ગુજરાત ફર્સ્ટના અહેવાલને પગલે અંકલેશ્વરની નાલંદા સ્કૂલમાં હાથ ધરાઇ સફાઇ, શૈક્ષણિક કાર્ય થયું પૂર્વવત

અંકલેશ્વર રાજપીપળા ચોકડી નજીક સારંગપુર અને ગડખોલ ગ્રામ પંચાયતની વચ્ચે આવેલી નાલંદા સ્કૂલ સંકુલમાં ગટરના પ્રદૂષિત પાણી ફરી વળ્યા હતા. જેના પગલે તાત્કાલીક ધોરણે  વિદ્યાર્થીઓને રજાઓ આપી પાંચ દિવસ માટે સ્કૂલ બંધ કરી દેવાનો નિર્ણય લેવાયો હતો. આ સમગ્ર અહેવાલો મીડિયામાં પ્રકાશિત થતાં જ ગડખોલ ગ્રામ પંચાયત અને સાળંગપુરની ગ્રામ પંચાયત સતત કામે લાગી ગઈ હતી અને જામ થઈ ગયેલી ગટરની સફાઈ કરવા સાથે કામગીરી શરૂ કરવામાં આવી હતી અને સમગ્ર દિવસ દરમિયાન ચાલેલી કામગીરી બાદ આખરે નાલંદા સ્કૂલ સંકુલમાં ભરાયેલા ગટરના પ્રદૂષિત પાણીનો નિકાલ થતાં સમગ્ર સંકુલ ચોખ્ખું કરીને શિક્ષકોને જાણ કરવામાં આવી હતી જેના પગલે શિક્ષકોએ પણ પાંચ દિવસ જે રજા જાહેર કરી હતી તેને રદ કરી તાબડતોબ શૈક્ષણિક કાર્ય શરૂ કર્યું હતું. . જે બાદ ફરી એકવાર નાલંદા સ્કૂલ વિદ્યાર્થીઓની કિલિકારીઓથી ગુંજી ઊઠી હતી.

ગટરના પ્રદૂષિત પાણી સ્કૂલ સંકુલમાં ભરાઈ રહેતા શિક્ષકોએ રજા જાહેર કરી પરંતુ તેના નિકાલ માટેના પ્રયાસો ન કરતા આખરે મીડિયાએ વિદ્યાર્થીઓના શિક્ષણ ઉપર અસર ન પડે તે માટે સમગ્ર અહેવાલ પ્રકાશિત કર્યા હતા જેના પગલે તાબડતોબ બંને ગ્રામ પંચાયત અને તંત્ર કામે લાગ્યું હતું અને ગટરના પ્રદૂષિત પાણીનો નિકાલ કરી માત્ર એક જ દિવસમાં સ્કૂલ કાર્ય શરૂ કરી દેતા મીડિયાનો પણ સ્થાનિકો આભાર માની રહ્યા છે.