ન્યૂઝીલેન્ડ ટીમને મોટો ઝટકો, T20 વર્લ્ડ કપ પહેલા આ ખેલાડીએ ક્રિકેટને કહ્યું અલવિદા

ICC T20 વર્લ્ડ કપને હવે દોઢ મહિનાનો સમય બાકી છે ત્યારે ન્યૂઝીલેન્ડની ટીમને એક મોટો ઝટકો લાગ્યો છે. ટીમના અનુભવી ઓલરાઉન્ડર કોલિન ડી ગ્રાન્ડહોમે આંતરરાષ્ટ્રીય ક્રિકેટને અલવિદા કહી દીધું છે. 36 વર્ષીય કિવી ખેલાડીએ ફિટનેસ અને વધતી ઉંમરને ટાંકીને નિવૃત્તિની જાહેરાત કરી હતી. ન્યૂઝીલેન્ડના ત્રણેય ફોર્મેટમાં 100થી વધુ મેચ રમી ચૂકેલા ગ્રાન્ડહોમે બુધવારે ન્યૂઝીલેન્ડ ક્રિકેટને તેના નિર્ણયની જાણકારી આપી હતી.

ગ્રાન્ડહોમને તાજેતરમાં કેન્દ્રીય કરારમાંથી મુક્ત કરવામાં આવ્યો હતો. ગ્રાન્ડહોમ છેલ્લે જૂન 2022માં કિવી માટે રમ્યો હતો. તે તાજેતરના દિવસોમાં વારંવાર ઇજાઓથી પરેશાન થઇ રહ્યો હતો. ઝિમ્બાબ્વેમાં જન્મેલા કિવીએ કહ્યું કે, તેના નિર્ણયમાં ઘણા પરિબળો ભાગ ભજવે છે. ઇજાઓ એક સમસ્યા હતી અને ઉંમર પણ વધી રહી હતી. ગ્રાન્ડહોમે તેના નિવેદનમાં કહ્યું, "હું સ્વીકારું છું કે હું હવે યુવાન નથી અને ઇજાઓ સાથે તાલીમ મેળવવી મુશ્કેલ બની રહી છે." તેણે ઉમેર્યું કે, "મારો પણ એક પરિવાર છે અને હું તેને સમજવાનો પ્રયાસ કરી રહ્યો છું કે ક્રિકેટ બાદ મારું ભવિષ્ય કેવું દેખાશે. છેલ્લા કેટલાક અઠવાડિયાથી મારા મગજમાં આ બધું ચાલી રહ્યું છે. તેણે વધુમાં કહ્યું કે, "હું ઘણો ભાગ્યશાળી છું કે 2012 માં ડેબ્યૂ કર્યા પછી બ્લેકકેપ્સ માટે રમવા માટે રમવાની તક મળી અને મને મારી આંતરરાષ્ટ્રીય કારકિર્દી પર ગર્વ છે - પરંતુ મને લાગે છે કે હવે સમાપ્ત કરવાનો આ યોગ્ય સમય છે."

આ પણ વાંચો - જાડેજાનું ચોંકાવનારું નિવેદન - વચ્ચે તો એવા સમાચાર હતા કે હું મરી ગયો છું...