કોંગ્રેસ વર્કિંગ કમિટીની આજે મહત્વની બેઠક, પ્રમુખ પદ માટે થશે ચર્ચા

કોંગ્રેસ વર્કિંગ કમિટીની આજે મહત્વની બેઠક યોજાવાની છે. આ બેઠકમાં પાર્ટી અધ્યક્ષની ચૂંટણીને લગતા કાર્યક્રમને મંજૂરી આપવામાં આવશે. બેઠકમાં રાહુલ ગાંધી કોંગ્રેસ અધ્યક્ષ પદ સંભાળશે કે કેમ તે અંગે પણ ચર્ચા કરવામાં આવશે.  ગુલામ નબી આઝાદના પાર્ટીમાંથી રાજીનામું આપ્યા પછી, આ બેઠકને ઘણી મહત્વપૂર્ણ માનવામાં આવી રહી છે.

સૂત્રોના જણાવ્યા અનુસાર ઓનલાઈન બેઠકમાં અધ્યક્ષની ચૂંટણીના વિગતવાર કાર્યક્રમને મંજૂરી આપવાની સાથે સોનિયા ગાંધી અને રાહુલ ગાંધીના નેતૃત્વમાં વિશ્વાસ વ્યક્ત કરવામાં આવી શકે છે. કોંગ્રેસના સૂત્રોના જણાવ્યા અનુસાર પ્રમુખની ચૂંટણીની પ્રક્રિયામાં થોડા અઠવાડિયાનો વિલંબ થઈ શકે છે. તેમણે કહ્યું કે, પાર્ટીનું ધ્યાન હાલમાં 'ભારત જોડો યાત્રા' પર છે અને કેટલાક રાજ્ય એકમો જરૂરી ઔપચારિકતાઓ પૂર્ણ કરવામાં સક્ષમ નથી.

 ગયા વર્ષે યોજાયેલા CWC દ્વારા મંજૂર કરાયેલા કાર્યક્રમ અનુસાર, પ્રમુખની ચૂંટણીની પ્રક્રિયા 21 ઓગસ્ટથી 20 સપ્ટેમ્બરની વચ્ચે પૂર્ણ થવાની હતી. CWCએ ગયા વર્ષે નિર્ણય લીધો હતો કે બ્લોક સમિતિઓની ચૂંટણી 16 એપ્રિલથી 31 મે દરમિયાન યોજાશે, જ્યારે જિલ્લા સમિતિના પ્રમુખોની ચૂંટણી 1 જૂનથી 20 જુલાઈ સુધી યોજાશે.

 CWCની બેઠક એવા સમયે થઈ રહી છે જ્યારે સોનિયા મેડિકલ તપાસ માટે વિદેશમાં છે. રાહુલ ગાંધી અને પ્રિયંકા ગાંધી પણ તેમની સાથે ગયા છે. સૂત્રોએ જણાવ્યું કે આ ત્રણેય ટોચના નેતાઓ CWCની ઓનલાઈન બેઠકમાં ભાગ લેશે.

સૂત્રોએ જણાવ્યું હતું કે પ્રક્રિયામાં થોડા અઠવાડિયા વિલંબ થઈ શકે છે. જો કે પાર્ટીને ઓક્ટોબરમાં પ્રમુખ મળવાની ધારણા છે.  આ દિવસોમાં કોંગ્રેસ 'ભારત જોડો યાત્રા'ની તૈયારી કરી રહી છે. આ યાત્રા પાંચ મહિનાની હશે જેમાં કન્યાકુમારીથી કાશ્મીર સુધીનું 3,570 કિલોમીટરનું અંતર કાપવામાં આવશે. આ યાત્રા 12 રાજ્યો અને બે કેન્દ્રશાસિત પ્રદેશોમાંથી પસાર થશે.

આ પણ વાંચો--ગુલામ નબી હવે કોંગ્રેસથી 'આઝાદ', તમામ હોદ્દા પરથી રાજીનામું