મેગા બ્લડ ડોનેશન કેમ્પમાં 700 જેટલા સ્વૈચ્છિક રક્તદાતાઓએ કર્યું રક્તદાન

ગુરુકૃપા ફાઉન્ડેશનના ફાઉન્ડર ગૌરાંગ મહેતાએ ગુજરાત ફર્સ્ટને કહ્યું કે અમે 7 મિત્રોએ વિવિધ સેવાકીય પ્રવૃત્તિ માટે આ ગ્રુપ બનાવ્યું હતું. આજે તેમાં 300 જેટલા સભ્યો જોડાયેલાં છે, અને છેલ્લાં 7 વર્ષથી અમે દર વર્ષે આવો મેગા બ્લ્ડ ડોનેશનનો કાર્યક્રમ કરીએ છીએ. સાથે જ પશુસેવા, માનવસેવાના કાર્યો પણ નિયમિત કરીએ છીએ. કોરોના સંક્રમણ કાળમાં વૈશ્વિક સ્તરે લોહીની અછત ઉભી થઇ હતી એવા કપરા સમયમાં થેલેસેમિયાગ્રસ્ત બાળકો માટે રેગ્યુલર ડોનરને કોલ કરવામાં આવતા હતા. ડૉક્ટરો અને નર્સો દ્વારા પીપીઈ કીટ પહેરીને આ કાર્ય કરવામાં આવ્યું હતું. આ સાથે જ ગૌસેવા માટે અમારા 300 સભ્યો દ્વારા એક SIP યોજના ચાલે છે. જેમાં દર મહિને 300 જેટલા સભ્યો 1000 રુપિયા આપે છે. જેમાંથી રાજ્યની ગૌશાળાઓમાં મૂંગા પશુઓ માટે વિવિધ સેવાકીય પ્રવૃત્તિઓ કરાય છે.

 

આ વર્ષે પણ તમામ લોકોના સ્વાસ્થ્યની તકેદારી સાથે આ કેમ્પ યોજાયો હતો. સામાન્ય રીતે દર રક્તદાન પહેલા જે તે વ્યક્તિનું ટેમ્પરેચર ચેક કરવામાં આવે છે. તેમજ વ્યકિતનું વજન, હિમોગ્લોબીનની માત્રા અને બ્લડ પ્રેશર પણ ચેક કરવામાં આવે છે. જો વ્યક્તિ ફીટ ન હોય તો તેને રિજેક્ટ પણ કરાય છે. આજે આવી 100 લોકોને રિજેક્ટ પણ કરાયાં હતાં.  રક્તદાતાઓને પ્રોત્સાહિત કરવા તેમને સર્ટિફિક્ટ અને બેગ પણ આપવામાં આવી હતી.