અમેરિકાની એક શાળામાં અંધાધૂંધ ગોળીબાર, 18 બાળકો સહિત 21ના મોત

ટેક્સાસની એક શાળામાં થયેલા ગોળીબારમાં 18 બાળકો સહિત 21ના મોત થયા છે. આ ઘટના ટેક્સાસના ઉવાલ્ડેની રોબ એલિમેન્ટરી સ્કૂલમાં બની હતી. સીએનએન અનુસાર, એક 18 વર્ષીય વ્યક્તિ જેણે શાળામાં ગોળીબાર કર્યો હતો તે પોલીસકર્મીઓ દ્વારા માર્યો ગયો છે. ફાયરિંગ કરનારા વ્યક્તિનું નામ સાલ્વાડોર રામોસ જણાવવામાં આવી રહ્યું છે.

આ ગોળીબારમાં માર્યા ગયેલા બાળકો વિશે અધિકારીઓએ હજુ કોઇ વિગતો આપી નથી. ટેક્સાસના ગવર્નર ગ્રેગ એબોટે કહ્યું કે, સુરક્ષા દળોની કાર્યવાહીમાં બંદૂકધારી પણ માર્યો ગયો છે. આ ઘટના સ્થાનિક સમય અનુસાર સવારે 12.15 વાગ્યે બની હતી. ઘટના બાદ અમેરિકી રાષ્ટ્રપતિ જો બાઈડેને ટેક્સાસના ગવર્નર સાથે વાત કરી હતી અને ગોળીબારની ઘટનાને પગલે શક્ય તમામ મદદની ઓફર કરી હતી. કહેવામાં આવી રહ્યું છે કે, હુમલામાં 13 બાળકો, સ્કૂલ સ્ટાફ મેમ્બર અને કેટલાક પોલીસકર્મી પણ ઘાયલ થયા છે. ફેડરલ કાયદા અમલીકરણ અધિકારીઓએ નામ ન આપવાની શરતે સમાચાર એજન્સીને જણાવ્યું હતું કે, મૃત્યુઆંક વધી શકે છે. નોંધપાત્ર વાત એ છે કે હુમલાખોરે બીજા, ત્રીજા અને ચોથા ધોરણમાં ભણતા માસૂમ બાળકોને પોતાની ગોળીથી નિશાન બનાવ્યા છે. આ ઘટના બાદ અમેરિકામાં ચાર દિવસનો રાષ્ટ્રીય શોક જાહેર કરવામાં આવ્યો છે.

આ હુમલો એવા સમયે થયો છે જ્યારે માત્ર 10 દિવસ પહેલા જ બફેલો, ન્યૂયોર્કમાં એક સુપરમાર્કેટમાં બોડી આર્મર્ડ બંદૂકધારીએ 10 અશ્વેત દુકાનદારો અને કામદારોની હત્યા કરી હતી. તપાસ એજન્સીઓએ આ ઘટનાને જાતિવાદી હુમલો ગણાવ્યો હતો. ટેક્સાસની શાળામાં ગોળીબારની આ ઘટના આ દાયકામાં શાળાના હુમલાઓમાં સૌથી વધુ હૃદયદ્રાવક છે. લગભગ એક દાયકા પહેલા 14 ડિસેમ્બર 2012ના રોજ કનેક્ટિકટના ન્યૂ ટાઉનમાં આવો જ હુમલો થયો હતો. સેન્ડીની એલિમેન્ટરીમાં પણ, બંદૂકધારીઓએ 20 બાળકો અને છ પુખ્ત વયના લોકોની હત્યા કરી હતી. અમેરિકન ગ્રેડ સ્કૂલમાં ગોળીબારની આ સૌથી ઘાતક ઘટના છે. આ ઘટનાને પણ 20 વર્ષના યુવકે અંજામ આપ્યો હતો. આ હુમલામાં કુલ 26 લોકોના મોત થયા હતા, જેમાંથી 20 બાળકો હતા. અમેરિકાના ઈતિહાસમાં તેને સૌથી ભયાનક સામૂહિક ગોળીબાર માનવામાં આવે છે. 

આ પણ વાંચો- જગત જમાદાર અમેરિકા પોતાના દેશના ગન કલ્ચર સામે લાચાર