VGRC Central Gujarat : ઔદ્યોગિક કાયાપલટ: ઝડપ અને વહન ક્ષમતામાં બમણો વધારો

ગુજરાત રાજ્ય હંમેશાં દેશના ઔદ્યોગિક અને આર્થિક વિકાસમાં અગ્રેસર રહ્યું છે. રાજ્યના વિવિધ પ્રદેશોનો સંતુલિત વિકાસ થાય અને સ્થાનિક કક્ષાએ ઉદ્યોગોને વેગ મળે તે હેતુથી સમયાંતરે 'વાઇબ્રન્ટ ગુજરાત રિજનલ કોન્ફરન્સ'નું ભવ્ય આયોજન કરવામાં આવે છે. આ જ શૃંખલા અંતર્ગત આગામી તારીખ 29 અને 30 જૂનના રોજ વડોદરા ખાતે મધ્ય ગુજરાત રિજનલ કોન્ફરન્સ યોજાવા જઈ રહી છે. આ કોન્ફરન્સનો મુખ્ય ઉદ્દેશ્ય મધ્ય ગુજરાતને એક અદ્યતન 'લોજિસ્ટિક્સ પાવરહાઉસ' તરીકે વિકસાવવાનો છે. આ કાયાપલટ પાછળ વડોદરાના વરણામા ખાતે સ્થાપિત 'ડેડિકેટેડ ફ્રેઇટ કોરિડોર' -Dedicated freight corridor (DFC) એક મજબૂત ચાલકબળ અને ગેમ ચેન્જર સાબિત થઈ રહ્યો છે, જે વર્ષો જૂની ધીમી પરિવહન વ્યવસ્થાને એક નવી અને આધુનિક દિશા આપી રહ્યો છે.

VGRC Central Gujarat : ઔદ્યોગિક કાયાપલટ: ઝડપ અને વહન ક્ષમતામાં બમણો વધારો

વડોદરા જિલ્લાના 30 ગામોમાંથી પસાર થતો આ ડેડિકેટેડ ફ્રેઈટ કોરિડોર (DFCCIL Vadodara)દેશના માલપરિવહન ક્ષેત્રે એક અભૂતોપૂર્વ સીમાચિહ્ન સાબિત થઈ રહ્યો છે:

ઝડપમાં ધરખમ વધારો: જૂના પરંપરાગત ટ્રેક પર ગુડ્ઝ ટ્રેનની સરેરાશ ઝડપ માત્ર 25-26 કિમી/કલાક રહેતી હતી, જે DFCના કારણે હવે 70 કિમી/કલાક સુધી પહોંચી ગઈ છે. ડેડિકેટેડ ફ્રેઈટ કોરિડોર કોર્પોરેશન ઓફ ઈન્ડિયા લિમિટેડ (DFCCIL) દ્વારા આ ઝડપને 100 કિમી/કલાક સુધી લઈ જવાનો લક્ષ્યાંક છે.

ટ્રેનોની સંખ્યામાં વધારો: હાલમાં વડોદરા-મુંબઈ રૂટ પર દર 24 કલાકમાં અંદાજે 50 થી 70 ગુડ્ઝ ટ્રેનો દોડી રહી છે. આગામી 2 થી 3 મહિનામાં તમામ માલગાડીઓને આ સ્પેશિયલ ટ્રેક પર ડાયવર્ટ કરાશે, જેથી આ સંખ્યા વધીને 110 થી 140 સુધી પહોંચશે અને રેલવેની વહન ક્ષમતા બમણી થશે.

પેસેન્જર ટ્રેનોને ફાયદો: જૂના ટ્રેક પર માલગાડીઓનું ભારણ શૂન્ય થતાં જ, પેસેન્જર ટ્રેનોની સંખ્યા અને ઝડપ બંનેમાં મોટો વધારો કરી શકાશે.

ક્રાંતિકારી પરિવર્તનનું જીવંત ઉદાહરણ

દૂધની સફર: 17 કલાકથી ઘટીને માત્ર 7 કલાક!

માલગાડી સમર્પિત ટ્રેક અને 'ટ્રક ઓન ટ્રેન' સેવાના કારણે મહેસાણાની દૂધ સાગર ડેરીથી દિલ્હી સુધીના પરિવહન સમયમાં અંદાજે 60% નો ઘટાડો નોંધાયો છે. અગાઉ જે દૂધના ટેન્કરોને દિલ્હી પહોંચતા 17 કલાક લાગતા હતા, તે હવે માત્ર 7 કલાકમાં પહોંચે છે. આ ગતિશીલતાના કારણે હજારો લીટર ડિઝલની બચત, ઇંધણ ખર્ચમાં ઘટાડો અને કાર્બન ઉત્સર્જનમાં મોટી રાહત મળી છે.

