મશહુર’બિકીની કિલર’19 વર્ષ પછી જેલમાંથી બહાર આવશે: નેપાળ સુપ્રીમ કોર્ટનો આદેશ

નેપાળની સુપ્રીમ કોર્ટે (Nepal Supreme Court) બિકિની કિલરના નામથી જાણીતા ચાર્લ્સ શોભરાજને (HARLES SOBHRAJ) મુક્ત કરવાનો આદેશ આપ્યો છે. સુપ્રીમ કોર્ટના જજ સપના પ્રધાન મલ્લા અને તીલ પ્રસાદ શ્રેષ્ઠાની બેન્ચે શોભરાજને મુક્ત કરવાનો આદેશ આપ્યો હતો. ચાર્લ્સ શોભરાજની મોટી ઉંમરને ધ્યાનમાં રાખીને સુપ્રીમે તેને છોડી મૂકવાનો આદેશ આપ્યો હતો. બે અમેરિકી પ્રવાસીઓની નેપાળમાં હત્યાના આરોપસર તે 2003ની સાલથી અહીંની જેલમાં બંધ હતો. 19 વર્ષ પછી તે જેલમાંથી બહાર આવશે. 

ચાર્લ્સ શોભરાજ પર બે અમેરિકન પ્રવાસીઓની હત્યાનો આરોપ હતો. આ આરોપ પર તે 2003થી નેપાળની જેલમાં બંધ છે. નેપાળની સર્વોચ્ચ અદાલતે પણ તેની મુક્તિના 15 દિવસની અંદર તેને દેશનિકાલ કરવાનો આદેશ આપ્યો છે.

70ના દાયકામાં ચાર્લ્સ પર ભારત, થાઇલેન્ડ, તુર્કી અને ઇરાનમાં 20થી વધુ લોકોની હત્યાનો આરોપ હતો. ચાર્લ્સને હિપ્પીઝ પ્રત્યે તીવ્ર નફરત હતી અને તે તેના દેખાવ અને વ્યક્તિત્વને કારણે હેડલાઇન્સમાં હતો. એવું કહેવાય છે કે 70ના દાયકામાં ચાર્લ્સે દક્ષિણ-પૂર્વ એશિયામાં 12 પ્રવાસીઓની હત્યા કરી હતી. 

ચાર્લ્સ શોભરાજને ગુનાની દુનિયામાં "બિકિની કિલર" અને "સર્પ" તરીકે પણ ઓળખવામાં આવે છે. 1970ના દાયકામાં શોભરાજે દક્ષિણપૂર્વ એશિયામાં 20થી વધુ લોકોની હત્યા કરી નાખી હતી. 1944માં વિયેતનામમાં જન્મેલા શોભરાજના પિતા ભારતીય હતા અને માતા વિયેતનામી હતા. તે નાની ઉંમરે જ ફ્રાન્સ ચાલ્યો ગયો હતો અને નાની નાની ચોરીઓ અને છેતરપિંડી સહિતની ગુનાહિત પ્રવૃત્તિઓમાં સામેલ થઈ ગયો હતો. 1970ના દાયકામાં, શોભરાજે દક્ષિણપૂર્વ એશિયાનો પ્રવાસ કર્યો, જ્યાં તેણે હત્યા સહિત ઘણા વધુ ગંભીર ગુનાઓ કરવાનું શરૂ કર્યું.

શોભરાજે થાઇલેન્ડ, નેપાળ અને ભારતમાં પ્રવાસીઓ, ખાસ કરીને બેકપેકર્સને નિશાન બનાવ્યા હતા. તે ઘણીવાર તેમની સાથે મિત્રતા કરતો અને પછી તેમને માદક દ્રવ્યો આપતો, તેમના સામાનની ચોરી કરી લેતો. કેટલાક કિસ્સામાં તેણે જે લોકોની હત્યા કરી હતી તેમની લાશોનો તેણે ખરાબ રીતે નિકાલ કર્યો હતો. શોભરાજ મીડિયા અને પોલીસમાં એક બિકિની કિલર તરીકે પણ જાણીતો હતો. કારણ કે વેકેશન ગાળવા માટે આવેલી બિકિની પહેરેલી છોકરીઓ તેનો મુખ્ય ટાર્ગેટ હતો. તે છોકરીઓ સાથે દોસ્તી કરી લેતો પછી તેમને ડ્રગ્સ આપીને મારી નાખતો. શોભરાજ અજાણ્યાઓને છેતરવામાં અને આખા યુરોપ અને એશિયામાં પોલીસથી દૂર રહેવામાં પારંગત હતો. એટલા માટે તેમને સર્પ કહેવામાં આવતા હતા.