નીલ ગાયનો શિકાર કરનારા 2 શિકારી ઝડપાયા

વન્ય પ્રાણીઓના ઘાતક હથિયારો વડે શિકાર કરતા બે શિકારીઓને સાવરકુંડલા (Savarkundla) વનવિભાગે ઝડપી પાડયા હતા.

સાવરકુંડલાની વન વિભાગની કચેરી ખાતે દેશી જામગરી બંદૂક, દેશી બંદૂકનો ગન પાઉડર, કુહાડી અને પાઇપ જેવા ઘાતક હથિયારો વડે વન્ય પ્રાણીઓના શિકાર કરતા આ બે શિકારીઓ સાવરકુંડલાના જ છે અને તેમના નામ  સતાર કાળુ મોરી અને સુલતાન રહેમાન લાડક હોવાનું બહાર આવ્યું છે.

આ બંને શિકારીઓએ ત્રણ દિવસ પહેલા સાવરકુંડલાના અમૃતવેલની સીમમાં નીલ ગાયનો શિકાર કર્યો હોવાની બાતમીને આધારે વન વિભાગના આર.એફ.ઓ. પ્રતાપભાઈ  ચાંદુ અને ફોરેસ્ટર યાસીન જુણેજા સહિતની વનતંત્રની ટીમે દરોડો પાડતા બંને શિકારીઓ નાસી છૂટવામાં સફળ થયા હતા. ઘટના સ્થળેથી દેશી જામગરી બંધુક, દેશી બંદૂકનો પાવડર, કુહાડી, પાઇપ તેમજ નીલગાયનો દેશી બંધુકથી કરેલો શિકાર સહિતની સાધન સામગ્રી વન વિભાગ એ કબજે લઈને નાસી છૂટેલા આરોપીઓને ઝડપી પાડવા ચક્રો ગતિમાન કરતા આજે વહેલી સવારે બંને શિકારીઓને આબાદ રીતે ઝડપી પાડવામાં વન વિભાગ સફળ થયું હતું.

નીલગાયના શિકારી સતાર મોરી અને સુલતાન લાડક દ્વારા અગાઉ નીલગાય કે અન્ય કોઈ વન્ય પ્રાણીઓના શિકાર કર્યા છે કે કેમ તે અંગે વનતંત્ર દ્વારા આગવી ઢબે પૂછપરછ શરૂ કરી છે અને બંને શિકારીઓને કોર્ટમાં રજૂ કરવાની તજવીજ વનવિભાગે હાથ ધરી હતી. ધારી વનવિભાગના અધિકારી એસ.આર.ત્રિવેદી દ્વારા શિકારીઓની પૂછપરછ કરી હતી. રેવન્યુ વિસ્તારોમાં વન્ય પ્રાણીઓના શિકારો કરતી ટોળકી ઝડપાઈ જતા પર્યાવરણ પ્રેમીઓએ વન વિભાગની કામગીરીને બિરદાવી હતી.

આ પણ વાંચો--રાજકોટના અલ્વાઝ અને યુવરાજને મળ્યા દીર્ઘાયુષ્યના આશીર્વાદ