પરિવહન ખર્ચની સરખામણી અને આર્થિક ફાયદો

આર્થિક અને વ્યાપારિક દૃષ્ટિએ ડેડિકેટેડ રેલવે પરિવહન અન્ય માધ્યમો કરતાં ઘણું સસ્તું અને કાર્યક્ષમ છે:

સામાન્ય જનતાને ફાયદો: આ સસ્તા પરિવહનને કારણે બજારમાં મળતી જીવનજરૂરી વસ્તુઓની આખરી કિંમતમાં પ્રતિ ટન ₹6 થી ₹10 સુધીનો મોટો ફાયદો સામાન્ય જનતાને મળશે.

રોડ ટ્રાફિકમાં ઘટાડો: એક માલગાડી એકસાથે 400 જેટલા ટ્રકોનું વજન વહન કરવાની ક્ષમતા ધરાવે છે. આ પ્રોજેક્ટ દેશભરમાં પૂર્ણ ક્ષમતાથી કાર્યરત થતાં રાષ્ટ્રીય ધોરીમાર્ગો પર દોડતા ભારે ટ્રકોના ટ્રાફિકમાં આશરે 40% નો સીધો ઘટાડો નોંધાશે.

અદ્યતન ટેકનોલોજી અને વૈશ્વિક કનેક્ટિવિટી

પશ્ચિમ ડેડિકેટેડ ફ્રેઈટ કોરિડોર હેઠળ વડોદરાથી મુંબઈના જવાહરલાલ નેહરુ પોર્ટ (JNPT) સુધી માલગાડીઓને પણ પેસેન્જર ટ્રેનોની જેમ ટાઈમ ટેબલ મુજબ ચલાવવાની તૈયારીઓ તેજ કરી દેવામાં આવી છે.

1.ટ્રેન મેનેજમેન્ટ સિસ્ટમ: ટ્રાફિકના સચોટ સંચાલન અને મોનિટરિંગ માટે અહીં અત્યાધુનિક ટેકનોલોજી કાર્યરત છે.

2.ગતિશક્તિ કાર્ગો ટર્મિનલ: વધતા જતા વ્યાપારી ટ્રાફિકને પહોંચી વળવા માટે વડોદરા ખાતે ગતિશક્તિ કાર્ગો ટર્મિનલ સ્થાપવાનું પણ આયોજન છે.

3.નિકાસકારો માટે આશીર્વાદરૂપ: મુંબઈ ઉપરાંત ગુજરાતના મુન્દ્રા, પીપાવાવ અને કંડલા પોર્ટ સાથેની ઉત્કૃષ્ટ કનેક્ટિવિટીને કારણે રાજ્યના નિકાસકારોને વૈશ્વિક સ્તરે મોટો વેગ મળી રહ્યો છે.

ઉપરોક્ત વિગતો પરથી સ્પષ્ટ થાય છે કે ડેડિકેટેડ ફ્રેઇટ કોરિડોર માત્ર માલસામાનની હેરાફેરી ઝડપી બનાવવાનું માધ્યમ નથી, પરંતુ તે મધ્ય ગુજરાત અને સમગ્ર રાજ્યના આર્થિક વિકાસની નવી કરોડરજ્જુ છે. વાઇબ્રન્ટ ગુજરાત રિજનલ કોન્ફરન્સના માધ્યમથી જ્યારે નવા રોકાણો આકર્ષવામાં આવી રહ્યા છે, ત્યારે DFC જેવી વિશ્વસ્તરીય માળખાગત સુવિધાઓ વૈશ્વિક રોકાણકારો માટે મુખ્ય આકર્ષણ બનશે. ઇંધણની બચત, પર્યાવરણની જાળવણી અને વ્યાપારી ખર્ચમાં ઘટાડો કરતો આ પ્રોજેક્ટ આગામી સમયમાં ગુજરાતને વૈશ્વિક વ્યાપાર નકશા પર અગ્રેસર રાખવામાં પાયાની અને ઐતિહાસિક ભૂમિકા ભજવશે તે નિઃશંક છે.

આ પણ વાંચો : Farmers Protest News: ખેતરમાં વીજ લાઈન મુદ્દે સરકાર સક્રિય, કૃષિ મંત્રી જીતુભાઈનું મોટું નિવેદન