશ વિસર્જન દરમિયાન કરવામાં આવેલી પોલીસ વ્યવસ્થા અને કોર્પોરેશનના પદાધિકારીઓના વાહનોને કૃત્રિમ તળાવ સુધી જવા દેવા કે નહીં તે મુદ્દે શરૂ થયો હોવાનું બંને પક્ષના નિવેદનો પરથી સામે આવે છે. ભાજપના નેતાઓ અને કોર્પોરેશનના પદાધિકારીઓની હાજરીમાં થયેલી આ બોલાચાલીનો વીડિયો વાયરલ થતાં હવે મામલો ચર્ચામાં છે. હાલ સમગ્ર ઘટનાને લઈને ડેપ્યુટી મેયર આદિત્ય પટેલ અને સ્ટેન્ડિંગ કમિટીના ચેરમેન વર્ષાબેન વ્યાસે પોતપોતાની રજૂઆત કરી છે. વાયરલ વીડિયોમાં દેખાતી ઘટનાના સંદર્ભમાં બંને પક્ષના નિવેદનો બાદ મામલો વધુ ચર્ચામાં આવ્યો છે.
આ પણ વાંચો : LIVE: Studio on Wheels 2.0 launch : અંબાજીમાં DyCM હર્ષભાઈ સંઘવીએ માઈ ભક્તો સાથે કરી ચર્ચા, સ્વચ્છતા દૂતોને હાથ જોડી કર્યા વંદન
