Vadodara News: વડોદરા શહેરમાં ટ્રાફિક પોલીસની દાદાગીરીનો એક ચોંકાવનારો કિસ્સો સામે આવ્યો છે, જેમાં ફરજ પરના એક પીએસઆઈ દ્વારા નાગરિક સાથે કરવામાં આવેલી ગેરવર્તણૂકને લઈને શહેરમાં ભારે ચર્ચા જાગી છે. આ ઘટના વડોદરાના સમા વિસ્તાર નજીક બની હતી, જ્યાં ટ્રાફિક પોલીસે ચેકિંગના બહાને એક કાર અટકાવી હતી.
શું હતી સમગ્ર ઘટના?
પ્રાપ્ત માહિતી મુજબ, ગાજરાવાડીથી રણોલી તરફ સામાન ભરેલી એક ગાડી જઈ રહી હતી. આ દરમિયાન રસ્તામાં સમા નજીક ટ્રાફિક પોલીસે આ ગાડીને અટકાવી હતી અને વાહનના દસ્તાવેજો કે અન્ય નિયમો બાબતે તપાસ શરૂ કરી હતી. પોલીસે ગાડી ડિટેન કરવાની કાર્યવાહી શરૂ કરતા ડ્રાઈવરે તરત જ ગાડીના માલિકને ફોન કરીને ઘટનાસ્થળે બોલાવી લીધા હતા. ગાડીના માલિકે સ્થળ પર આવીને ટ્રાફિક પોલીસ અધિકારીને ગાડી ડિટેન ન કરવા માટે વિનંતી કરી હતી અને પોતાની રજૂઆત રજૂ કરી હતી.
પીએસઆઈ માલીવાડની દાદાગીરી
ગાડીના માલિક દ્વારા કરવામાં આવેલી આ રજૂઆતથી ફરજ પર હાજર પીએસઆઈ માલીવાડ એકાએક ઉશ્કેરાઈ ગયા હતા. કોઈ પણ પ્રકારની ગંભીર દલીલ કે ઘર્ષણ થયા વગર જ પોલીસ અધિકારીએ પોતાની મર્યાદા ઓળંગીને ગાડીના માલિકને જાહેરમાં લાફો ઝીંકી દીધો હતો. ટ્રાફિક પોલીસ દ્વારા કરવામાં આવેલી આ દાદાગીરી જોઈને આસપાસના લોકો પણ સ્તબ્ધ થઈ ગયા હતા.
લોકોમાં રોષ
પોલીસ અધિકારી દ્વારા નાગરિક પર હાથ ઉગામવાની ઘટનાને લઈને સ્થાનિકોમાં ભારે રોષ જોવા મળી રહ્યો છે. પ્રજાના રક્ષક ગણાતી પોલીસ જ્યારે આવી રીતે જાહેરમાં દાદાગીરી પર ઉતરી આવે, ત્યારે તેમની કામગીરી સામે અનેક સવાલો ઊભા થાય છે. આ ઘટના અંગે હવે પોલીસ વિભાગના ઉચ્ચ અધિકારીઓ શું પગલાં લે છે, તે જોવું મહત્વનું રહેશે.
આ પણ વાંચો: Pavagadh News: પાવાગઢમાં મોટી દુર્ઘટના, પથ્થર પડતા ચારથી વધુ લોકો દબાયા, 2 ના મોત
