લાલરિનુંગા જેરેમીએ ઈતિહાસ રચ્યો, જીત્યો ગોલ્ડ મેડલ, ઈજા છતાં રેકોર્ડ બ્રેકિંગ વજન ઊંચું કર્યું

ભારતીય
વેઇટલિફ્ટર લાલરિનુંગા જેરેમીએ બર્મિંગહામમાં કોમનવેલ્થ ગેમ્સ 2022ના બીજા દિવસે
પુરુષોની 67 કિગ્રા વર્ગમાં વિક્રમી વજન ઉપાડીને સુવર્ણ ચંદ્રક જીત્યો. સ્નેચમાં, જેરેમીએ 140 કિગ્રા ઉપાડીને નવો
કોમનવેલ્થ ગેમ્સ રેકોર્ડ બનાવ્યો, જ્યારે
ક્લીન એન્ડ જર્કમાં તેણે 160 કિગ્રા વજન ઉઠાવ્યું અને કુલ 300 કિગ્રા ઉપાડીને તેની
શ્રેણીમાં નવો કોમનવેલ્થ ગેમ્સ રેકોર્ડ બનાવ્યો. વેઈટલિફ્ટિંગમાં આ ભારતનો ત્રીજો
સિલ્વર અને એકંદરે 5મો મેડલ છે. લાલરિનુંગા જેરેમી પહેલા, સંકેત સરગર (સિલ્વર), ગુરુરાજ પૂજારી (બ્રોન્ઝ), મીરાબાઈ ચાનુ (ગોલ્ડ) અને બિંદ્યારાની
દેવીએ (સિલ્વર) ભારત માટે મેડલ જીત્યા હતા.

જેરેમીની
વાત કરીએ તો, તેણે સ્નેચમાં તેના પ્રથમ પ્રયાસમાં
136 કિગ્રા વજન ઉપાડ્યું,
જ્યારે બીજા પ્રયાસમાં તેણે 140 કિગ્રા
વજન ઉપાડ્યું અને કોમનવેલ્થ ગેમ્સમાં 67 કિગ્રા વર્ગમાં નવો રેકોર્ડ બનાવ્યો.
ત્રીજા પ્રયાસમાં તેણે 143 કિલો વજન ઉપાડવાનો પ્રયાસ કર્યો પરંતુ તે નિષ્ફળ રહ્યો.
સ્નેચમાં, તે બીજા ક્રમાંકિત નાઇજિરિયન કરતાં 10
કિગ્રા આગળ હતો.

ક્લીન
એન્ડ જર્કમાં જેરેમીએ પ્રથમ પ્રયાસમાં 154 કિલો વજન ઉપાડ્યું અને આ દરમિયાન તે
ઈજાગ્રસ્ત પણ થઈ ગયો. તેના પહેલા જ પ્રયાસમાં તેણે કોમનવેલ્થ ગેમ્સમાં કુલ 294
કિગ્રા વજન ઉઠાવીને નવો રેકોર્ડ બનાવ્યો હતો. પોતાના બીજા પ્રયાસમાં આ ભારતીય વેઈટ
લિફ્ટરે ઈજાગ્રસ્ત હોવા છતાં 160 કિલો વજન ઉપાડીને સૌને ચોંકાવી દીધા હતા. જેરેમી
બીજા પ્રયાસ પછી ઘૂંટણિયે પડી ગયો હતો, પરંતુ વજન ઉપાડવાની ખુશી તેના ચહેરા પર સ્પષ્ટ દેખાતી હતી. બીજા
પ્રયાસ બાદ તેનું કુલ વજન 300 કિલો હતું. ઈજા
હોવા છતાં જેરેમીએ ત્રીજા પ્રયાસમાં જોખમ ઉઠાવીને
165 કિલો વજન ઉપાડવાનો પ્રયાસ કર્યો, પરંતુ તે તેમાં નિષ્ફળ ગયો. અગાઉ તેને પગમાં ઈજા થઈ હતી, પરંતુ ત્રીજા પ્રયાસ બાદ તેના ડાબા
હાથમાં પણ ઈજા થઈ હતી.