ગુલામ નબી હવે કોંગ્રેસથી 'આઝાદ', તમામ હોદ્દા પરથી રાજીનામું

ગુલામ નબી આઝાદે કહ્યું કે, ભારત જોડો યાત્રાને બદલે કોંગ્રેસ જોડો યાત્રા કાઢવી જોઈએ.

ગુલામ નબી આઝાદ લાંબા સમયથી કોંગ્રેસથી નારાજ હતા. તેઓ કોંગ્રેસના નારાજ નેતાઓના G-23 જૂથમાં પણ સામેલ હતા. જી-23 જૂથ સતત કોંગ્રેસમાં ઘણા ફેરફારોની માંગ કરી રહ્યું છે. આ પહેલા કોંગ્રેસના અન્ય વરિષ્ઠ નેતા કપિલ સિબ્બલે પાર્ટીમાંથી રાજીનામું આપી દીધું હતું. સપા દ્વારા તેમને રાજ્યસભામાં પણ મોકલવામાં આવ્યા છે.

ગુલામ નબી આઝાદે કહ્યું છે કે, જાન્યુઆરી 2013માં રાહુલ ગાંધીને તમારા દ્વારા કોંગ્રેસ ઉપાધ્યક્ષ બનાવવામાં આવ્યા હતા, ત્યાર બાદ તેમણે પાર્ટીમાં વિચાર-વિમર્શની પ્રણાલીનો અંત લાવ્યો હતો. તમામ વરિષ્ઠ અને અનુભવી નેતાઓને બાજુમાંથી કાઢી નાખવામાં આવ્યા હતા અને કોઈ અનુભવ ન હોય તેવા લોકોનું વર્તુળ પક્ષ ચલાવવાનું શરૂ કર્યું હતું.

આ સાથે ગુલામ નબી આઝાદે પત્રમાં રાહુલ ગાંધી દ્વારા વટહુકમની કોપી ફાડવાની ઘટનાનો પણ ઉલ્લેખ કર્યો છે. તેમણે આને 2014ની લોકસભા ચૂંટણીમાં કોંગ્રેસની હારનું કારણ જણાવ્યું છે. તેમણે લખ્યું કે તેમની અપરિપક્વતાનું સૌથી મોટું ઉદાહરણ મીડિયાની સામે રાહુલ ગાંધી દ્વારા વટહુકમને ફાડી નાખવાનું હતું. આ બાલિશ વર્તને વડાપ્રધાન અને ભારત સરકારના અધિકારોને સંપૂર્ણપણે નષ્ટ કરી દીધા હતા. 2014માં યુપીએ સરકારની હાર માટે આ ઘટના સૌથી વધુ જવાબદાર હતી. તમને જણાવી દઈએ કે, રાહુલ ગાંધીએ મીડિયાની સામે કલંકિત નેતાઓને બચાવવા માટે યુપીએ સરકાર દ્વારા પસાર કરવામાં આવેલા વટહુકમને ફાડી નાખ્યો હતો. આ દરમિયાન તત્કાલિન વડાપ્રધાન મનમોહન સિંહ વિદેશ પ્રવાસે ગયા હતા.

ઉલ્લેખનીય છે કે રાજ્યસભામાંથી ગુલામનબી આઝાદ જ્યારે વિદાય લઇ રહ્યા હતા ત્યારે વડાપ્રધાન નરેન્દ્ર મોદીએ તેમની વિદાયમાં લાગણીસભર ભાષણ કર્યું હતું. બીજી તરફ ગુલામનબી આઝાદ જ્યારે  જમ્મુ કાશ્મીરના મુખ્યપ્રધાન હતા ત્યારે બોમ્બ બ્લાસ્ટ થયો હતો અને તેમાં ગુજરાતના પ્રવાસીઓ પણ ભોગ બન્યા હતા. ગુલામનબી આઝાદ આ ઘટનાથી ભારે વ્યથિત થયા હતા અને ભારે ભાવુક બનીને મુશ્કેલીમાં મુકાયેલા ગુજરાતીઓ માટે તમામ વ્યવસ્થા કરી હતી. 

રાજ્યસભામાં વિદાય વેળાએ વડાપ્રધાન મોદી જ્યારે તેમના પ્રવચનમાં ભાવુક બની ગયા ત્યારે તેનો જવાબ આપતી વખતે ગુલામનબી આઝાદ પણ આ ઘટનાને યાદ કરીને ભાવુક બની ગયા હતા.