ચીને બતાવી દરિયાદિલી! તુર્કીને કરી ભૂકંપ રાહત માટે 6 મિલિયન ડોલર સહાયની ઓફર

તુર્કી અને સીરિયામાં આવેલા ભૂકંપે અહીંની સ્થિતિ ભયાનક કરી દીધી છે. હજારો લોકોએ આ ભૂકંપમાં પોતાના સ્વજનને ગુમાવ્યા છે. સોમવારે આવેલા ભૂકંપ બાદ આજે મંગળવારે પણ તુર્કીની ધરતી ભૂકંપના આંચકાથી ધ્રૂજી ઉઠી હતી. આ આંચકાની તીવ્રતા રિક્ટર સ્કેલ પર 5.5 માપવામાં આવી હતી. મળી રહેલી માહિતી અનુસાર, તુર્કી અને સીરિયાના કાટમાળમાંથી અત્યાર સુધીમાં 4,300 થી વધુ મૃતદેહો બહાર કાઢવામાં આવ્યા છે. 

તુર્કીની પરિસ્થિતિને ધ્યાનમાં રાખતા દુનિયાના અલગ-અલગ દેશ તેની મદદ માટે આગળ આવી રહ્યા છે. આ કડીમાં હવે ચીનનો પણ સમાવેશ થયો છે. તાજેતરમાં સામે આવી રહેલા સમાચાર અનુસાર, ચીને તુર્કીને ભૂકંપ રાહત માટે 6 મિલિયન ડોલરની ઈમરજન્સી સહાય ઓફર કરી છે. મહત્વનું છે કે, તુર્કીમાં ભયાનક ભૂકંપના આવ્યા બાદ સોમવારે સવારથી જ રાહત અને બચાવ કાર્ય યુદ્ધના ધોરણે ચાલી રહ્યું છે. ભારતે તુર્કીને માનવતાવાદી અને તબીબી સહાય મોકલી છે. બીજી તરફ અહીં મૃત્યુઆંક સતત વધી રહ્યો છે. 6 ફેબ્રુઆરી 2023ની સવારે તુર્કી અને સીરિયામાં 7.8ની તીવ્રતાનો ભૂકંપ આવ્યો હતો. નોંધપાત્ર રીતે, તુર્કીમાં એક જ દિવસે 7.8, 7.5, 6.0ની તીવ્રતાના કુલ 3 ભૂકંપ આવ્યા અને તુર્કી અને સીરિયામાં આ ભૂકંપના કારણે મૃત્યુઆંક વધીને 4,372 થયો છે. વર્લ્ડ હેલ્થ ઓર્ગેનાઈઝેશન (WHO) અનુસાર, મૃત્યુઆંક 20,000 ને વટાવી શકે છે.

આ પણ વાંચો - તૂર્કીમાં તબાહી, લોકોની ચીસાચીસ અને પત્તાના મહેલની જેમ ઇમારતો ધરાશાયી, જુઓ વીડિયો