શ્રદ્ધા અને અંધશ્રદ્ધા વચ્ચેની પાતળી રેખા
પોતાના નિવેદનમાં શિવાભાઈ ભૂરિયાએ કહ્યું કે "શ્રદ્ધાથી મનોકામનાઓ (Wishes) પૂર્ણ થઈ શકે છે, પરંતુ અંધશ્રદ્ધાથી દૂર રહેવું એ સમયની માગ છે." તેમણે ખાસ કરીને સ્વાસ્થ્યના મુદ્દે ભાર મૂકતા જણાવ્યું કે, બીમારીના સમયે દોરા-ધાગા કે ઝાડા-ફૂંક કરાવવાને બદલે ડૉક્ટરની સારવાર લેવી અત્યંત આવશ્યક છે. વધુમાં કહ્યું દુનિયામાં દેવ છે પણ દુવા અને દેવ બંને કરવા જોઈએ.
"પરિવારમાં ભાઈ સાથે ભાઈ ન બેસે તે એક અંધશ્રદ્ધા છે"
શિવાભાઈ ભૂરિયાએ સામાજિક એકતા પર પણ ભાર મૂક્યો હતો. તેમણે કહ્યું કે, "પરિવારમાં ભાઈ-ભાઈ વચ્ચે મતભેદ ઊભા કરવા કે ભાઈ સાથે ભાઈ ભેગો ન બેસે તેવું વાતાવરણ બનાવવું, તે સંપૂર્ણપણે અંધશ્રદ્ધા છે."
સાંસદ ગેનીબેને શું આપ્યું હતું નિવેદન?
સાંસદ ગેનીબેન ઠાકોરે તેમના સંબોધનમાં કહ્યું હતું કે ઈશ્વરની આરાધના કરવી એ વ્યક્તિગત બાબત છે, પરંતુ તે અંધશ્રદ્ધાની સીમામાં ન જવી જોઈએ. તેમણે કહ્યું કે, "તમે દીવા કરો, ધૂપ કરો, માનતા રાખો કે જમણવાર કરો, પરંતુ જો તમારી કર્મો સારા નહીં હોય તો કુદરત પણ તમારો સાથ નહીં આપે."
'અંધશ્રદ્ધાથી દૂર રહી દીકરા-દીકરીઓના ભણાવો'
મહિલાઓને વિશેષ ટકોર કરતા સાંસદ ગેનીબેને ઉમેર્યું હતું કે બહેનોએ અંધશ્રદ્ધાથી દૂર રહીને પોતાના દીકરા-દીકરીઓને ભણાવવા જોઈએ. તેમણે કહ્યું કે આજના યુગમાં શિક્ષણ જ એકમાત્ર એવું માધ્યમ છે, જેના દ્વારા સમાજની કાયાપલટ થઈ શકે છે. વધુમાં ચમત્કારોમાં વિશ્વાસ રાખતા વર્ગને પણ તેમણે આડેહાથ લીધા હતા. સાંસદે પ્રશ્ન ઉઠાવતા કહ્યું હતું કે, "ભુવાજીના કહેવા પર ભાઈઓમાં ક્યાં કોઈ સંપ કરે છે?" તેમણે સમાજમાં એકતાના અભાવ અને ભુવાઓના કહેવા મુજબ લોકોના ગેરમાર્ગે દોરાવાની સ્થિતિ પર દુઃખ વ્યક્ત કર્યું હતું.
આ પણ વાંચોઃ દીવા કરો, માનતા રાખો પણ સારા કર્મ વિના કુદરત સાથ નહીં આપે: MP Geniben Thakor
