કેન્દ્રીય મંત્રી અનુરાગ ઠાકુરે કહ્યું- હિંસા અને ઉપદ્રવથી કંઈ નહીં થાય, જણાવી સરકારની યોજના

ભારતીય સેનામાં ભરતીને લઈને કેન્દ્ર સરકારની અગ્નિપથ યોજના સામે દેશભરમાં વિરોધ પ્રદર્શન ચાલી રહ્યા છે. આ દરમિયાન કેન્દ્રીય રમતગમત મંત્રી અનુરાગ ઠાકુરે વિરોધ કરી રહેલા યુવાનોને હિંસાનો માર્ગ છોડવાની અપીલ કરી છે. તેમણે કહ્યું કે અગ્નિપથ યોજના યુવાનોના હિતમાં અને દેશને સુરક્ષિત બનાવવા માટે લેવાયેલ નિર્ણય છે. કેન્દ્રીય મંત્રીએ કહ્યું કે આ રીતે હિંસા ફેલાવવાથી અને ઉપદ્રવ પેદા કરવાથી કંઈ થશે નહીં. વિપક્ષ પર નિશાન સાધતા તેમણે કહ્યું કે કેટલાક લોકો પોતાની રાજકીય રોટલી શેકવા માંગે છે. અનુરાગ ઠાકુરે કહ્યું કે રમત મંત્રાલય પણ ચાર વર્ષ સુધી અગ્નિવીરોની સેવા કર્યા બાદ તેમના માટે કંઈક કરવાનું વિચારી રહ્યું છે.

કેન્દ્રીય મંત્રી અનુરાગ ઠાકુરે યુવાનોને અગ્નિપથ યોજના પર સંયમથી કામ લેવાની સલાહ આપી હતી. આ સાથે તેમણે કહ્યું કે, CAPFમાં પણ અગ્નિવીરોને પ્રાથમિકતા આપવાની વાત થઈ છે, ઉંમરમાં પણ છૂટ આપવામાં આવશે. આ ઉપરાંત તેમનો વિભાગ એ પણ વિચારી રહ્યો છે કે જેઓ 4 વર્ષની સેવા પછી અગ્નિવીરોને તાલીમ આપીને શારીરિક શિક્ષણ શિક્ષક બનવા માગે છે તેમના માટે અમે શું કરી શકીએ. અનુરાગ ઠાકુરે કહ્યું કે વિવિધ રાજ્યોમાં શારીરિક શિક્ષણ શિક્ષકોની 15 લાખ જગ્યાઓ ખાલી છે.

ઉલ્લેખનીય છે કે, અગ્નિપથ યોજનાને લઈને દેશભરમાં વિરોધ ચાલી રહ્યો છે. દિલ્હી, યુપી, હરિયાણા, ઉત્તરાખંડ સહિત 13 રાજ્યોમાં યુવાનો રસ્તા પર આવીને સરકારની આ યોજનાનો વિરોધ કરી રહ્યા છે. ઘણા રાજ્યોમાં આ યોજના વિરુદ્ધ હિંસક પ્રદર્શન પણ જોવા મળી રહ્યા છે. તેની સૌથી વધુ અસર બિહારમાં જોવા મળી રહી છે. હિંસક ટોળાએ બિહારમાં અનેક જાહેર સ્થળોને નિશાન બનાવ્યા છે. જેમાં સૌથી વધુ નુકસાન રેલવેને થયું છે. ઘણી ટ્રેનોમાં આગ લગાવવામાં આવી છે.