Ahmedabad : ગુજરાત હાઈકોર્ટ ખાતે નવા 'આર્બિટ્રેશન સેન્ટર'નું ભૂમિપૂજન, વિવાદોના ઝડપી ઉકેલ માટે મુખ્યમંત્રીની મોટી પહેલ

Ahmedabad : અમદાવાદમાં મુખ્યમંત્રી ભૂપેન્દ્રભાઈ પટેલના વરદ હસ્તે ગુજરાત હાઈકોર્ટના નવા આર્બિટ્રેશન સેન્ટરનું વિધિવત ભૂમિપૂજન કરવામાં આવ્યું છે, જે રાજ્યની ન્યાય પ્રણાલીમાં એક સીમાચિહ્નરૂપ પગલું સાબિત થશે. ગુજરાત એક અગ્રણી ઔદ્યોગિક રાજ્ય હોવાથી વેપારની સાથે વધતા વાણિજ્યિક અને નાગરિક વિવાદોનો કોર્ટની બહાર સોહાર્દપૂર્ણ રીતે નિકાલ લાવવા માટે આ સેન્ટર આશીર્વાદરૂપ બનશે. આ પ્રસંગે મુખ્યમંત્રીએ જણાવ્યું હતું કે, આ આર્બિટ્રેશન હબ મધ્યસ્થી તરીકેની ભૂમિકા ભજવીને અરજદારોને સમયસર અને અસરકારક ન્યાય અપાવશે, જેનાથી હાઈકોર્ટના કેસનો બોજ ઘટશે અને સમગ્ર ન્યાય પ્રક્રિયા વધુ પારદર્શક તથા સુવ્યવસ્થિત બનશે. રાજ્ય સરકારે ન્યાયિક માળખાને મજબૂત કરવા માટે બજેટમાં ₹2700 કરોડની માતબર રકમની ફાળવણી કરી છે, જે ઝડપી ન્યાય પ્રત્યેની સરકારની કટિબદ્ધતા દર્શાવે છે.