Vadodara: દુષ્કર્મનો આરોપી પોલીસને ચકમો આપી ભાગી છૂટ્યો, કોર્ટમાં રજૂ કરવા લવાયો હતો

Vadodara કોર્ટમાં પોલીસને થાપ આપીને પલાયન

મળતી જાણકારી અનુસાર વર્ષ 2020 માં એક નિર્દોષ 8 વર્ષની બાળકી સાથે દુષ્કર્મ આચરવાના જઘન્ય અપરાધના આરોપીને નિયત તારીખ હોવાથી જેલમાંથી વડોદરા કોર્ટમાં રજૂ કરવા માટે લાવવામાં આવ્યો હતો. ત્યારે આરોપીએ શૌચાલય (Toilet) જવાનું બહાનું કાઢ્યું હતું. શૌચાલયથી પરત ફરતી વખતે તકનો લાભ ઉઠાવી આરોપી કોર્ટના પહેલા માળે (First Floor) થી પોલીસ જાપ્તાને થાપ આપીને ભાગી છૂટ્યો હતો.

વર્ષ 2020 નો છે કેસ

આ આરોપી અત્યંત ગંભીર ગુનામાં સંડોવાયેલો છે. વર્ષ 2020 માં વડોદરાના સયાજીગંજ પોલીસ સ્ટેશન (Sayajiganj Police Station) વિસ્તારમાં 8 વર્ષની સગીર બાળકી પર દુષ્કર્મ ગુજારવા બદલ ગુનો નોંધવામાં આવ્યો હતો. ત્યારથી આ કેસની કાયદાકીય પ્રક્રિયા ચાલી રહી હતી. આવા ગંભીર ગુનાના આરોપીના ફરાર થવાથી પીડિત પરિવારમાં ફરી ભયનો માહોલ જોવા મળી રહ્યો છે.

પોલીસની કામગીરી પર સવાલો

જાપ્તામાં રહેલા પોલીસકર્મીઓની હાજરી છતાં આરોપી કેવી રીતે ભાગી ગયો તે અત્યારે તપાસનો વિષય છે. કોર્ટ જેવા સુરક્ષિત ગણાતા સ્થળેથી આરોપીનું ફરાર થવું એ પોલીસ તંત્રની ગંભીર બેદરકારી સૂચવે છે. શું આરોપીને ભાગવામાં કોઈએ મદદ કરી હતી કે પછી સુરક્ષા વ્યવસ્થામાં ક્ષતિ રહી ગઈ હતી, તે દિશામાં ઉચ્ચ અધિકારીઓ દ્વારા તપાસ શરૂ કરવામાં આવી છે.

આ પણ વાંચોઃ Kheda Water Crisis: બીમાર પડીએ તો જવાબદાર કોણ? પીજના ગ્રામજનો મરેલો ઉંદર લઈ પંચાયતે પહોંચ્યા